Brain Disorders | ఆరోగ్య రంగంపై ఒత్తిడి పెరగడానికి మెదడు రుగ్మతలు ప్రధాన కారణాల్లో ఒకటి. భారతదేశంలోనూ బ్రెయిన్ డిజార్డర్ కేసులు పెరుగుతున్నది. మన శరీరాన్ని మెదడు నియంత్రిస్తూ వస్తుంటుంది. అందులో ఎలాంటి సమస్య వచ్చినా మొత్తం ఆరోగ్యంపై తీవ్ర ప్రభావం చూపుతుందని ఆరోగ్య నిపుణులు పేర్కొటున్నారు. ఈ క్రమంలో ప్రాథమిక, ద్వితీయ, తృతీయ స్థాయిలో మెదడు ఆరోగ్య సంరక్షణ ప్రాపత్య, నాణ్యతను మెరుగుపరిచేందుకు కేంద్ర ఆరోగ్యమంత్రిత్వ శాఖ ‘బ్రెయిన్ హెల్త్‌పై జాతీయ స్థాయి టాస్క్‌ఫోర్స్‌ని ఏర్పాటు చేసింది. ఈ మేరకు శనివారం ఆఫీస్‌ మెమోరాండం జారీ చేసింది. మెమోరాండం ప్రకారం.. ‘మెదడు ఆరోగ్యం అనేది ఒక ఉద్భవిస్తున్న సమస్య. దీన్ని మెరుగుపరచడం ప్రజల జీవన నాణ్యతను మెరుగుపరచడం మాత్రమే కాదు.. ఆరోగ్య రంగంపై పెరుగుతున్న ఒత్తిడిని తగ్గించడంలో కూడా సహాయపడుతుంది. ఈ దిశగా కీలకమైన ముందడుగు వేస్తూ ఆరోగ్యశాఖ.. ఓ ప్రణాళికను ప్రారంభించింది. ‘నేషనల్ టాస్క్ ఫోర్స్ ఆఫ్ బ్రెయిన్ హెల్త్’ యాక్సెస్‌ను పెంచడానికి, చికిత్స నాణ్యతను మెరుగుపరచడానికి ఏర్పాటు చేసింది. దేశంలో అనేక రకాల బ్రెయిన్ డిజార్డర్స్ వచ్చే ప్రమాదం ఉందని ఆరోగ్య నిపుణులు పేర్కొంటున్నారు. యువత సైతం బాధితులుగా మారుతున్నారని ఆందోళన వ్యక్తం చేస్తున్నారు.
న్యూరోలాజికల్ డిజార్డర్స్ డిసేబిలిటీ అడ్జస్టెడ్ లైఫ్ ఇయర్స్ (DALY)కి ప్రధాన కారణం, ప్రపంచవ్యాప్తంగా మరణాలకు రెండవ ప్రధాన కారణం బ్రెయిన్ డిజార్డర్స్‌గా నిపుణులు పేర్కొంటున్నారు. డిజార్డర్స్ కారణంగా ఏటా 90లక్షల మందికిపైగా ప్రాణాలు కోల్పోతున్నారు. గత మూడు దశాబ్దాలుగా భారతదేశంలో నిర్వహించిన చాలా అధ్యయనాలు స్ట్రోక్, మూర్చ, పార్కిన్సన్స్ వ్యాధి, చిత్తవైకల్యంతో సహా మెదడు వ్యాధుల భారం పెరుగుతున్నట్లు గుర్తించాయి. పట్టణ భారతీయ జనాభాలో ఎక్కువ కేసులు కనిపిస్తున్నాయి. సంరక్షణ, సామాజిక-ఆర్థిక స్థితి, ప్రాంతం, లింగం ఆధారంగా అనేక రకాల అసమానతలు కొనసాగుతున్నాయి. దీనికి సంబంధించి జులై 15న టాస్క్‌ఫోర్స్‌ నివేదిక సమర్పించనున్నది. మన మెదడు నాడీ వ్యవస్థలో ఒక భాగమని ఇక్కడ తెలుసుకోవడం ముఖ్యం. నరాల నెట్‌వర్క్ శరీరంలో సంకేతాలను ప్రసారం చేస్తుంది. మెదడు సంబంధిత రుగ్మతల కేసులు కొన్ని రకాల ఇన్ఫెక్షన్‌లు, కణితుల వల్ల, ఆటో ఇమ్యూన్‌గా ఉండడం వల్ల సంభవించవచ్చు.
మెదడు వ్యాధుల కేసులు భారతదేశంలోనే కాకుండా ప్రపంచ వ్యాప్తంగా పెద్ద సమస్యగా మారాయి. సకాలంలో రోగ నిర్ధారణ, చికిత్స లేకపోవడం వల్ల, ప్రమాదం పెరిగే ప్రమాదం ఎక్కువగా కనిపిస్తుంది. అల్జీమర్స్ వ్యాధి 6 మిలియన్ల (60 లక్షలు) కంటే ఎక్కువ మందిని ప్రభావితం చేస్తుంది. ఆటిజం స్పెక్ట్రమ్ డిజార్డర్ 44 మంది పిల్లలలో ఒకరికి వస్తుంది. మెదడు కణితులు, ఇతర నాడీ వ్యవస్థ క్యాన్సర్లు చాలా అరుదు. అన్ని క్యాన్సర్లు 1.3శాతం ఉన్నాయి. మూర్ఛ వ్యాధి ప్రపంచ జనాభాలో 1.2శాతం మందిని ప్రభావితం చేస్తుంది. ఇందులో 30 లక్షల మంది పెద్దలు, 4.70 లక్షల మంది పిల్లలు బాధితులుగా ఉన్నారు. మానసిక అనారోగ్యం చాలా సాధారణం, ఇది 5 మంది పెద్దలలో ఒకరిని ప్రభావితం చేస్తుంది. మల్టిపుల్ స్క్లెరోసిస్ అనేది దాదాపు 10లక్షల మందిని ప్రభావితం చేస్తున్నది. ప్రతి సంవత్సరం దాదాపు 8 లక్షల మందికి పక్షవాతం బారినపడుతున్నారు.
