అమెరికా అధ్యక్షుడు డొనాల్డ్ ట్రంప్ తీసుకున్న తాజా నిర్ణయం ప్రపంచవ్యాప్తంగా వృత్తినిపుణులు, విద్యార్థులు, కంపెనీలను ఒక్కసారిగా షాక్కు గురిచేసింది. ఇప్పటివరకు 2,000 నుండి 5,000 డాలర్ల మధ్య ఉన్న H-1B వీసా రుసుములు ఇప్పుడు ఒక్కసారిగా ఏడాదికి 100,000 డాలర్లకు పెరగడం పెద్ద కలకలం రేపుతోంది.
ఈ ఫీజు పెంపు వల్ల ఎవరు ప్రభావితమవుతారు? ఇప్పటికే అమెరికాలో ఉన్నవారికి వర్తిస్తుందా? కొత్తగా వెళ్ళేవారికి ఏం జరుగుతుంది? స్టూడెంట్స్, కంపెనీలు, స్టార్టప్‌ల పరిస్థితి ఏంటి? ఈ ప్రశ్నలు అందరి మదిలో మెదులుతున్నాయి. మన తెలుగు పిల్లలే చాలామంది హెచ్1బి వీసా మీద అక్కడ ఉద్యోగాలు చేస్తున్నారు. ట్రంప్ తీసుకున్న ఈ నిర్ణయం వల్ల ఏం జరగబోతోందోనని ఇక్కడ తల్లిదండ్రులు ఆందోళన చెందుతున్నారు. అందుకని, పాఠకులకు స్పష్టత ఇవ్వడానికి ముఖ్యమైన సందేహాలు ఇంకా సమాధానాలు (FAQs) ఇక్కడ అందిస్తున్నాం.
-
H-1B వీసా అంటే ఏమిటి?
జవాబు: అమెరికాలో ప్రత్యేక నైపుణ్యం (Speciality Occupation) అవసరమయ్యే రంగాల్లో (IT, ఇంజినీరింగ్, మెడికల్, రీసెర్చ్) విదేశీ నిపుణులను నియమించుకునే సౌకర్యం కల్పించేదే హెచ్1బి వీసా. సంవత్సరానికి 65,000 సాధారణ H-1B వీసాలు, 20,000 మాస్టర్స్ కేటగిరీ వీసాలు ఇస్తారు. వీటిలో 70% కంటే ఎక్కువ భారతీయులదే వాటా.
-
ఇప్పటి వరకు H-1B వీసా ఫీజులు ఎంత?
జవాబు: ఇప్పటి వరకు ఫీజులు 2,000 డాలర్ల నుంచి 5,000 డాలర్ల మధ్య ఉండేవి. కంపెనీ పరిమాణం, ఇతర నిర్వహణ ఖర్చులపై ఆధారపడి అటూఇటూ మారేవి. ఇప్పుడు ట్రంప్ నిర్ణయం ప్రకారం హఠాత్తుగా ఏడాదికి 1,00,000 డాలర్లకు పెంచారు.
-
కొత్తగా పెంచిన 1,00,000 డాలర్ల ఫీజు ఎవరికి వర్తిస్తుంది?
జవాబు:
- కొత్తగా H-1B వీసా తీసుకునేవారికి ఇది తప్పనిసరి.
- ఇప్పటికే వీసా ఉన్నవారు అమెరికా వెలుపలికి వెళ్లి తిరిగి ప్రవేశించాలనుకున్నా వర్తించే అవకాశం ఉంది.
- అమెరికాలోపలే ఎక్స్‌టెన్షన్, ట్రాన్స్‌ఫర్, స్టేటస్ మార్చుకోవడం వంటి వాటికి ఈ ఫీజు వర్తించదు.
-
ఈ ఫీజు ఒకసారి మాత్రమేనా? లేక ప్రతి సంవత్సరం చెల్లించాలా?
జవాబు: ఇది ప్రతి సంవత్సరం చెల్లించాల్సిన ఫీజు. అంటే 3 సంవత్సరాల వీసా కాలానికి 3,00,000 డాలర్లన్నమాట.
-
ఈ ఫీజు ఎవరు చెల్లించాలి? కంపెనీనా? లేక ఉద్యోగా?
జవాబు: నియమాల ప్రకారం వీసా ఫీజులను కంపెనీ మాత్రమే చెల్లించాలి. ఉద్యోగి నుండి వసూలు చేయడం అమెరికా కార్మిక చట్టాల ప్రకారం కుదరదు. అయితే పరోక్షంగా కంపెనీలు దీన్ని ఖర్చులలో చూపించి, ఉద్యోగి జీతభత్యాలలో కోత విధించే అవకాశం ఉంది.
-
ప్రస్తుతం USలో ఉన్న H-1B ఉద్యోగులకు ఇది వర్తిస్తుందా?
జవాబు: లేదు. అమెరికాలోనే ఉండి ఎక్స్‌టెన్షన్ లేదా కంపెనీ మార్పు చేసుకునే వారికి ఈ కొత్త ఫీజు వర్తించదు. కానీ అమెరికా బయటకెళ్లి తిరిగి ప్రవేశించే సమయంలో మాత్రం ఈ ఫీజు వర్తించే అవకాశం ఉంది.
-
F-1 వీసా విద్యార్థులు H-1Bకి మారితే ఏమవుతుంది?
జవాబు: వారు అమెరికాలోపలే మార్చుకుంటే ఈ ఫీజు వర్తించదు. కానీ ఎవరైనా భారతదేశం లేదా ఇతర దేశం నుంచి కొత్తగా H-1Bలో రావాలనుకుంటే మాత్రం 1,00,000 డాలర్ల బాదుడు తప్పదు.
