Hand Casting : వాళ్లిద్దరూ ప్రేమించుకుని పెళ్లి చేసుకున్నారు. వారి ప్రేమకు పెద్దలు ఒప్పుకోకపోయినా పెళ్లి చేసుకుని కాపురం పెట్టారు. చిలుకాగోరింకల్లా కలిసి జీవించారు. ఆ తర్వాత వారికి ఒక పాప జన్మించింది. అంతా సజావుగా సాగుతోంది అనుకున్న సమయంలో విధికి కన్నుకుట్టింది. కళకళలాడే ఆ ఇంటిని కళా విహీనం చేసింది. అనారోగ్యంతో ఆమె మరణించింది. భార్య మరణాన్ని జీర్ణించుకోలేక ఆ భర్త చేసిన పని అందరి హృదయాలను కదిలించింది.
వివరాల్లోకి వెళ్తే.. ఖమ్మం జిల్లా పెనుబల్లి మండలం ఎడ్ల బంజర గ్రామానికి చెందిన అశోక్ కన్న, పద్మశ్రీ 2006లో ప్రేమించుకుని పెళ్లి చేసుకున్నారు. అశోక్ ప్రైవేట్ కొలువు చేస్తూ సత్తుపల్లి పట్టణంలో స్థిరపడ్డాడు. వీరికి ఒక కుమార్తె కూడా ఉంది. అయితే ఆనందంగా సాగుతున్న అశోక్ కుటుంబంలో ఊహించని విషాదం చోటుచేసుకుంది. కొద్ది రోజులుగా అనారోగ్యంతో బాధపడుతున్న భార్య పద్మశ్రీ.. ఇటీవల విజయవాడలోని ఓ ఆస్పత్రిలో చికిత్స పొందుతూ మృతి చెందింది.
ప్రేమించి పెళ్లి చేసుకున్న తన భార్య ఆకస్మికంగా మరణించడంతో అశోక్ తట్టుకోలేకపోయాడు. భార్య గుర్తుగా తన చేయి, తన కూతురు చేయి, చనిపోయిన తన భార్య చేయి నమూనాలతో విజయవాడ నుంచి ప్రత్యేకంగా పిలిపించిన కాస్టింగ్ నిపుణుల చేత హ్యాండ్ కాస్టింగ్ తయారు చేయించాడు. ఆ హ్యాండ్ కాస్టింగ్‌ను ఆమె జ్ఞాపకంగా ఇంట్లో పెట్టుకున్నాడు. మరణించిన భార్యను మరువలేక ఆ భర్త పడుతున్న వేదనను చూసి బంధుమిత్రులు కూడా బాధపడుతున్నారు.