టెక్సాస్ : పురుషుల టి20 ప్రపంచకప్ క్రికెట్ పోటీలలో భాగంగా నేడు టెక్సాస్లో జరిగిన మ్యాచ్లో జగజ్జేత పాకిస్తాన్, పసికూన అమెరికా తలపడగా, యుఎస్ఏ పెను సంచలన విజయం నమోదు చేసింది. సూపర్ ఓవర్ థ్రిల్లర్లో టాస్ గెలిచి బౌలింగ్ ఎంచుకున్న అమెరికా మేటి వీరులైన పాకిస్తాన్ బ్యాటర్లను ముచ్చెమటలు పట్టించింది. అమెరికా బౌలర్ల ధాటికి అసలు బ్యాటింగ్ ఎలా చేయాలో అర్థం కాని పరిస్థితికి పాకిస్తాన్ చేరుకుంది. నిప్పులాంటి బంతులకు పాక్ బ్యాటర్ల వద్ద సమాధానమే లేకుండా పోయింది. ఒకరి వెనుక మరొకరు పెవిలియన్కు క్యూ కట్టారు. ఓపెనర్లలో బాబ్ ఆజమ్ (44) ఒక్కడే ఆచితూచి ఆడుతూ టి20ని టెస్ట్మ్యాచ్లా మార్చేసాడు. పవర్ప్లేలో పాకిస్తాన్ స్కోరు 30 పరుగులకు 3 వికెట్లంటే అమెరికా బౌలర్లు ఎలా వణికించారో అర్థం చేసుకోవచ్చు. ఇక మిగతావారంతా అలా వచ్చి ఇలా వెళ్లినవారే. రిజ్వాన్(9), ఉస్మాన్ఖాన్(3), ఫఖర్ జమాన్(11), ఆజంఖాన్(0)లు 20 పరుగులు కూడా చేయకుండా వెనుదిరిగారు. వంద పరుగులు కూడా కష్టమనుకున్న స్థితిలో వచ్చిన షాదాబ్ ఖాన్(25 బంతుల్లో 40 పరుగులు) ఎడాపెడా బాదడంతో జట్టు స్కోరు వంద దాటింది. అఖర్లో అఫ్రిదీ బ్యాట్ ఝళిపించడంతో పాకిస్తాన్ నిర్ణీత 20 ఓవర్లలో 7 వికెట్ల నష్టానికి 159 పరుగులు చేయగలిగింది. అమెరికా బౌలర్లలో కెంజిగే 3 వికెట్లతో రాణించగా, సౌరభ్ నేత్రావల్కర్ 2, అలీ ఖాన్, జస్దీప్సింగ్ చెరో వికెట్ తీసుకున్నారు. రిజ్వాన్ ఇచ్చిన క్యాచ్ను స్లిప్లో స్టీవెన్ టేలర్ ఒంటి చేత్తో అందుకున్న తీరు నిజంగా షాకింగ్. బహుశా టోర్నమెంట్కే హైలైట్.
తరువాత చేజింగ్కు దిగిన అమెరికా ఏమాత్రం తడబాటు లేకుండా ధాటిగా బ్యాటింగ్ ఆరంభించింది. పూర్తిగా పాక్ ఆటతీరుకు భిన్నంగా యధేచ్చగా చెలరేగారు. భీకర బౌలర్లయిన అఫ్రిదీ, నసీంషా, హారిస్ రౌఫ్లను ఎదుర్కుంటూ వారు పరుగులు రాబట్టిన తీరు అద్భుతం. ఓపెనర్లుగా వచ్చిన కెప్టెన్ మోనాంక్ పటేల్, స్టీవెన్ టేలర్(12)లు తొలి వికెట్కు 36 పరుగులు జోడించగా, తర్వాత వచ్చిన ఆండ్రీస్ గౌస్(35)తో కలిసి మోనాంక్ ఇన్నింగ్స్ను బలంగా నిర్మించాడు. ఈ క్రమంలో అర్థసెంచరీ సాధించిన మోనాంక్(50) మహమ్మద్ ఆమిర్ బౌలింగ్లో ఔటవ్వగా, తొలి మ్యాచ్లో దంచికొట్టిన ఆరొన్ జోన్స్(36), నితీశ్ కుమార్(14)లు మరో వికెట్ పడకుండా సరిగ్గా 159 పరుగులు చేసారు. దాంతో సూపర్ ఓవర్లోకి అడుగుపెట్టింది.
పాక్ బౌలర్లలో ఆమిర్, నసీం షా, ఆఫ్రిదీ తలా ఒక వికెట్ తీసారు.
సూపర్ ఓవర్ – 1:
అమెరికా బ్యాటర్లు: ఆరొన్ జోన్స్, హర్మీత్సింగ్. పాకిస్తాన్ బౌలర్: మహమ్మద్ ఆమిర్.
మొదట బ్యాటింగ్ చేసిన అమెరికా, మహమ్మద్ ఆమిర్ బౌలింగ్లో వరుసగా, 4,2,1, 1+వైడ్, 1, 1+వైడ్, 2, 3+వైడ్, 1+ఔట్. ఇలా మొత్తం ఒక వికెట్ నష్టానికి 18 పరుగులు చేసింది. 3 వైడ్లతో కలిపి ఆమిర్ మొత్తం 9 బంతులేసాడు. పాకిస్తాన్ లక్ష్యం 6 బంతుల్లో 19 పరుగులు.
సూపర్ ఓవర్ – 2:
పాకిస్తాన్ బ్యాటర్లు: ఫఖర్ జమాన్, ఇఫ్తికార్ అహ్మద్. అమెరికన్ బౌలర్: సౌరభ్ నేత్రావల్కర్
తర్వాత బ్యాటింగ్ చేసిన పాకిస్తాన్, వరుసగా, 0, 4, వైడ్, 0ఔట్, వైడ్, 4ఎల్బీ, 2, 1. మొత్తం ఒక వికెట్ నష్టానికి 13 పరుగులు.
ఫలితం: సూపర్ ఓవర్లో పాకిస్తాన్పై అమెరికా ఘనవిజయం
Read more
T20 World Cup | టీమిండియాను కలవరపరిచేది ఆ ఒక్కటే..? ఆ సమస్యను అధిగమిస్తే కప్ మనదే..!
Rohit Sharma| హార్ధిక్ పాండ్యాకి చెక్ పెట్టేందుకు స‌రికొత్త స్కెచ్‌లు వేస్తున్న రోహిత్ శ‌ర్మ
