Chiranjeevi | టాలీవుడ్ మెగాస్టార్ చిరంజీవి హీరోగా నటించిన తాజా ఫ్యామిలీ కామెడీ ఎంటర్టైనర్ ‘మన శంకర వరప్రసాద్ గారు’ బాక్సాఫీస్ వద్ద దూసుకెళ్తోంది. సంక్రాంతి కానుకగా విడుదలైన ఈ చిత్రం ప్రేక్షకుల ఆదరణతో పాటు వసూళ్ల పరంగానూ సరికొత్త రికార్డులు సృష్టిస్తోంది. హ్యూమర్, ఎమోషన్, ఫ్యామిలీ డ్రామాను సమపాళ్లలో మేళవించిన ఈ సినిమా ఇప్పుడు ఇండస్ట్రీ హాట్ టాపిక్గా మారింది.
ఇండియాలో రూ.200 కోట్లకు పైగా నెట్ వసూళ్లు
జనవరి 12, 2026న థియేటర్లలోకి వచ్చిన ‘మన శంకర వరప్రసాద్ గారు’ సినిమా విడుదలైనప్పటి నుంచి వసూళ్ల పరంగా ఎలాంటి బ్రేక్ లేకుండా కొనసాగుతోంది. ట్రేడ్ వర్గాల సమాచారం ప్రకారం, ఈ చిత్రం భారతదేశంలోనే రూ.200.69 కోట్ల నెట్ కలెక్షన్లు సాధించి మరో మైలురాయిని అందుకుంది. సంక్రాంతి 2026 బిగ్గెస్ట్ విన్నర్గా ఈ సినిమా నిలిచిందని విశ్లేషకులు చెబుతున్నారు.
వరల్డ్వైడ్ కలెక్షన్లలోనూ జోరు
దేశీయ మార్కెట్తో పాటు విదేశాల్లోనూ ఈ సినిమా ప్రభావం స్పష్టంగా కనిపిస్తోంది. ఇప్పటికే ప్రపంచవ్యాప్తంగా రూ.350 కోట్లకు పైగా గ్రాస్ కలెక్షన్లు సాధించినట్టు చిత్ర యూనిట్ అధికారికంగా ప్రకటించింది. ఓవర్సీస్ మార్కెట్లో ఈ మూవీ 4.5 మిలియన్ డాలర్లకు పైగా వసూళ్లు రాబట్టి, చిరంజీవి మార్కెట్కు మరోసారి బలమైన స్టాంప్ వేసింది.
చిరంజీవి పాడిన ‘పెద్దిరెడ్డి’ సాంగ్ రిలీజ్
‘మన శంకర వరప్రసాద్ గారు’ సినిమాలో ప్రత్యేక ఆకర్షణగా నిలిచిన పెద్దిరెడ్డి పాట ఇప్పుడు సోషల్ మీడియాలో ట్రెండింగ్లో ఉంది. మామను సరదాగా టీజ్ చేసే కాన్సెప్ట్తో రూపొందిన ఈ పాటను స్వయంగా చిరంజీవి పాడటం అభిమానులకు స్పెషల్ ట్రీట్గా మారింది. తాజాగా మేకర్స్ ఈ పాటకు సంబంధించిన వీడియో సాంగ్ను విడుదల చేయగా, అది క్షణాల్లోనే వైరల్ అయింది. మెగాస్టార్ ఎనర్జీ, అనిల్ రావిపూడి స్టైల్ హ్యూమర్ కలిసి ఈ పాటను మరింత పాపులర్ చేస్తున్నాయి.
అనిల్ రావిపూడి మార్క్ ఎంటర్టైన్మెంట్
బ్లాక్బస్టర్ దర్శకుడు అనిల్ రావిపూడి దర్శకత్వంలో తెరకెక్కిన ఈ చిత్రం ఆయన ఖాతాలో మరో సూపర్ హిట్గా చేరింది. ఇప్పటికే అత్యధిక కలెక్షన్లు సాధించిన రీజినల్ సినిమాల్లో ‘మన శంకర వరప్రసాద్ గారు’ ఒకటిగా నిలిచిందని నిర్మాతలు వెల్లడించారు. ఫ్యామిలీ ఆడియన్స్ను టార్గెట్ చేస్తూ రూపొందించిన ఈ మూవీ అన్ని వర్గాల ప్రేక్షకులను ఆకట్టుకుంటోంది.
ఈ సినిమాలో చిరంజీవి ఓ ఇండియన్ సెక్యూరిటీ ఆఫీసర్ పాత్రలో కనిపిస్తారు. కేంద్రమంత్రికి భద్రత చూసే బాధ్యతలతో పాటు, తనకు దూరమైన కుటుంబాన్ని తిరిగి కలుసుకోవాలనే భావోద్వేగ ప్రయాణం కథగా సాగుతుంది. చిరంజీవితో పాటు నయనతార, వెంకటేష్ కీలక పాత్రల్లో నటించారు. సాహు గారపాటి, సుస్మిత కొణిదెల ఈ చిత్రాన్ని నిర్మించారు.