విధాత: రైస్ టీ అనే మాట వినగానే ఏంటీ రైస్‌తో టీనా? అని ఆశ్చర్యంగా అనిపిస్తోంది కదు. కానీ ఇది ఆరోగ్యానికి చాలా మేలు చేసే పానీయం. ఎన్నో అరోగ్యవంతమైన గుణాలున్న ఈ టీ గురించిన కొన్ని వివరాలు..
రైస్ టీ అంటే?
రైస్ టీ అంటే పలుచగా, ట్రాన్స్పరెంట్ గా కనిపంచే ద్రవపదార్థం. దీన్ని నార్త్ ఈస్ట్ రాష్ట్రాల్లో పండే బ్లాక్ రైస్, రెడ్ రైస్ తో తయారు చేస్తారు. మేఘాలయలో దీన్ని షా-కూ అని అంటారు. షా అంటే చాయ్ అని కూ అంటే బియ్యం అని అర్థం. జపనీయులు కూడా ఈ టీ తాగుతారు. వాళ్లు దీని తయారీకి బ్రౌన్ రైస్ వాడుతారు. జెన్మాయిషా అని అంటారు. వేయించిన బ్రౌన్ రైస్ తోపాటు దీని తయారీలో గ్రీన్ టీని కూడా ఉపయోగిస్తారు.
ఢిల్లీ కి చెందిన నార్త్ ఈస్ట్ వంటల నిపుణురాలు స్నేహలత సాయికియా ఈ టీ వివరాలను సోషల్ మీడియా ద్వారా పంచుకున్నారు. ఆ వివరాలు ఇక్కడ మీకోసం అందిస్తున్నాము. ‘‘అస్సాంలో మేము విందు భోజనం తర్వాత ’షా’ అనే ఈ రైస్ టీని వడ్డిస్తాము. ఇది జీర్ణవ్యవస్థను సౌకర్యవంతంగా ఉంచుతుంది. నేను ఈ రైస్ టీ తయారీ విధానాన్ని ఒక మిజో లేడి దగ్గర నేర్చుకున్నాను. దీన్ని మొదటిసారి నాగాలాండ్ లో రుచి చూశాను. ఆ తర్వాత నేను దీన్ని అందరికీ పరిచయం చెయ్యాలని అనుకున్నాను’’ అని అన్నారు.
రైస్ టీ చరిత్ర
నిపుణుల అంచనా ప్రకారం బ్రిటీష్ వారు టీని ఇక్కడ పరిచయం చేసే వరకు కూడా షిల్లాంగ్ కు దక్షిణం వైపు 94 కిలోమీటర్ల దూరంలో ఉన్న లాస్కిన్ బ్లాక్ లోని గ్రామాలలో షా-కూ చాలా ప్రాచూర్యంలో ఉండేదట. నెమ్మదిగా అక్కడి నుంచి వలసలు పెరిగిపోయిన తర్వాత ఈ రైస్ టీ పట్టణాలకు కూడా విస్తరించింది. తాగిన వారి అనుభవాలను పరిగణనలోకి తీసుకున్నపుడు చాలా మంది ఇది రుచిలో కొంత టీ లాగా కొంత బ్లాక్ కాఫీలా ఉంది అని అన్నారు.
ఎలా చేస్తారు?
స్నేహ చెప్పిన దాన్ని బట్టి నాలుగు కప్పుల రైస్ టీ కోసం 1 టేబుల్ స్పూన్ స్టిక్కీగా ఉండే బ్లాక్ రైస్ లేదా రెడ్ రైస్ ను 2-3 నుంచి మూడు నిమిషాల పాటు వేయించాలి. తర్వాత ఇందులో 3-4 కప్పుల నీటిని పోసి 3-5 నిమిషాల పాటు చిన్న మంట మీద ఉడికించాలి. తర్వాత వడ కట్టి వేడిగా వడ్డించడమే. జపాన్, కొరియా వారు దీనికి కొద్దిగా ఆర్గానిక్ టీని కలుపుతారు. విందు భోజనం తర్వాత జీర్ణక్రియ సజావుగా సాగేందుకు, ఇబ్బంది లేకుండా ఉండేందుకు ఈ పానీయం దోహదం చేస్తుందని స్నేహ వివరించారు.
మాములుగా రైస్ లో చెక్కెర వెయ్యరు కానీ మరింత రుచి జోడించేందుకు కొందరు చక్కెర కూడా కలుపుకుంటారు. విందుల్లో తాను డిజర్ట్ గా లేదా భోజనం తర్వాత అందించే పానీయంగా ఇస్తానని స్నేహ చెబుతున్నారు. విందు తర్వాత ఈ పానీయం తీసుకుంటే హుషారుగా ఉంటుందట.
పోషక భరితం
ఈ టీ లో ఫ్లెవనాయిడ్స్, ఆంటీ ఆక్సిడెంట్స్, మినరల్స్, విటమిన్స్ పుష్కలం. దీనికి హ్యాండ్ రోల్డ్ గ్రీన్ టీ కూడా కలిపి ఇవ్వడం వల్ల మరింత పోషక భరితం చెయ్యవచ్చని న్యూట్రీషన్ నిపుణులు అంటున్నారు. ఓహియోలోని క్లీవ్ ల్యాండ్ లోని కేస్ వెస్ట్రన్ రిజర్వ్ యూనివర్సిటీ నిర్వహించిన అధ్య‌యనాల ప్రకారం గ్రీన్ టీలోని పాలీఫెనాల్స్ కాన్సర్ కణాల పెరుగుదలను నివారిస్తాయి. అంతే కాదు ఇందులోని సెలీనియం థైరాయిడ్ పనితీరును సమతులంగా ఉంచుతుంది. జీవక్రియలు కూడా నియంత్రణలో ఉంటాయి.
బియ్యం చర్మానికి మేలు చేస్తాయి. చర్మం మృదువుగా ఉండేందుకు , ముడుతలు రాకుండా నివారించేందుకు దోహదం చేస్తుందట. అమృతం వంటి ఈ టీ రోజులో ఎన్నిసార్లయినా తాగొచ్చు అని చెబుతూ ముగించారు.