-
ఎవరికైనా మినహాయింపులు ఉంటాయా?
జవాబు: “జాతీయ అవసరాల” కింద కొంతమందికి మినహాయింపులు ఇవ్వవచ్చు. ఉదాహరణకు ఆరోగ్య రంగ నిపుణులు, ముఖ్య పరిశోధనలో ఉన్నవారు. కానీ ఈ మినహాయింపులపై ప్రస్తుతానికి ఎటువంటి స్పష్టతా లేదు.
-
ఈ నిర్ణయం ఎప్పటి నుంచి అమల్లోకి వస్తుంది?
జవాబు: సెప్టెంబర్ 21, 2025 అర్థరాత్రి 12:01 (ET) నుంచి అమల్లోకి వస్తుంది. అంటే తక్షణమే ప్రభావం చూపనుంది.
-
దీని ప్రభావం భారతీయులపై ఎలా ఉంటుంది?
జవాబు: భారతీయులు H-1B వీసాల్లో 71% వాటా కలిగి ఉన్నారు. కాబట్టి ప్రధానంగా మనకే ఎక్కువుంటుంది. కొత్తగా అమెరికా వెళ్లే టెకీలు, విద్యార్థుల కెరీర్ ప్లాన్లపై ఇది పెను ప్రభావం చూపనుంది.
-
దీని ప్రభావం అమెరికాపై ఎలా ఉంటుంది?
జవాబు:
- సృజనాత్మకత మందగిస్తుంది. కొత్త పేటెంట్లు, పరిశోధనలో వెనకబడుతుంది.
- స్టార్టప్‌లు దెబ్బతింటాయి. చిన్న కంపెనీలు 1,00,000 డాలర్ల ఖర్చు భరించలేవు.
- ఆరోగ్యరంగంలో నైపుణ్యం తగ్గుతుంది. వైద్యులు, నిపుణులను తీసుకురావడం కష్టమవుతుంది.
- ఆఫ్షోరింగ్ (అమెరికా కంపెనీలు తమ ప్రాజెక్టులను వేరే దేశాల్లోని కంపెనీలకు ఇవ్వడం) పెరుగుతుంది. అటువంటి సేవలు, పనులు భారత్లాంటి ఇతర దేశాలకు వెళ్లిపోతాయి.
-
ఈ నిర్ణయాన్ని కోర్టులో సవాల్ చేయవచ్చా?
జవాబు: చేయొచ్చు. నిపుణుల అభిప్రాయం ప్రకారం 1,00,000 డాలర్ల H-1B ఫీజు నిర్ణయం కోర్టులో సవాలు చేయబడే అవకాశం ఖాయం. ఎందుకంటే,
- ఇది అధ్యక్షుడి అధికార పరిధి దాటి తీసుకున్న నిర్ణయం: H-1B వీసా ఫీజులను మార్చే అధికారం కేవలం అమెరికా కాంగ్రెస్‌కే ఉంది. అధ్యక్షుడు “జాతీయ భద్రత” పేరుతో ప్రవేశ పరిమితులు మాత్రమే విధించగలడు. కాబట్టి ఇది ధిక్కారం కింద పరిగణించబడుతుంది.
- వీసా ఫీజు బదులు ప్రవేశ రుసుములాగా: దీనిని పేరుకు వీసా ఫీజు అని పిలిచినా, నిజానికి ఇది విదేశీ నిపుణుల ప్రవేశాన్ని అడ్డుకోవడంలా కనిపిస్తోంది. ఇదే కోర్టులో మెయిన్ పాయింట్ అవుతుంది.
- ఇంతకుముందు 2017లో కూడా ట్రంప్ ఇలాగే తీసుకొచ్చిన ముస్లిం దేశాల ప్రయాణ నిషేధాన్ని కోర్టులు అడ్డుకున్నాయి. తర్వాత మార్పులుచేర్పులు చేసి, జాతీయ భద్రత కింద మళ్లీ అమలు చేశారు. ఇదే వరుసలో ఇప్పుడు కూడా కోర్టు జోక్యం చేసుకునే అవకాశం ఉంది.
- కోర్టులు ముందుగా మాత్రం Temporary Restraining Order (TRO) జారీ చేసి అమలును తాత్కాలికంగా నిలిపివేయవచ్చు.
- తర్వాత పూర్తి విచారణ జరిపి నిర్ణయం తెలిపే అవకాశం ఉంది.
- అయితే ఆఖరికి ఏం జరుగుతుందనేది ఇప్పుడే చెప్పడం కష్టం. కానీ ప్రారంభ దశలోనే న్యాయపరమైన సవాళ్లు ఈ నిర్ణయం ముందుకు సాగకుండా అడ్డుకుంటాయి. కేసు సుప్రీంకోర్టు వరకు వెళ్లే అవకాశం ఉంది.
తుది నిర్ణయం ఇంకా న్యాయపరమైన సవాళ్లతో అనిశ్చితిలో ఉన్నప్పటికీ, ప్రస్తుతం కంపెనీలు, ప్రొఫెషనల్స్, విద్యార్థులు మాత్రం కొంత జాగ్రత్తగా వ్యవహరించడమైతే తప్పనిసరి. ఈ ఫీజు నిర్ణయం అమలవుతుందా? లేదా అనేది కోర్టుల్లోనే తేలుతుంది. కాబట్టి తుది ఫలితం కూడా కోర్టు తీర్పులపై ఆధారపడి ఉంటుంది.