Pongal Movies |ఓటీటీ ప్రేక్షకులకు నిజంగానే పండగ మొదలైంది. థియేటర్లలో సంక్రాంతి 2026కు భారీ సందడి చేసిన తెలుగు, తమిళ సినిమాలు ఇప్పుడు డిజిటల్ బాట పట్టుతున్నాయి. ఈ ఏడాది సంక్రాంతికి విడుదలైన సినిమాలు థియేటర్లలో మంచి స్పందన తెచ్చుకోగా, ఇప్పుడు ఓటీటీల్లోకి వరుసగా ఎంట్రీ ఇస్తూ ఓటీటీ లవర్స్ను ఫుల్ ఖుషీ చేస్తున్నాయి. ‘ది రాజాసాబ్’ నుంచి ‘నారీ నారీ నడుమ మురారి’ వరకు మొత్తం ఏడు సినిమాలు డిజిటల్ స్ట్రీమింగ్కు సిద్ధమవుతున్నాయి.
సంక్రాంతి 2026 సందర్భంగా బాక్సాఫీస్ దగ్గర అసలైన పండగ వాతావరణం కనిపించింది. జనవరి 9న ప్రభాస్ నటించిన ‘ది రాజాసాబ్’, తమిళ చిత్రం ‘పరాశక్తి’ విడుదలయ్యాయి. జనవరి 12న చిరంజీవి హీరోగా వచ్చిన ‘మన శంకర వరప్రసాద్ గారు’ ప్రేక్షకుల ముందుకు వచ్చింది. జనవరి 13న రవితేజ నటించిన ‘భర్త మహాశయులకు విజ్ఞప్తి’ రిలీజైంది. జనవరి 14న ‘అనగనగా ఒక రాజు’, తమిళ చిత్రం ‘వా వాతియార్’ అలాగే ‘నారీ నారీ నడుమ మురారి’ సినిమాలు థియేటర్లలో సందడి చేశాయి. ఈ సినిమాలన్నీ సంక్రాంతి సీజన్లో ప్రేక్షకులను అలరించాయి.
ఇప్పటికే ఈ సంక్రాంతి సినిమాల్లో ఒకటి ఓటీటీలో స్ట్రీమింగ్ అవుతోంది. కార్తి హీరోగా నటించిన తమిళ సినిమా ‘వా వాతియార్’ తెలుగులో ‘అన్నగారు వస్తారు’ అనే పేరుతో అమెజాన్ ప్రైమ్ వీడియోలో జనవరి 28 నుంచి అందుబాటులో ఉంది. థియేటర్లలో మిస్ అయిన ప్రేక్షకులు ఇప్పుడు ఈ సినిమాను డిజిటల్లో ఆస్వాదిస్తున్నారు.
ఇక శర్వానంద్ హీరోగా నటించిన ట్రయాంగిల్ లవ్ రొమాంటిక్ కామెడీ మూవీ ‘నారీ నారీ నడుమ మురారి’ బాక్సాఫీస్ వద్ద సూపర్ హిట్గా నిలిచింది. ఈ సినిమా ఫిబ్రవరి 4 నుంచి అమెజాన్ ప్రైమ్ వీడియోలో స్ట్రీమింగ్ కానుంది. థియేటర్లలో మంచి రన్ సాధించిన ఈ మూవీ ఓటీటీలోనూ అదే స్థాయి రెస్పాన్స్ అందుకుంటుందన్న అంచనాలు ఉన్నాయి.
పాన్ ఇండియా స్టార్ ప్రభాస్ ప్రధాన పాత్రలో నటించిన హారర్ ఫాంటసీ థ్రిల్లర్ ‘ది రాజాసాబ్’ కూడా ఫిబ్రవరిలో ఓటీటీలోకి రానుంది. ఈ సినిమా ఫిబ్రవరి 6 నుంచి జియో హాట్స్టార్లో స్ట్రీమింగ్ కానున్నట్లు ఇప్పటికే అధికారిక ప్రకటన వచ్చింది. అలాగే మరో తమిళ సినిమా ‘పరాశక్తి’ ఫిబ్రవరి 7 నుంచి జీ5 ఓటీటీలో ప్రేక్షకులకు అందుబాటులోకి రానుంది.
ఇంకా సంక్రాంతికి విడుదలైన మూడు సినిమాల ఓటీటీ రిలీజ్లపై అధికారిక ప్రకటనలు రావాల్సి ఉంది. చిరంజీవి – అనిల్ రావిపూడి కాంబినేషన్లో వచ్చిన ‘మన శంకర వరప్రసాద్ గారు’ బ్లాక్బస్టర్ హిట్గా నిలిచింది. ఈ సినిమా ఫిబ్రవరి 11 నుంచి జీ5 ఓటీటీలో స్ట్రీమింగ్ అయ్యే అవకాశాలు ఉన్నాయని టాక్ వినిపిస్తోంది.
రవితేజ భార్య, ప్రియురాలికి మధ్య నలిగిపోయే భర్త పాత్రలో నటించిన ‘భర్త మహాశయులకు విజ్ఞప్తి’ సినిమా ఓటీటీ హక్కులను జీ5 దక్కించుకుంది. ఈ చిత్రం కూడా ఫిబ్రవరి రెండో వారంలోనే డిజిటల్ స్ట్రీమింగ్కు వచ్చే అవకాశం ఉందని సమాచారం. ఇక నవీన్ పొలిశెట్టి నటించిన ఫ్యామిలీ కామెడీ ఎంటర్టైనర్ ‘అనగనగా ఒక రాజు’ ఫిబ్రవరి మూడో వారంలో నెట్ఫ్లిక్స్లో రిలీజ్ అవుతుందనే ప్రచారం సాగుతోంది.
మొత్తంగా చూస్తే, సంక్రాంతి 2026కి థియేటర్లలో సందడి చేసిన సినిమాలు ఇప్పుడు ఓటీటీల్లోకి వరుసగా వస్తుండటంతో డిజిటల్ ప్రేక్షకులకు నిజమైన వినోదపు పండగ మొదలైనట్టే కనిపిస్తోంది.