జర్మనీలో నర్సింగ్ ఉద్యోగాలకు దరఖాస్తులు

– జిల్లా ఉపాధి అధికారి తిరుపతి రావు

విధాత ప్రతినిధి, పెద్దపల్లి: జర్మనీలో నర్సింగ్ సిబ్బందిగా పని చేయడానికి ఆసక్తి, అర్హత గల వారు తమ రెజ్యూమ్ ను డిసెంబర్ 15లోగా tomcom.germany@gmail.com మెయిల్ ఐడీకి పంపాలని జిల్లా ఉపాధి అధికారి వై తిరుపతి రావు సోమవారం ఒక ప్రకటనలో తెలిపారు. తెలంగాణ ఓవర్సీస్ మ్యాన్ పవర్ కంపెనీ లిమిటెడ్ ద్వారా శిక్షణతో పాటు నియామకం కోసం ప్రత్యేకకార్యక్రమం అమలు చేస్తున్నదన్నారు. జర్మనీలో ఆరోగ్య సంరక్షణ కార్మికులకు ముఖ్యంగా నర్సులకు అధిక డిమాండ్ ఉన్నందున, టామ్ కామ్ ఇప్పుడు జర్మనీలో చదువుకోవడానికి, నర్సింగ్ లో 3 సంవత్సరాల ఇంటర్నేషనల్ డిగ్రీ పొందేందుకు అవకాశం కల్పించిందని తెలిపారు.

డిగ్రీ తరువాత నెలకు రూ.2 లక్షల నుంచి 3 లక్షల వరకు ఆకర్షణీయమైన జీతం ప్యాకేజీతో ఉద్యోగం హామీ లభిస్తుందని పేర్కొన్నారు. 3 సంవత్సరాల పాటు నెలకు రూ.లక్ష స్టైఫండ్ లభిస్తుందని తెలిపారు. కనీసం 60 శాతం మార్కులతో ఇంటర్మీడియట్ ఉత్తీర్ణత సాధించి 18 నుంచి 28 సంవత్సరాల వయస్సు ఉన్న అభ్యర్థులు అర్హులని తెలిపారు. ఎంపిక చేయబడిన అభ్యర్థులకు జర్మనీ భాషపై హైదరాబాద్ లో రెసిడెన్షియల్ శిక్షణ 6 నెలల పాటు అందిస్తమన్నారు. ఇతర వివరాల కోసం సెల్ నెంబర్ 6302292450/7901290580లో సంప్రదించాలని, మరిన్ని వివరాల కోసం www.tomcom.telangana.gov.in సందర్శించాలని తెలిపారు.