Opposition Leaders
విధాత: ఆర్జేడీ అధినేత లాలూ ప్రసాద్, కాంగ్రెస్ అధ్యక్షుడు మల్లికార్జున్ ఖర్గే, కాంగ్రెస్ అధినేత రాహుల్ గాంధీ, పశ్చిమ బెంగాల్ ముఖ్యమంత్రి, టీఎంసీ అధినేత్రి మమతా బెనర్జీ, ఎన్సీపీ అధినేత శరద్ పవార్, ఢిల్లీ ముఖ్యమంత్రి, ఆప్ కన్వీనర్ అరవింద్‌తో బీహార్ ముఖ్యమంత్రి, జనతాదళ్ (యునైటెడ్) అధినేత నితీశ్ కుమార్ పాట్నాలో శుక్ర‌వారం ప్రతిపక్ష పార్టీల సమావేశం నిర్వ‌హించారు.
2024 లోక్‌సభ ఎన్నికల్లో బీజేపీని ఓడించేందుకు ఉమ్మడి వ్యూహాన్ని రూపొందించేందుకు డజనుకు పైగా ప్రతిపక్ష రాజకీయ పార్టీల నాయకులు పాట్నాలో భేటీ అయ్యారు. సమావేశాన్ని కవర్ చేయడానికి మీడియా సిబ్బందిని అనుమతించనప్పటికీ, దానికి సంబంధించిన చిన్న వీడియో క్లిప్ సీఎంవో వాట్సాప్ గ్రూప్‌లో షేర్ చేశారు.
ఈ వీడియోలో కాంగ్రెస్ అధ్యక్షుడు ఖర్గే తన కుడి వైపున కూర్చున్న నితీష్‌తో సంభాషణలో నిమగ్నమై కనిపించగా, అతని ఎడమ వైపున కూర్చున్న రాహుల్ గాంధీ శ్రద్ధగా వింటున్నారు. నితీష్ కుమార్, పశ్చిమ బెంగాల్ ముఖ్యమంత్రి మమతా బెనర్జీ మధ్య లాలూ ప్రసాద్ యాద‌వ్ కూర్చున్నారు. నితీశ్ అధ్యక్షతన జరిగిన ఈ సమావేశంలో మమతా బెనర్జీ, ఒమర్ అబ్దుల్లాలు త‌మ అభిప్రాయాల‌ను వెల్ల‌డించారు. లోక్‌సభ ఎన్నికలను ఎదుర్కోవడానికి 1:1 ఫార్ములాను అమ‌లు చేయాల‌ని మమత సూచించారు.
వచ్చే లోక్‌సభ ఎన్నికల్లో బీజేపీని ఓడించే ప్రణాళికలపై చర్చించడమే కాకుండా, ఢిల్లీ ఆర్డినెన్స్‌కు మద్దతు ఇవ్వాలని పలువురు నేతలు ఈ సమావేశంలో కాంగ్రెస్‌ను కోరారు. కానీ ఒమర్ అబ్దుల్లా ఢిల్లీ ముఖ్యమంత్రి అరవింద్ కేజ్రీవాల్‌ ఆర్టికల్ 370పై అవ‌లంభించిన వైఖరిని త‌ప్పుప‌ట్టారు.
ఆప్-కాంగ్రెస్ మధ్య దోస్తీకి కృషి
విశ్వ‌స‌నీయ సమాచారం ప్రకారం, ఎన్‌సిపి అధినేత శరద్ పవార్, మహారాష్ట్ర మాజీ ముఖ్యమంత్రి ఉద్ధవ్ థాకరే కాంగ్రెస్ – ఆమ్ ఆద్మీ పార్టీల మధ్య విభేదాలను పరిష్కరించడానికి ప్రయత్నించారు. బెంగాల్‌లో కాంగ్రెస్ పార్టీ వైఖరిపై ముఖ్యమంత్రి మమతా బెనర్జీ అభ్యంతరం వ్యక్తం చేసినట్లు సమాచారం.
“మ‌న‌మంతా కలిసి బిజెపికి వ్యతిరేకంగా పోరాడటానికి ఇక్కడకు వచ్చాము. లోక్‌సభ ఎన్నికలను ఎదుర్కోవడానికి మేము 1:1 ఫార్ములాను ఆశిస్తున్నాము. ఈ సమావేశంలో తీసుకునే నిర్ణ‌యం ప్ర‌తి పార్టీకి వ‌ర్తిస్తుంది” అని మమత స్ప‌ష్టం చేసినట్లు చెబుతున్నారు. ఈ సమావేశంలో పాల్గొన్న స‌మాజ్‌వాదీ పార్టీ నాయ‌కుడు అఖిలేష్ యాదవ్‌ను యోధుడిగా పొగిడార‌ని తెలుస్తోంది.
బిజేపీని నిలువ‌రించ‌డం సాధ్య‌మా?
ప్రస్తుత లోక్‌సభలో పాట్నాల స‌మావేశానికి హాజ‌రైన పార్టీల బలం మొత్తం 543 సీట్లలో 200 కంటే తక్కువగా ఉంది, అయితే 300కి పైగా సొంత మెజారిటీ కలిగిన్న బిజేపీని ఎలా ఎదుర్కొంటారు అనే ప్ర‌శ్న వ్య‌క్త‌మ‌వుతోంది. బిజెపికి ప్రధాన ప్రత్యర్థిగా భావించే కాంగ్రెస్, కేవలం 50 సీట్లు మాత్రమే గెలుచుకుంది,
ఇది 2014లో దాని పనితీరు కంటే కొంచెం మెరుగుపడింది. హిమాచల్ ప్రదేశ్, కర్నాటకలో సాధించిన విజయాలు, రాహుల్ గాంధీ ‘భారత్ జోడో యాత్రస‌కు వ‌చ్చిన స్పందనతో కాంగ్రెస్ తిరిగి తన బ‌లాన్ని పుంజుకుంటుంద‌న్న ఆశాభావం వ్య‌క్త‌మ‌వుతోంది. ఈ సమావేశంలో పాల్గొన్న RJD, CPI(ML) లిబరేషన్ పార్టీలు గత లోక్‌సభ ఎన్నికల్లో ఒక్క సీటు కూడా గెలుచుకోలేకపోయాయి, అయితే ఏడాది తర్వాత జరిగిన బీహార్ అసెంబ్లీ ఎన్నికల్లో రెండూ మంచి పనితీరు కనబరిచాయి.
ఇదే ఐక్య‌త‌తో వచ్చే పార్లమెంటు ఎన్నికల్లో కూడా మంచి ఫ‌లితాలు సాధించాలని భావిస్తున్నారు.
మిగతా పార్టీల్లో తృణమూల్‌ కాంగ్రెస్, డీఎంకే, జేడీ(యూ) మాత్రమే రెండంకెల స్థానాలు సాధించాయి. శివసేన 18 సీట్లు గెలుచుకుంది. ఈ సమావేశంలో జమ్మూ కాశ్మీర్‌కు చెందిన పీపుల్స్ డెమోక్రటిక్ పార్టీ, నేషనల్ కాన్ఫరెన్స్‌తో పాటు SP, AAP, NCP, CPI, CPI(M) పార్టీలు పాల్గొన్నాయి.