Komatireddy Rajagopal Reddy | డీకే శివ‌కుమార్‌తో కోమ‌టిరెడ్డి రాజగోపాల్ రెడ్డి భేటీ

Komatireddy Rajagopal Reddy | విధాత, హైదరాబాద్ : కర్ణాటక డిప్యూటీ సీఎం డీకే శివకుమార్‌తో మునుగోడు ఎమ్మెల్యే కోమటిరెడ్డి రాజగోపాల్ రెడ్డి బుధవారం హైదరాబాద్ లో భేటీ అయ్యారు. మంత్రి పదవి దక్కలేదనే అసంతృప్తితో ఉన్న ఆయన అవసరమైతే ఉప ఎన్నికకు కూడా వెనుకాడబోనని వ్యాఖ్యలు చేశారు. ఈ వ్యాఖ్యలు చేసిన మరునాడే డీకే శివకుమార్ తో భేటీ కావడం రాజకీయంగా చర్చకు దారితీస్తోంది.హైదరాబాద్‌లో ఓ ప్రైవేట్ కార్యక్రమంలో పాల్గొనేందుకు డీకే శివకుమార్ వచ్చారు. ఓ హోటల్ లో డీకే శివకుమార్ తో కోమటిరెడ్డి రాజగోపాల్ రెడ్డి భేటీ అయ్యారు. కాంగ్రెస్ లో చేరే ముందు, భువనగిరి పార్లమెంట్ ఎన్నికల ప్రచారం సమయంలో తనకు మంత్రి పదవి ఇస్తామని పార్టీ అధిష్ఠానం హామీ ఇచ్చిందని, కానీ, ఇప్పుడు ఈ హామీని అమలు చేయడం లేదని ఆయన డీకే శివకుమార్ దృష్టికి తీసుకెళ్లారు. అయితే మర్యాదపూర్వకంగానే డీకే శివకుమార్ తో భేటీ అయినట్టు రాజగోపాల్ రెడ్డి చెప్పారు. మంత్రి పదవితో పాటు, రాజకీయాల గురించి చర్చించలేదని రాజగోపాల్ రెడ్డి మీడియాకు వెల్లడించారు.