Inside the restless mind of Siddu Jonnalagadda – creative genius or overthinker?
(విధాత ప్రత్యేకం)
‘‘ప్రేక్షకులకే కాదు… నాపైన నాకే అంచనాలు ఎక్కువ’’ అని ఇటీవల ఒక ఇంటర్వ్యూలో అన్నాడు యువ నటుడు సిద్ధు జొన్నలగడ్డ. ఆ మాటలోనే ఆయన సినీ ప్రయాణం దాగి ఉంది. ‘టిల్లు’ అనే పాత్రతో ఒక్కసారిగా స్టార్ ఇమేజ్‌ సంపాదించిన సిద్ధు, ఇప్పుడు ‘తెలుసు కదా!’ సినిమాలో మరోసారి కొత్త తాను చూపించబోతున్నాడు. కానీ ప్రతీసారి కొత్త దర్శకులతో పని చేసేప్పుడు, సిద్ధు పేరు చుట్టూ ఒక మాట తప్పకుండా వస్తుంది — “డైరెక్టర్ ఎవరైతే ఏంటి?, సినిమాని నడిపేది సిద్ధే”.
ఇది కేవలం గాసిప్ కాదు. సినీ వర్గాల్లో కూడా ఈ అభిప్రాయం బలంగా ఉంది. ఎందుకంటే సిద్ధు కేవలం నటుడు కాదు — ఆయన రైటర్, డైలాగ్‌ ఎడిటర్‌, సీన్‌ కట్టర్‌ కూడా. ఎవరో చెప్పిన పాత్రను నటించడమే కాదు, ఆ పాత్రను ఆలోచించి మలిచే వ్యక్తి. అందుకే ‘DJ టిల్లు’ వంటి సినిమాలు ప్రత్యేకమయ్యాయి.
నా కథ నేను రాయకపోతే, నాకెవరు రాస్తారు?
కానీ అదే సిద్ధుని బలం ఇప్పుడు ఆయనకే బలహీనతగా మారుతోంది. ఆయనకంటూ ఒక సృజనాత్మక ఆందోళన ఉంది — “నా కథ నేను రాయకపోతే, నాకెవరు రాస్తారు?” అనే ఆలోచన. ఆయన చెప్పినట్లుగానే, “నా కోసం ఎవ్వరూ కథలు రాయలేదు, అందుకే నేనే నేర్చుకున్నా” అని. ఈ క్రమంలో ప్రతి ప్రాజెక్ట్‌లోనూ ఆయన జోక్యం తప్పట్లేదు.
‘తెలుసు కదా!’ సినిమా దర్శకురాలు నీరజ కోనకి ఇది తొలి చిత్రం. ఆమె టాలెంట్‌పై విశ్వాసం ఉన్నా, కథ పాయింట్‌ కొత్తగా ఉన్నా, సెట్లో సిద్ధు పాత్ర చుట్టూ తిరిగే క్రియేటివ్‌ డైనమిక్‌ తప్పదు. అంటే బాహ్యంగా ఆమె డైరెక్టర్ అయినా, లోపల నుంచి సినిమాని రైడ్‌ చేస్తున్నది సిద్ధే అని టీమ్‌ వర్గాలు చెబుతున్నాయి.
అది అతిగా జోక్యమా? లేక పరిపూర్ణత పట్ల పట్టుదలనా? అదే ఇప్పుడు చర్చ. సిద్ధు విషయంలో పరిశ్రమ అభిప్రాయం సింపుల్ — “అతని మైండ్‌లో రైటర్, హార్ట్‌లో ఆర్టిస్ట్, కాని సెట్లో ఆ ఇద్దరూ కొన్నిసార్లు ఘర్షణ పడతారు.”
ఇతర యువ హీరోలతో పోల్చితే సిద్ధూ భిన్నమైనవాడు. విశ్వక్ సేన్ కూడా డైరెక్టర్‌గా ప్రారంభమయ్యాడు కానీ నటుడిగా పనిచేసేటప్పుడు పూర్తిగా దర్శకుడి నటుడవుతాడు. అదివి శేష్ కూడా రైటర్ అయినా, తాను నమ్మిన టీమ్‌కి ఫుల్‌ స్పేస్‌ ఇస్తాడు. కానీ సిద్ధు ఇంకా ఆ స్టేజ్‌కి రాలేదు. ఆయనకు తన ఆలోచనపై నమ్మకం ఉంది, కానీ ఇతరుల ఆలోచనలపై తక్కువ. ఇది అహంకారం కాదు — ఆందోళన (creative anxiety). ప్రతీ సీన్‌, ప్రతీ లైన్‌ మీద ఆయనకు తనకంటూ ఒక వాదన ఉంటుంది. “ఏ సినిమా చేసినా చివరి నిమిషం వరకూ వదలను” అన్న ఆయన మాట ఆ మైండ్‌సెట్‌కి అద్దం పడుతుంది. ఇదే ధోరణి ‘జాక్’ సినిమాకి, ‘టిల్లు స్క్వేర్‌’కి కూడా బూమరాంగ్‌ అయిందని కొందరు చెబుతారు. దాంతోనే కొందరు దర్శకులు సిద్ధుతో పని చేయడానికి రెడీ అయినా, భయపడతారు. “అతను బ్రిలియంట్‌ కానీ డ్రైనింగ్‌” అని ఒక ఎడిటర్‌ చెప్పిన మాట పరిశ్రమలో పాపులర్‌ అయింది.
కానీ సిద్ధు కూడా ఇప్పుడిప్పుడే ఈ విషయం తెలుసుకుంటున్నాడు. కొరటాల శివ చెప్పిన మాట “ఇకపై నువ్వు చేసే ప్రతీ సినిమాను టిల్లు, జాక్ మధ్యే కొలుస్తారు” ఆయనకు కొత్త ఆలోచన ఇచ్చింది. అందుకే ఇప్పుడు— “ఇకపై దర్శకత్వం చేస్తా, కానీ సరైన సమయం వచ్చినప్పుడు మాత్రమే”. అని చెప్పాడు. ‘తెలుసు కదా!’ సినిమాలో ఆయన చేసిన వరుణ్‌ పాత్ర పూర్తిగా భిన్నమైనదని చెబుతున్నారు. అదే విజయవంతమైతే, ఆయనను “టిల్లు జోన్” నుంచి బయటకు తీసుకువచ్చే పాత్ర అవుతుంది.
చివరగా ఒక మాటలో చెప్పాలంటే — సిద్ధు జొన్నలగడ్డ కంట్రోల్‌ ఫ్రీక్‌ కాదు, ప్యాషన్‌ ఫ్రీక్‌. కానీ ఆ ప్యాషన్‌కి ఒక పరిమితి అవసరం.
ఎందుకంటే ప్రతి సారి తానే నడిపే సినిమా చేస్తే, ఏదో ఒక రోజు ఆయన నటనలోని స్వేచ్ఛే పోతుంది.
సినిమాలో హీరో వరుణ్‌, బయట సిద్దు కూడా అదే — కంట్రోల్‌కి బదులు క్రియేటివిటీకి బానిస! 🎥🔥