Harish Rao:
విధాత: అధికారంలోకి వచ్చి ఏడాదిన్నర అవుతున్నా ఇంకెన్నాళ్లు అప్పుల పేరు చెప్పి తప్పించుకు తిరుగుతారని మాజీ మంత్రి హరీశ్ రావు (Harish Rao) సీఎం రేవంత్ రెడ్డిని ప్రశ్నించారు. క అబద్ధాన్ని వంద సార్లు చెప్పినంత మాత్రాన అది నిజం అయిపోదన్నారు. ఢిల్లీలో ఇండియా టుడే కాంక్లేవ్ లో సీఎం రేవంత్ రెడ్డి తెలంగాణ రాష్ట్ర అప్పులపై మరోసారి తప్పుడు లెక్కలే వల్లే వేశారని హరీష్ రావు విమర్శించారు.
తెలంగాణ అప్పు రూ.7 లక్షల కోట్లు అని మీరు చేస్తున్న ప్రచారం శుద్ధ తప్పు అని అనేక సార్లు చెప్పానన్నారు. రాష్ట్ర అప్పు రూ. 4.17 లక్షల కోట్లు మాత్రమేనని అసెంబ్లీ వేదికగా ఆధారాలతో సభ్యులకు, రాష్ట్ర ప్రజలకు వివరించానని గుర్తు చేశారు.
అయినా మీరు ముఖ్యమంత్రి హోదాలో ఉండి మళ్ళీ అదే అబద్ధాన్ని చెబుతూ బీఆర్ఎస్ పాలనపై దుష్ప్ర‌చారం చేస్తున్నారంటూ సీఎం రేవంత్ రెడ్డిపై హరీష్ రావు మండిపడ్డారు. దివ్యంగా ఉన్న రాష్ట్రం, దివాలా తీసిందని పరపతి, ప్రతిష్ట దిగజార్చుతున్నారని.. అప్పులపై రేవంత్ రెడ్డి అబద్ధాలను, అవాస్తవాలను తీవ్రంగా ఖండిస్తున్నామని హరీష్ రావు స్పష్టం చేశారు.