మనం సాధారణంగా నారింజ పండ్లను తిని, వాటి తొక్కలను పనికిరాని చెత్తగా భావించి పారేస్తుంటాం. కానీ, నిజానికి ఈ నారింజ తొక్కలు ఆరోగ్యం, సౌందర్యానికి సంబంధించి ఒక అపురూపమైన నిధి.
వీటిలో విటమిన్-సి, ఫైబర్, యాంటీ ఆక్సిడెంట్లు, ప్రకృతి సిద్ధమైన నూనెలు పుష్కలంగా ఉంటాయి. మన అమ్మమ్మలు, నానమ్మలు ఈ తొక్కలను ఎండబెట్టి రకరకాల ఇంటి చిట్కాలలో వాడేవారు.
వీటిలో ఉండే విటమిన్-సి, ఫ్లేవనాయిడ్లు శరీర రోగనిరోధక శక్తిని పటిష్టం చేస్తాయి. మారుతున్న వాతావరణం వల్ల వచ్చే జలుబు, దగ్గు వైరల్ ఇన్ఫెక్షన్ల నుంచి రక్షణ పొందడానికి
నారింజ తొక్కలతో చేసిన టీ లేదా కషాయం అద్భుతంగా పనిచేస్తుంది. ఇవి సహజ సిద్ధమైన ఔషధంగా శరీరానికి రక్షణ కవచంలా నిలుస్తాయి.
నారింజ తొక్కల్లో పీచు పదార్థం అధికంగా ఉంటుంది.
ఇది మలబద్ధకం, గ్యాస్, అజీర్తి వంటి సమస్యలను నివారిస్తుంది. పేగుల ఆరోగ్యాన్ని మెరుగుపరుస్తూ జీర్ణవ్యవస్థను క్లీన్ చేస్తుంది. అదేవిధంగా, గుండె ఆరోగ్యానికి ఇవి ఎంతో మేలు చేస్తాయి.
ఇవి శరీరంలోని చెడు కొలెస్ట్రాల్ ను తగ్గించి, మంచి కొలెస్ట్రాల్ను పెంచడంలో సహాయపడతాయి. దీనివల్ల రక్తపోటు నియంత్రణలో ఉండి, గుండెపోటు ముప్పు తగ్గుతుంది.
శ్వాసకోశ సంబంధిత సమస్యలతో బాధపడేవారికి నారింజ తొక్కలు గొప్ప ఊరటనిస్తాయి. వీటిలో ఉండే హిస్టామైన్ నిరోధక లక్షణాలు తుమ్ములు, దురద వంటి అలెర్జీ లక్షణాలను తగ్గిస్తాయి.
అంతేకాకుండా, మెటబాలిజం రేటును పెంచడం ద్వారా శరీరంలో కొవ్వు పేరుకుపోకుండా చూస్తాయి, తద్వారా బరువు తగ్గాలనుకునే వారికి ఇవి మంచి ఆహారంగా ఉపయోగపడతాయి.