Buffalo : పంచాయతీ పెద్దమనుషులు, స్థానిక పోలీసులు తెంచలేకపోయిన ఓ పంచాయితీని బర్రె తెంచింది. వినడానికి విచిత్రంగా ఉన్నా ఇది నిజం. ఇటీవల తప్పిపోయిన ఓ బర్రె తనదంటే తనది అంటూ ఇద్దరు వ్యక్తులు గొడవపడ్డారు. పెద్దమనుషుల్లో పంచాయతో పెట్టారు. అయినా ఫలితం లేకపోవడంతో పోలీసులకు ఫిర్యాదు చేశారు. పోలీసులు కూడా ఆ బర్రె అసలు యజమాని ఎవరనేది తేల్చలేకపోయారు. చివరికి ఒక ఉపాయం ఆలోచించి ఆ బర్రెనే తగువు తెంచేలా ప్లాన్‌ చేశారు. వారు ఊహించినట్టుగానే బర్రె తగువును తెంచేసింది.
వివరాల్లోకి వెళ్తే.. యూపీలోని ప్రతాప్‌గఢ్‌ జిల్లా మహేశ్‌ గంజ్‌ పోలీస్‌ స్టేషన్‌ పరిధిలోని అక్షరాంపూర్‌ గ్రామంలో నందలాల్‌ సరోజ్‌కు చెందిన బర్రె కొన్ని రోజుల క్రితం తప్పిపోయింది. అది పొరుగునే ఉన్న పూరే హరికేశ్‌ గ్రామానికి చేరింది. ఆ ఊరికి చెందిన హనుమాన్‌ ఆ బర్రెను కట్టేశాడు. నందలాల్‌ ఎంత వెతికినా బర్రె ఆచూకీ దొరకలేదు. చివరికి హనుమాన్‌ వద్ద ఉన్నదని తెలిసి, అక్కడికి వెళ్లి అడగ్గా ఆ బర్రె తనదేనని వాదించాడు. దాంతో హనుమాన్‌ను నందలాల్‌ రెండు గ్రామాల పెద్దల సమక్షంలో పంచాయితీకి పిలిపించాడు.
పంచాయితీలో కూడా ఆ బర్రె తనదేనని హనుమాన్‌, నందలాల్‌ వాదులాడుకున్నారు. ఏం చేయాలో పాలుపోకపోవటంతో పెద్దమనుషుల సూచన మేరకు స్థానిక పోలీస్‌ స్టేషన్‌లో పరస్పరం ఫిర్యాదు చేసుకున్నారు. పోలీసులు కూడా ఇద్దరిని విచారించి బర్రె అసలు యజమాని ఎవరో తేల్చలేకపోయారు. చివరికి ఆ బర్రెను రెండు ఊళ్ల మధ్య విడిచిపెడుదామని, అది ఎవరి ఇంటికే చేరితే వారిదేనని పోలీసులు ప్రతిపాదన చేశారు. ఆ ప్రతిపాదన ఇద్దరూ అంగీకరించారు. దాంతో బర్రెను రెండు ఊళ్ల మధ్య వదిలేశారు.
ఆ బర్రె నేరుగా మహేశ్‌గంజ్‌ గ్రామంలోని నందలాల్‌ ఇంటికి వెళ్లింది. దాంతో పోలీసులు ఆ బర్రె నందలాల్‌దే అనే నిర్ధారణకు వచ్చారు. తప్పుడు కేసు పెట్టి తమ సమయం వృథా చేసినందుకు హనుమాన్‌ను గట్టిగా హెచ్చరించి వదిలేశారు. పంచాయితీ పెద్దలు కూడా హనుమాన్‌ను మందలించారు.