Mithra Mandali Review | A ‘Jathi Ratnalu’-style Comedy That Misses the Mark
(వినోదం డెస్క్)
బన్నీవాస్ సమర్పణలో రూపొందిన హాస్య ప్రధాన చిత్రం ‘మిత్రమండలి’ (Mithra Mandali) గురువారం ప్రేక్షకుల ముందుకు వచ్చింది. ప్రముఖ నటుడు ప్రియదర్శి, సోషల్ మీడియా స్టార్ నిహారిక ఎన్‌ఎం ప్రధాన పాత్రల్లో నటించిన ఈ చిత్రం, విడుదలకు ముందు నుంచే పాజిటివ్ బజ్ సృష్టించింది. మరో ‘జాతిరత్నాలు’ అవుతుందని టీమ్ చాలా ధీమాగా ఉంది మరి. అయితే విడుదల అనంతరం ప్రేక్షకుల అంచనాలను అందుకుందా? చూద్దాం..
ముందుగా కథేంటో చూద్దాం
జంగ్లీపట్నానికి చెందిన నారాయణ (వీటీవీ గణేశ్)కు కుల పిచ్చి ఎక్కువ. తను కుల బలం ఆధారంగా ఎమ్మెల్యే కావాలని కోరుకుంటాడు. కానీ అదే సమయంలో తన కూతురు స్వేచ్ఛ (నిహారిక ఎన్‌ఎం) ఇంటి నుంచి పారిపోవడం అతని జీవితంలో పెను సంచలనం సృష్టిస్తుంది. స్వేచ్ఛ కనిపించకపోవడంతో నారాయణ ఎస్‌ఐ సాగర్ (వెన్నెల కిశోర్) సహాయంతో వెతకడం మొదలుపెడతాడు. విచారణలో చైతన్య (ప్రియదర్శి), అభయ్ (రాగ్ మయూర్), సాత్విక్ (విష్ణు ఓయి), రాజీవ్ (ప్రసాద్ బెహరా) అనే నలుగురు పోకిరీ యువకులు ఈ వ్యవహారంలో ఉన్నట్లు తేలుతుంది. వీళ్ల వల్లే స్వేచ్ఛ మాయం అయ్యిందా? లేక ఎవరితోనైనా ప్రేమలో పడిందా? ఇదే కథ ప్రధానాంశం.
విశ్లేషణ
‘మిత్రమండలి’ పూర్తిగా హాస్యంపై ఆధారపడి నడిచే సినిమా. కథలో పెద్దగా బలం లేకపోయినా కొన్ని సన్నివేశాలు ప్రేక్షకులను నవ్విస్తాయి. ముఖ్యంగా సత్య పోషించిన “ఇంపార్టెంట్ క్యారెక్టర్” పాత్ర సినిమాకు హైలైట్‌గా నిలిచింది. ఆయన ఎంట్రీ ప్రతి సారి థియేటర్లో నవ్వులు పూయిస్తుంది.
ప్రియదర్శి సహజమైన నటనతో ఆకట్టుకుంటాడు. రాగ్ మయూర్, విష్ణు ఓయి, ప్రసాద్ బెహరా తమదైన టైమింగ్‌తో నవ్వించే ప్రయత్నం చేశారు. నిహారిక ఎన్‌ఎం ఈ చిత్రంతో హీరోయిన్‌గా మంచి ఇంప్రెషన్ ఇచ్చింది.
బలహీనతలు
రెండో భాగంలో కథ తడబాటు స్పష్టంగా కనిపిస్తుంది. కామెడీ సన్నివేశాలు ఎక్కడా అతికినట్లుగా ఉండవు. ఎడిటింగ్ సరిగా లేకపోవడంతో సినిమా సాగదీసినట్లు అనిపిస్తుంది. కామెడీ సన్నివేశాలు కొన్ని బాగున్నప్పటికీ మొత్తం కథనాన్ని కట్టిపడేయడానికి సరిపోయేంత విషయం లేదు.
సాంకేతికంగా
ఆర్‌.ఆర్‌. ధ్రువన్ సంగీతం బాగుంది. పాటలు, బ్యాక్‌గ్రౌండ్ స్కోర్ సినిమాకు జోష్‌ తీసుకువచ్చాయి. సినిమాటోగ్రఫీ, ప్రొడక్షన్ విలువలు సాధారణ స్థాయిలో ఉన్నాయి. దర్శకుడు విజయేందర్ ఎస్‌ కథ, స్క్రీన్‌ప్లే విషయంలో ఇంకాస్త శ్రద్ధ పెట్టి ఉంటే సినిమా మరింత మెరుగ్గా ఉండేది.
‘మిత్రమండలి’ మొత్తం మీద ఒక సిల్లీ కామెడీ డ్రామా. కొన్ని సన్నివేశాలు వినోదాన్ని పంచినా, కథనంలో బలహీనత కారణంగా సినిమా దారితప్పింది. సత్య నటన, కొన్ని సన్నివేశాలు, సంగీతం మాత్రమే సినిమా ప్లస్ పాయింట్స్. కామెడీ సినిమాలను ఇష్టపడే ప్రేక్షకులకు ఒకసారి చూసేయదగ్గ సినిమా కానీ పెద్దగా అంచనాలతో వెళ్లరాదు. జాతిరత్నాలు రేంజ్లో ఆశిస్తే నిరాశ తప్పదు.
విధాత రేటింగ్‌ : ⭐ 2.75 / 5
Summary: Mithra Mandali is a small-budget Telugu comedy starring Priyadarshi and Niharika NM. The film has a few entertaining moments and standout comedy from Satya, but suffers from a weak screenplay and inconsistent pacing. RR Dhruvan’s music is good, while technical aspects remain average. Watchable for comedy lovers, but overall underwhelming.