KTR | ఈ మహా నగరానికి ఏమైంది..? రాజధాని సమస్యలపై కేటీఆర్ ట్వీట్‌

కాంగ్రెస్ ప్రభుత్వంపై విమర్శలు
మీరు తెస్తానన్న మార్పు ఇదేనా ? అని మండిపాటు

విధాత, హైదరాబాద్ : “ఈ నగరానికి ఏమైంది?” అని పత్రికల్లో ప్రధాన శీర్షికల్లో మొదటి పేజిలో వార్తలు వస్తున్నాయంటే నగరంలో శాంతి భద్రతలు పూర్తిగా అదుపుతప్పాయని అర్థమని, పరిపాలనా అనుభవం లేని నాయకత్వం ఎలా ఉంటుందో హైదరాబాదు నుంచి తెలంగాణ పల్లెటూరు వరకూ అంతటా కనిపిస్తోందని బీఆరెస్ వర్కింగ్ ప్రెసిడెంట్ కేటీఆర్ ట్విటర్ వేదికగా కాంగ్రెస్ ప్రభుత్వంపై విమర్శలు గుప్పించారు. “బ్రాండ్ హైదరాబాద్ష‌ ఎందుకు మసకబారుతోందని, విశ్వనగరంగా ఎదుగుతున్న వేళ.. ఎందుకింత కళ కోల్పోతోందని సగటు హైదరాబాదీకి కలుగుతున్న భావన ఇదని పేర్కోన్నారు.

హైదరాబాద్ ను ప్రేమించే ప్రతిఒక్కరిలో ఉన్న ఆవేదన ఇదన్నారు. పదేళ్ళు ప్రశాంతంగా ఉన్న నగరంలో పెరిగిపోతున్న వరుస హత్యలు.. పేట్రేగిపోతున్న అంతరాష్ట్ర ముఠాలతో రాజధాని హైదరాబాద్‌లో శాంతిలేదన్నారు. నగర ప్రజల జీవితాలకు భద్రత లేదని, సీఎం స్వయంగా పోలీసు కమాండ్ కంట్రోల్ సెంటర్‌కు వస్తున్నప్పటికి పోలీసింగ్‌పై కమాండ్ ఏదని, క్షీణిస్తున్న శాంతిభద్రతలపై కంట్రోల్ ఏదని కేటీఆర్ ప్రశ్నించారు.

ఓవైపు కుప్పకూలిన రియల్ ఎస్టేట్ రంగం పరిపాలనా వైఫల్యాన్ని వేలెత్తి చూపుతోందని, మరోవైపు పడగవిప్పిన హత్యల సంస్కృతి ప్రతి కుటుంబంలో వణుకు పుట్టిస్తోందన్నారు. ఇంకోవైపు తరలిపోతున్న పెట్టుబడుల పర్వం యువత ఉపాధి అవకాశాల్ని దెబ్బతీస్తోందని ఆందోళన వ్యక్తం చేశారు. కాంగ్రెస్ పవర్ లోకి రాగానే గడియ గడియకు పవర్ కట్‌లు సాగుతున్నాయని, సేఫ్ సిటీగా ఉన్న మహానగరంలో..ఎందుకు పెరుగుతోంది.. క్రైం రేట్ అని, ఇదేనా మీరు తెస్తానన్న మార్పు అని కేటీఆర్ నిలదీశారు. విశ్వనగరంగా తీర్చిదిద్దడానికి.. పదేళ్లు కష్టపడి పునాదులు వేస్తే.. అధికారంలోకి రాగానే ఆగం చేస్తే ఎలా అని విమర్శించారు.

ప్రపంచంతో పోటీపడే నగరంగా ఎదుగుతున్న హైదరాబాద్ ప్రగతికి అర్ధాంతరంగా బ్రేకులు వేస్తే ఎలా అని ప్రశ్నించారు. దేశ రాజధాని చుట్టూ రాజకీయ చక్కర్లు కొట్టడంపై ఉన్న శ్రద్ధ చిక్కుల్లో కొట్టుమిట్టాడుతున్న రాష్ట్ర రాజధానిపై లేకపోతే ఎలా అని దుయ్యబట్టారు. హైదరాబాద్ అంటే.. కేవలం రాజధాని కాదని “తెలంగాణ ఎకనమిక్ ఇంజన్ అని పేర్కోన్నారు. ఇకనైనా కాంగ్రెస్ సర్కారు మేల్కొనకపోతే మన హైదరాబాద్ దెబ్బతింటే రాష్ట్రానికే కష్టం కాకుండా యావత్ దేశానికి కూడా నష్టమని కేటీఆర్ తన ట్వీట్‌లో రాసుకొచ్చారు.