విధాత: యాదగిరిగుట్ట దేవస్థానం అనుబంధ ఆలయం పాత గుట్ట శ్రీ లక్ష్మీనరసింహస్వామి దేవస్థానం వార్షిక బ్రహ్మోత్సవాలు మంగళవారం ఉదయం స్వస్తి వాచనం, రక్షాబంధనం, పుణ్యాహవాచనంతో ప్రారంభమయ్యాయి. సాయంత్రం అంకురారోపణం, మృత్సంగ్రహణం నిర్వహించారు. ఫిబ్రవరి 6వ తేదీ వరకు ఏడు రోజులపాటు కొనసాగే బ్రహ్మోత్సవాల్లో వేద పండితులు పాంచరాత్రాగమ శాస్త్రానుసారం లక్ష్మీనరసింహుడికి విశేష వాహన, అలంకార సేవలు నిర్వహిస్తారు.
ఫిబ్రవరి ఒకటో తేదీ బుధవారం ఉదయం 10 గంటలకు ధ్వజారోహణం, వేద పారాయణాలు, సాయంత్రం 6 గంటలకు భేరిపూజ, దేవతాహ్వానం, రెండో తేదీన గురువారం ఉదయం 6 గంటలకు హవనం, సింహ వాహనం అలంకార సేవ, ఆరు గంటలకు హవనం, ఎనిమిది గంటలకు ఎదుర్కోలు ఉత్సవం, అశ్వవాహన సేవ, మూడవ తేదీ శుక్రవారం ఉదయం 8 గంటలకు హవనం, తిరుమంజస ఉత్సవం, హనుమంత వాహన సేవ, సాయంత్రం 6 గంటలకు హవనం, రాత్రి 7 గంటలకు శ్రీవారి తిరుకళ్యాణోత్సవం, గజవాహన సేవ.
నాలుగో తేదీ శనివారం 8 గంటలకు హవనం, గరుడ వాహన సేవ, సాయంత్రం 6 గంటలకు రథంగా హోమం, రాత్రి 8 గంటలకు శ్రీవారి దివ్య విమాన రథోత్సవం, ఐదవ తేదీ ఆదివారం ఉదయం 10 గంటలకు పూర్ణాహుతి, మధ్యాహ్నం 12 గంటలకు చక్రతీర్థం, సాయంత్రం 6 గంటలకు దేవతో ద్వాసన, శ్రీ పుష్పయాగం, డోలారోహణం, ఆరవ తేదీ సోమవారం ఉదయం 10 గంటలకు స్వామివారి అష్టోత్తర శతఘటాభిషేకం, మధ్యాహ్నం 1గంటలకు మహాదాశీర్వచనం, పండిత సన్మానంతో బ్రహ్మోత్సవాలు ముగియనున్నాయి.