Warangal
- భార్యను భుజాలపై మోసుకెళ్లిన వృద్ధుడు
- వరంగల్ ఎంజీఎం సిబ్బంది పై రోగుల బంధువుల ఆగ్రహం
- అధికారుల తీరుపైనా అసహనం
విధాత, వరంగల్ ప్రత్యేక ప్రతినిధి: పేరుకే పెద్ద ఆసుపత్రి.. పేదలది.. కానీ ఇక్కడ చూస్తే దయనీయమైన స్థితి.. ఇదీ వరంగల్ ఎంజీఎం హాస్పిటల్ లో పరిస్థితి. హాస్పిటల్లో పనిచేసే సిబ్బంది తీరుపై రోగుల బంధువులు ఆగ్రహం వ్యక్తం చేస్తుండగా అధికారుల నిర్లక్ష్యంపై అసహనం వ్యక్తం అవుతుంది.
ఇటీవలనే నిజామాబాద్ హాస్పిటల్లో జరిగిన సంఘటన సంచలనం సృష్టించగా వరంగల్ ఎంజీఎంలో స్ట్రెచర్ లేక ఒక వృద్ధుడు తన భార్యను వీపు మీద ఎక్కించుకొని తీసుకపోతున్న సంఘటన ఇప్పుడు చర్చనీయాంశంగా మారింది.
తాజాగా జరిగిన ఘటన ఉదహరణగా చెప్పవచ్చు. నడవలేని స్థితిలో ఉన్న రోగికి స్ట్రెచర్ కావాలని అడిగితే ఇవ్వకపోవడంతో ఆమె భర్తే తప్పని సరి పరిస్థితుల్లో వీపుమీదికెక్కించుకుని మోసుకుంటూ వెళ్లాల్సిన దుస్థితి ఏర్పడింది.
వివరాలిలా ఉన్నాయి. భద్రాద్రి కొత్తగూడెం జిల్లాకు చెందిన లక్ష్మి అనే వృద్ధురాలికి నెల కిందట ఎంజీఎంలో డాక్టర్లు ఆపరేషన్ చేసి అరిపాదం తొలగించారు. ఆ తర్వాత పేషెంట్ ను నెల తర్వాత వచ్చి మళ్లీ చెకప్ చేయించుకుని వెళ్లాలని సూచించారు. దీంతో శుక్రవారం రోగిని తీసుకుని భర్త దవాఖానకు వచ్చారు. అయితే ఈ రోజు పెద్దసారు లేరని, రేపు రావాలని అక్కడున్న సిబ్బంది ఆ వృద్ధురాలైన పేషెంట్ ను నిర్లక్ష్యంగా వదిలేశారు.
కనీసం స్ట్రెచర్ కూడా ఇవ్వకపోవడంతో పేషెంట్ ను భర్త భుజాలపైకి ఎక్కించుకొని బయటికి తీసుకొచ్చారు. ఈ ఘటనపై అక్కడున్న పలువురు రోగుల బంధువులు ఆగ్రహం వ్యక్తం చేశారు. కనీసం వయస్సు, అవస్థను దృష్టిలో పెట్టుకునైనా హాస్పిటల్ సిబ్బంది సహకరించకపోవడంపై మండి పడుతున్నారు.
ఈ మేరకు కొందరు తీసిన ఫోటోలు సామాజిక మాధ్యమాల్లో పోస్ట్ చేయడంతో అది వైరల్ అవుతోంది. కాగా, ఎంజీఎం హాస్పిటల్ లో ఇలాంటి ఘటనలు సర్వసాధారణంగా మారాయని, ఉన్నతాధికారులు కట్టుదిట్టమైన చర్యలు తీసుకుంటేనే పరిస్థితులు మెరుగుపడుతాయని పలువురు డిమాండ్ చేస్తున్నారు.
