ఎండు ద్రాక్ష.. చూడ‌డానికి చిన్న‌దిగా ఉంటుంది. కానీ ఇందులో పోష‌కాలు మెండుగా ఉంటాయి. విట‌మిన్లు కూడా అధికంగానే ఉంటాయి. మన మెనూలో ఈ డ్రై ఫ్రూట్‌ను చేర్చుకుంటే.. మన శరీరానికి కావాల్సిన‌న్ని పోష‌కాలు అందుతాయి. ఎండు ద్రాక్ష‌లోని యాంటీ ఆక్సిడెంట్లు, ఫైబ‌ర్ శరీరానికి ఎంతో ఉప‌యోగ‌ప‌డుతాయి. ఈ ఫ్రూట్ గుండె ఆరోగ్యానికి కూడా ఎంతో మేలు చేస్తుంది. కాబట్టి అన్ని వ‌య‌సుల వారు ప్ర‌తి రోజు ఎండ్రు ద్రాక్ష‌ల‌ను తిన‌డం వ‌ల్ల ఎన్నో ఆరోగ్య‌క‌ర‌మైన ప్ర‌యోజ‌నాల‌ను పొందే అవ‌కాశం ఉంటుంది.
ఎండు ద్రాక్ష‌ల వ‌ల్ల ఉప‌యోగాలు ఇవే..
- ఎండు ద్రాక్ష‌లో ఫైబ‌ర్ పుష్క‌లంగా ఉంటుంది. నిత్యం ఎండు ద్రాక్ష‌ల‌ను తీసుకోవ‌డం వ‌ల్ల మ‌ల‌బ‌ద్ద‌కాన్ని నివారించొచ్చు.
- బ‌రువు త‌గ్గాల‌నుకునే వారు ప్ర‌తి రోజూ ఎండు ద్రాక్ష‌ల‌ను తిన‌డం మంచిది. ఎందుకంటే ఆక‌లి త్వరగా కానివ్వ‌దు. కడుపు నిండుగానే ఉన్న‌ట్లు అనిపిస్తుంది.
- ఎండు ద్రాక్ష‌లో యాంటీఆక్సిడెంట్లు పుష్క‌లంగా ఉంటాయి. కాబట్టి హానీక‌ర‌మైన అణువుల‌ను నిర్మూలించ‌డంలో స‌హాయ‌ప‌డుతాయి. శ‌రీర కణాల‌ను ఆరోగ్యంగా ఉంచడంలో తోడ్ప‌డుతాయి.
- గుండె జ‌బ్బులు, క్యాన్సర్, అల్జీమ‌ర్స్ వంటి దీర్ఘ‌కాలిక వ్యాధుల‌ను నివారించే అవ‌కాశం ఉంది. కాలేయాన్ని రక్షిస్తుంది. అంతేకాదు ఎండు ద్రాక్ష క్యాన్సర్ కణాల పెరుగుదలను నిరోధిస్తుంది. కంటి, చర్మాన్ని ఆరోగ్యంగా ఉంచడంలో సహాయపడుతుంది.
- ఎండు ద్రాక్ష‌లో ఐర‌న్, కాల్షియం, పొటాషియం, విట‌మిన్ బీ6 వంటి అనేక విట‌మిన్లు, ఖ‌నిజాలు అధిక మోతాదులో ఉంటాయి. శ‌రీర‌మంత‌టా ఆక్సిజ‌న్‌ను తీసుకెళ్లేందుకు ఐర‌న్ కీల‌క పాత్ర పోషిస్తుంది. పొటాషియం ర‌క్త‌పోటును నియంత్రిస్తుంది. విట‌మిన్ బీ6 మెద‌డు ప‌నితీరును మెరుగుప‌రుస్తుంది.
- ఎండుద్రాక్షల్లో ఫ్రక్టోజ్, గ్లూకోజ్ వంటి సహజ చక్కెరలు ఉంటాయి. ఇవి మన శరీరానికి త్వరగా శక్తిని అందిస్తాయి. ఔషధ గుణాలున్న ఎండుద్రాక్షను వారానికి రెండుసార్లు తీసుకుంటే మంచిదని వైద్యులు సూచిస్తున్నారు.