చాలామంది జ్వరంతో రెండు మూడు రోజులు ఇబ్బంది పడినా ఆసుపత్రికి వెళ్లడానికి ఇష్టపడరు. కారణం—ఇంజెక్షన్ భయం. “జ్వరం తగ్గిపోతుంది, ఇంజెక్షన్ ఎందుకు?” అని మొండిగా ఉంటారు. పిల్లలైతే ఇంజెక్షన్ అనగానే గుక్కపట్టి ఏడుస్తారు. ఈ భయాన్ని ట్రిపనోఫోబియా అంటారు. ప్రపంచవ్యాప్తంగా 50% పిల్లలు, 30% పెద్దలు ఈ సమస్యతో బాధపడుతున్నారు. ఇంజెక్షన్ భయంతో ఉన్నవారికి శుభవార్త! సూది లేని కొత్త ఇంజెక్షన్ త్వరలో అందుబాటులోకి రానుంది. ఇది నొప్పి లేకుండా, భయం లేని అనుభవాన్ని అందిస్తుంది.
‘ఇంటెగ్రి మెడికల్‌’ సంస్థ ఈ సూది రహిత ఇంజెక్షన్‌ను అభివృద్ధి చేసింది. బెంగళూరులో జరిగిన సమావేశంలో సంస్థ ప్రతినిధులు స్కాట్ మెక్‌ఫార్లాండ్, అంకుర్‌ నాయక్, సర్వేష్‌ ముతా, మార్క్‌టిమ్‌లు దీని వివరాలను వెల్లడించారు. ‘ఎన్‌-ఫిస్‌’ పేరుతో ఈ పరికరం అధిక వేగంతో ఔషధాన్ని చర్మంలోని సూక్ష్మ రంధ్రాల ద్వారా కండరాల్లోకి చొప్పిస్తుంది. ఇది నొప్పి లేకుండా ఔషధాన్ని సమర్థవంతంగా అందిస్తుంది.
ప్రస్తుతం దేశంలో వెయ్యికి పైగా వైద్యులు ఈ ఇంజెక్షన్‌ను ప్రయోగాత్మకంగా ఉపయోగిస్తున్నారు. సీరం ఇన్‌స్టిట్యూట్ ఆఫ్‌ ఇండియాతో ఒప్పందం కుదుర్చుకుని, ఈ సాంకేతికతను విస్తృతంగా అందుబాటులోకి తీసుకొస్తున్నట్లు ఇంటెగ్రి మెడికల్‌ తెలిపింది. ఇంజెక్షన్ భయంతో బాధపడేవారికి ఈ సమాచారం సంతోషాన్ని కలిగిస్తుంది. ఈ సూది రహిత సాంకేతికత ఆరోగ్య సంరక్షణలో కొత్త అధ్యాయాన్ని లిఖించనుంది.