నేను పార్టీ మారడం లేదు: డీకే అరుణ

విధాత : తన పార్టీ మార్పుపై మీడియాలో వస్తున్న కథనాలపై బీజేపీ జాతీయ ఉపాధ్యక్షురాలు డీకే అరుణ తీవ్రంగా మండిపడ్డారు. కాంగ్రెస్ పార్టీలో చేరబోతున్నట్లు వస్తున్న వార్తలను గురువారం డీకే అరుణ పత్రికా ప్రకటనలో తీవ్రంగా ఖండించారు. తాను కాంగ్రెస్ పార్టీలో చేరే ప్రసక్తే లేదని స్పష్టం చేశారు. బీజేపీ జాతీయ నాయకత్వం తనను గుర్తించి జాతీయ ఉపాధ్యక్ష పదవి ఇచ్చిందని, మోడీ నాయకత్వంలో పని చేయడానికి అదృష్టం ఉండాలన్నారు. కాంగ్రెస్ పార్టీ నాయకులు కావాలని మైండ్ గేమ్ ఆడుతున్నారని మండిపడ్డారు. మీడియా కూడా కనీసం తన స్పందన తీసుకోకుండా పార్టీ మారుతున్నానంటూ దుష్ప్రచారంతో కూడిన వార్తా కథనాలు రాయడం సరైంది కాదన్నారు. నా రాజకీయ భవిష్యత్‌ను నిర్ణయించాల్సిన హక్కు మీడియాకు ఎవరు ఇచ్చారంటూ ఆమె మీడియా సంస్థలను ప్రశ్నించారు. ఈ రకమైన కథనాలను ఆపాలని కోరారు. పార్టీ మారుతున్నానంటూ దుష్ప్రచారం చేసిన మీడియా సంస్థలపై పరువు నష్టం దావా వేస్తానని డీకే అరుణ హెచ్చరించారు.