‘4 టేల్స్’ – 4 స్టోరీస్, 4 ఎమోషన్స్, 4 సండేస్ అనే డిఫరెంట్ కాన్సెప్ట్ తో ఒక వైవిధ్యమైన ఆంథాలజీ సీరీస్ ని మన ముందుకు తీసుకొచ్చింది ప్రముఖ తెలుగు ఓటీటీ సంస్థ ఈటీవీ విన్. సినిమా రంగంలో కొత్తవారిని ప్రోత్సహించాలనే ఉద్దేశంతో వాళ్ళు చేపట్టిన ‘కథా సుధ’లో భాగంగా ఈ వారం ‘4 టేల్స్’ లోని మొదటి కథ ‘ది మాస్క్’ ని ప్రీమియర్ చేయడం జరిగింది. అయితే ‘4 టేల్స్’ చిత్ర ట్రైలర్ ని దిగ్గజ దర్శకులు ఆర్జీవీ, హరీష్ శంకర్, ప్రముఖ మ్యూజిక్ డైరక్టర్ జి.వి.ప్రకాష్ లాంచ్ చేయడం విశేషం.
కథ విష‌యానికి వ‌స్తే.. ఈజీ మనీ కోసం క్రికెట్ బెట్టింగ్ లో డబ్బులు పోగొట్టుకుని అప్పులపాలైన ఒక యువకుడు, ఆ డబ్బుని తిరిగి చెల్లించడానికి ఒక ఇంట్లో దొంగతనానికి వెళ్లి ఎటువంటి ఆపదలో చిక్కుకున్నాడు, ఎలాంటి పరిస్థితుల్ని ఫేస్ చేసాడనేది ఈ చిత్ర కథాంశం. ఇంత చిన్న కథాంశంలో సస్పెన్స్, డ్రామా, డార్క్ హ్యూమర్ ని మిళితం చేసి దర్శకుడు బుల్లి తెరమీదే ఒక సినిమాటిక్ ఎక్స్పీరియన్స్ ని ఆవిష్కరించిన తీరు అద్భుతం.
‘నరుడి బ్రతుకు నటన’ చిత్రానికి దర్శకత్వం వహించిన రిషికేశ్వర్ యోగి సమర్పణలో, ‘కథా గని పిక్చర్స్’ బ్యానర్ పై కొత్తపల్లి సురేష్ దర్శకత్వం వహించి, నిర్మించిన ‘ది మాస్క్’ ఈ ఆదివారం(12-10-2025) నుండే ఈటీవీ విన్ యాప్ లో స్ట్రీమ్ అవుతూ ఉంది. ఈ చిత్రంలో ప్రధాన పాత్రధారులుగా రావన్ నిట్టూరి, గడ్డం శ్రీనివాస్ లు నటించారు.
ఇందులో కొత్తపల్లి సురేష్ తీసుకున్న పాయింట్, దాన్ని ప్రేక్షకులకు కనెక్ట్ అయ్యేలా మలచిన తీరు అద్భుతం అనే చెప్పుకోవాలి. ఈ చిత్రానికి ఛాయా గ్రహణం: అక్షయ్ వసూరి, సంగీతం: విశాల్ భరద్వాజ్, ఎడిటింగ్: రిషికేశ్వర్ యోగి, సహా నిర్మాతలు: బేబీ విరాన్ష, దీపిక అలోల, ఎక్షిగ్యూటివ్ ప్రొడ్యూసర్: ద్రువ్ చిత్రణ్.