అక్రమ నిర్మాణాలపై బల్దియా కొరడా

– వర్ణం షాపింగ్ మాల్ ఆక్రమణల తొలగింపు

– ఆక్రమణలను ఉపేక్షించేది లేదన్న కమిషనర్ షేక్ రిజ్వాన్ బాషా

– ఆక్రమణలు స్వతహాగా తొలగించుకోవాలని సూచన

విధాత, వరంగల్ ప్రత్యేక ప్రతినిధి: అక్రమ నిర్మాణాలపై బల్దియా కొరడా ఝుళిపించింది. వరంగల్ చౌరస్తా ప్రాంతంలో నిబంధనలకు విరుద్ధంగా అక్రమ నిర్మాణాలు చేపట్టిన వర్ణం షాపింగ్ మాల్ నిర్మాణాలను బల్దియాకు చెందిన టౌన్ ప్లానింగ్, డీఆర్ ఎఫ్ సిబ్బంది పోలీస్ సహకారంతో సిటీ ప్లానర్ వెంకన్న నేతృత్వంలో మంగళవారం తొలగించినట్లు బల్దియా కమిషనర్ షేక్ రిజ్వాన్ బాషా తెలిపారు. ఈ సందర్భంగా కమిషనర్ మాట్లాడుతూ బల్దియా వ్యాప్తంగా ఉన్న వ్యాపారవేత్తలు, బిల్డర్లు, అపార్ట్మెంట్ నిర్మాణదారులు నిబంధనల మేరకు అనుమతులు తీసుకోవాలని, ధ్రువీకరించిన నక్ష (ప్లాన్) ప్రకారం నిర్మాణాలు చేసుకోవాలని కోరారు. నగరంలో చాలావరకు అపార్ట్మెంట్ సిల్ట్ ఫోర్ ప్లస్ అనుమతులు పొంది అక్రమ నిర్మాణాలు చేస్తున్నట్లు తమ దృష్టి కి వచ్చిందని పేర్కొన్నారు. సిల్ట్, సెల్లార్ అనుమతులు అనేవి కేవలం పార్కింగ్ కోసం మాత్రమే అనే విషయాన్ని గుర్తుపెట్టుకోవాలన్నారు. అక్రమంగా నిబంధనలు పాటించని వరంగల్ చౌరస్తాలో వర్ణం షాపింగ్ మాల్ యాజమాన్యం బిల్డింగ్ నిర్మాణానికి సిల్ట్ ఫోర్ ప్లస్ అనుమతులు పొంది.. దానిని కమర్షియల్ అవసరాలకు వినియోగించడమే కాకుండా రోడ్డు వైపు ఉన్న ప్రాంతాన్ని కబ్జా చేసి వాడుకుంటున్నారని తెలిపారు. వారు నిర్మించిన సెల్లార్ నిర్మాణానికి అనుమతి లేదని, ఆక్యుపెన్సీ సర్టిఫికెట్ పొందకుండా ఆక్రమణలు చేపట్టారని, పూర్తిస్థాయిలో అనుమతి తీసుకోలేని కారణంగా తొలగించామని అన్నారు. విద్యుత్ కనెక్షన్ ను తొలగించాల్సింది గా ఎన్ పీడీ సీ ఎల్ వారికి లేఖ రాశామన్నారు.

 

ఆక్రమ నిర్మాణాల గురించి ఇప్పటివరకు సదరు యాజమాన్యానికి పలుమార్లు నోటీసులు అందజేసినప్పటికీ రాతపూర్వకంగా ఎలాంటి స్పందన లేకపోవడం వల్ల సిల్ట్ పోర్షన్ పార్కింగ్ గోడలు, రోడ్డును ఆక్రమించిన ఏరియాలో నిర్మాణాలను తొలగించామన్నారు. మూడు రోజుల్లో నిబంధనల మేరకు పునః నిర్మాణం జరిగేలా చూడాలని ఆదేశించామన్నారు. గ్రేటర్ పరిధిలో ప్రధానంగా మడికొండ, హన్మకొండ, కాశిబుగ్గ, నక్కల గుట్ట, కే యూసీ జంక్షన్, కరీంనగర్ రోడ్ తదితర ప్రాంతాల్లో ఆక్రమణలు ఎక్కువగా ఉన్నట్లు గుర్తించామన్నారు. వారంలోగా అట్టి నిర్మాణాలకు సంబంధించిన సవరణలు చేపట్టాలని, లేకుంటే బల్దియా తరపున కఠిన చర్యలు చేపడతామని కమిషనర్ తెలిపారు. మంగళవారం ఉదయం వరంగల్ చౌరస్తా నుండి పోచమ్మ మైదాన్ వరకు చేపట్టిన ఆక్రమణల తొలగింపు ప్రత్యేక డ్రైవ్ లో ర్యాంప్ ల ఆక్రమణలు తొలగించినట్లు అధికారులు తెలిపారు. అదేవిధంగా హన్మకొండ జాలేశ్వరాలయం ప్రక్కన ప్రభుత్వ స్థలంలో నిర్మిస్తున్న అక్రమ నిర్మాణాన్ని తొలగించారు. ఈ కార్యక్రమంలో బల్దియాకు చెందిన టౌన్ ప్లానింగ్, డీ ఆర్ ఎఫ్, పోలీసు అధికారులు తదితరులు పాల్గొన్నారు.