Meenakshi Chowdary | సంక్రాంతి సీజన్ అంటేనే బాక్సాఫీస్ పోటీ. ఈ పోటీలో ఈసారి మీనాక్షి చౌదరీ పేరు ప్రత్యేకంగా వినిపిస్తోంది. గతేడాది వెంకటేష్ సరసన నటించిన ‘సంక్రాంతికి వస్తున్నాం’ సినిమాతో హిట్ అందుకున్న ఆమె, ఇప్పుడు నవీన్ పొలిశెట్టి హీరోగా వచ్చిన ‘అనగనగా ఒక రాజు’ మూవీతో మరో విజయాన్ని తన ఖాతాలో వేసుకుంది. జనవరి 14న విడుదలైన ఈ చిత్రం మొదటి షో నుంచే పాజిటివ్ టాక్ తెచ్చుకొని, మంచి వసూళ్లతో థియేటర్లలో నిలకడగా కొనసాగుతోంది. దీంతో సంక్రాంతి సీజన్లో వరుసగా హిట్లు అందుకున్న హీరోయిన్గా మీనాక్షి పేరు ట్రెండ్ అవుతోంది.
ఇదిలా ఉంటే, సినిమాలతో పాటు ఆమె వ్యక్తిగత జీవితం కూడా సోషల్ మీడియాలో చర్చనీయాంశంగా మారింది. ఇటీవల ఆమె పెళ్లి వార్తలపై పలు రూమర్స్ వైరల్ అయ్యాయి. హీరో సుశాంత్తో డేటింగ్లో ఉందని ప్రచారం జరగగా, దీనిపై మీనాక్షి క్లారిటీ ఇచ్చింది. అవన్నీ నిరాధార వార్తలేనని, తాను ప్రస్తుతం సింగిల్గానే ఉన్నానని చెప్పి ఆ రూమర్స్కు ఫుల్స్టాప్ పెట్టింది. అంతేకాదు, తన జీవితానికి సంబంధించిన సరదా విషయాలను కూడా అభిమానులతో పంచుకుంది. స్కూల్ రోజుల్లో తనకు ఒక ఫస్ట్ క్రష్ ఉండేదని, అది తన టీచర్పైనే అని నవ్వుతూ చెప్పింది. ఆ విషయం ఫ్రెండ్స్కు తెలిసి తనను ఆటపట్టించినా, అదే తనకు ఇప్పటికీ గుర్తుండిపోయే మంచి జ్ఞాపకమని వెల్లడించింది.
ఇక తన కలల జీవిత భాగస్వామి గురించి మాట్లాడిన సందర్భంలో, గతంలో ప్రభాస్ లాంటి హైట్, మంచి మనసు ఉన్న వ్యక్తి కావాలని చెప్పిన మీనాక్షి, తాజాగా మరింత ఫన్నీగా స్పందించింది. తన కాబోయే భర్త ఇంటిపనుల్లో సహకరించాలి, వంట చేయాలి, కుటుంబ విలువలు తెలిసినవాడై ఉండాలని చెప్పింది. ఈ కామెంట్స్ ప్రీ రిలీజ్ ఈవెంట్లో నవీన్ పొలిశెట్టితో కలిసి నవ్వులు పూయించాయి.మొత్తానికి, బాక్సాఫీస్ హిట్స్తో పాటు స్పష్టమైన మాటలు, సరదా వ్యాఖ్యలతో మీనాక్షి చౌదరీ ప్రస్తుతం ఇండస్ట్రీలోనూ, సోషల్ మీడియాలోనూ హాట్ టాపిక్గా మారింది. సినిమాల్లో సక్సెస్ కొనసాగితే, ఆమె క్రేజ్ మరింత పెరగడం ఖాయమనే చెప్పాలి.