Tollywood Stars | తెలుగు చలనచిత్ర పరిశ్రమకు 2025 సంవత్సరం బాక్సాఫీస్ విజయాలతోనే కాదు, వ్యక్తిగత జీవితాల్లో వచ్చిన మధురమైన మార్పులతో కూడా చిరస్మరణీయంగా నిలిచింది. షూటింగ్స్, ప్రమోషన్స్తో బిజీగా ఉండే టాలీవుడ్ స్టార్స్ ఈ ఏడాది ‘అమ్మ’, ‘నాన్న’ అనే పిలుపులోని తీపిని అనుభవించారు. ముఖ్యంగా మెగా కుటుంబంలో మరో చిన్నారి రాకతో సందడి నెలకొనగా, పలువురు యంగ్ హీరోలు కూడా తండ్రి, తల్లి బాధ్యతలు స్వీకరించారు. మెగా ప్రిన్స్ వరుణ్ తేజ్ – లావణ్య త్రిపాఠి జంట 2025లో పండంటి మగబిడ్డకు జన్మనివ్వడంతో మెగా ఫ్యామిలీలో పండగ వాతావరణం నెలకొంది. అక్టోబర్లో జరిగిన బారసాల వేడుకలో తమ కుమారుడికి ‘వాయువ్ తేజ్’ అని పేరు పెట్టిన వీడియో సోషల్ మీడియాలో వైరల్గా మారింది.
లావణ్య తన ప్రెగ్నెన్సీ సమయంలో అభిమానులతో ఎంతో ఓపెన్గా క్షణాలను పంచుకోగా, చిన్నారి రాకతో తమ జీవితం సంపూర్ణమైందని వరుణ్ తేజ్ భావోద్వేగంగా వెల్లడించారు. మరోవైపు లవర్ బాయ్ నితిన్ – షాలిని దంపతులకు కూడా ఈ ఏడాది పండంటి మగబిడ్డ జన్మించాడు. 2020లో వివాహం చేసుకున్న ఈ జంట, ఐదేళ్ల తర్వాత తమ వారసుడిని స్వాగతించడంతో ఆనందానికి అవధులు లేవని నితిన్ సోషల్ మీడియా ద్వారా తెలిపారు. సినిమాలతో బిజీగా ఉన్నప్పటికీ, తన కుమారుడితో గడిపే క్షణాలకు నితిన్ ప్రత్యేక ప్రాధాన్యం ఇస్తున్నాడు. ఇక యంగ్ అండ్ టాలెంటెడ్ హీరో శర్వానంద్-రక్షితా రెడ్డి దంపతులకు ఈ ఏడాది ఆడబిడ్డ జన్మించగా, ఆమెకు ‘లీలా దేవి’ అని నామకరణం చేశారు. కుమార్తె రాకను లక్ష్మీదేవి వచ్చినట్లుగా భావిస్తున్నామని శర్వానంద్ సంతోషం వ్యక్తం చేయగా, తండ్రిగా మారిన తర్వాత ఆయనలో వచ్చిన పరిణతి అభిమానులకు స్పష్టంగా కనిపిస్తోందన్న అభిప్రాయం వినిపిస్తోంది.
కేవలం హీరోలే కాకుండా టాలీవుడ్కు చెందిన పలువురు దర్శకులు, టెక్నీషియన్లు కూడా ఈ ఏడాది పేరెంట్హుడ్ను ఆస్వాదిస్తున్నారు. కొందరు స్టార్స్ తమ ప్రైవసీకి ప్రాధాన్యం ఇస్తూ చిన్నారుల ఫోటోలను బయట పెట్టకపోయినా, కుటుంబాల్లో మాత్రం సంబరాలు అంబరాన్నంటుతున్నాయి. మొత్తంగా 2025 సంవత్సరం టాలీవుడ్ సెలబ్రిటీలకు కెరీర్కే కాదు, జీవితానికే కొత్త అర్థం చెప్పిన ఏడాదిగా నిలిచింది. స్టార్డమ్కు మించిన బాధ్యతను స్వీకరిస్తూ, తమ చిన్నారుల భవిష్యత్తు కోసం వారు వేస్తున్న అడుగులు అభిమానులకు నిజంగా స్ఫూర్తినిస్తున్నాయి.