War 2 Review | హృతిక్–జూనియర్ ఎన్టీఆర్ కాంబోతో “వార్ 2″లో గ్లోబల్ యాక్షన్, స్టైల్ మెప్పించినా… ఊహించదగిన కథనం, బలహీన స్క్రీన్ప్లే కాస్తా ఉత్సాహాన్ని తగ్గించాయి.
సినిమా : వార్ 2
బ్యానర్ : యశ్రాజ్ ఫిల్మ్స్
నటీనటులు : హృతిక్ రోషన్, ఎన్టీఆర్, కియరా అద్వానీ, అనిల్ కపూర్, అశుతోష్ రాణా, తదితరులు,
కథ : ఆదిత్య చోప్రా
స్క్రీన్ప్లే : శ్రీధర్ రాఘవన్
ఫోటోగ్రఫీ : బెంజమిన్ జాస్పర్ ఏసీఎస్
సంగీతం : ప్రీతం
నేపథ్య సంగీతం : సంచిత్ బల్హరా, అంకిత్ బల్హరా
ఎడిటింగ్ : ఆరిఫ్ షేక్
నిర్మాత : ఆదిత్య చోప్రా
దర్శకత్వం : ఆయాన్ ముఖర్జీ
విడుదల : ఆగస్టు 14, 2025
హిందీ సినీ ప్రపంచంలో యశ్రాజ్ స్పై యూనివర్స్ అనగానే ప్రేక్షకుల్లో ఒక రకమైన ఉత్కంఠ, అంచనాలు సహజం. “వార్” తొలి భాగం హృతిక్ రోషన్–టైగర్ శ్రాఫ్ కలయికతో సూపర్‌హిట్ అయిన తర్వాత, దాని కొనసాగింపుగా వస్తున్న “వార్ 2”లో హృతిక్తో జూనియర్ ఎన్టీఆర్ కలవడం, అది ఆయన బాలీవుడ్ అరంగేట్రం కావడం వల్ల దేశవ్యాప్తంగా ఆసక్తి మరింత పెరిగింది.
స్వాతంత్ర్య దినోత్సవం ముందురోజు విడుదలైన ఈ చిత్రం, భారీ స్కేల్, గ్లోబల్ లొకేషన్లు, అత్యాధునిక యాక్షన్ సీక్వెన్స్‌లతో ప్రేక్షకులను ఆకట్టుకునే ప్రయత్నం చేసింది. కానీ కథన పరంగా ఈ చిత్రానికి ఎలాంటి కొత్తదనం అందించగలిగిందనే ప్రశ్నతో ప్రేక్షకులు థియేటర్‌ నుంచి బయటకు వస్తున్నారు.
కథా నేపథ్యం
రా ఏజెంట్ కబీర్ (హృతిక్ రోషన్) – తన దేశానికి నిబద్ధతతో పనిచేసే సీక్రెట్ ఆపరేటివ్. కానీ అనుకోని పరిణామాల్లో అతను తన మెంటర్, రా చీఫ్ లూథ్రాను (అశుతోష్ రాణా) హతమారుస్తాడు. ఇదే సమయంలో, కొన్ని శక్తివంతమైన దేశాలు భారత్‌ను బలహీన పరచాలనే ఉద్దేశంతో ‘కాళీ కార్టెల్’ అనే నెట్వర్క్ను ఏర్పాటు చేస్తాయి. ఈ ముఠాతో చేతులు కలిపిన కబీర్‌ను ఆపడానికి రా మరో ఏజెంట్ విక్రమ్ చలపతిని (జూనియర్ ఎన్టీఆర్) మిషన్‌లోకి దింపుతుంది.
ఈ మిషన్ ఒక సాధారణ ఆపరేషన్ కాదని, ఇద్దరి మధ్య బాల్యం నుంచే ఉన్న బంధం, ఆ బంధానికి సంబంధించిన పాత రహస్యాలు కథలో మలుపులు తీసుకొస్తాయి. “ఎవరు నిజమైన దేశభక్తుడు?” అనే ప్రశ్న చివరి వరకు ఉత్కంఠ రేపుతుంది.
నటన విశ్లేషణ
హృతిక్ రోషన్ – తన పాత్రలో ఆత్మవిశ్వాసం, స్టైల్, యాక్షన్ హంగామాతో మళ్లీ ఒకసారి తెరను ఆక్రమించాడు. జపాన్‌లోని ప్రారంభ యాక్షన్ సీన్, యూరప్ చేజ్ సీక్వెన్స్, క్లైమాక్స్ పోరాటం – అన్నింటిలోనూ అతని ప్రెజెన్స్ అద్భుతం.
జూనియర్ ఎన్టీఆర్ – బాలీవుడ్‌లో మొదటి ప్రయత్నంలోనే గ్లోబల్ లుక్, యాక్షన్ టైమింగ్‌తో ఆకట్టుకున్నాడు. విక్రమ్ పాత్రకు ఉన్న భావోద్వేగ లక్షణాలు ఆయన నటనలో కనిపించినా, మాస్ హైపాయింట్లు తక్కువగా ఉండటం కొద్దిగా నిరాశ కలిగించింది.
కియారా అద్వాణీ – గ్లామర్, కొంత యాక్షన్ ఉన్నా పాత్రకు తగిన ప్రాధాన్యం లేదు.
అనిల్ కపూర్, అశుతోష్ రాణా – పరిమిత సన్నివేశాలలోనే తమ ప్రతిభను చూపించారు.
సాంకేతికంగా
• సినిమాటోగ్రఫీ (బెంజమిన్ జాస్పర్) – హాలీవుడ్ రేంజ్ విజువల్స్, విస్తృతమైన విదేశీ లొకేషన్ల సౌందర్యం స్క్రీన్‌పై అద్భుతంగా కుదిరాయి.
• యాక్షన్ – మిషన్ ఇంపాజిబుల్ తరహా చేజింగ్ సీక్వెన్స్‌లు, ట్రైన్ ఫైట్, వైమానిక యాక్షన్ హైలైట్.
• సంగీతం (ప్రీతమ్) – పాటలు సాధారణ స్థాయిలో ఉండి, గుర్తుండిపోయేలా లేవు. కానీ సంచిత్–అంకిత్ బాల్హారా బ్యాక్‌గ్రౌండ్ స్కోర్ యాక్షన్ సన్నివేశాలలో వేగాన్ని పెంచింది.
• ఎడిటింగ్ – కథనానికి వేగం తెచ్చేలా మరింత కట్టుదిట్టంగా చేయాల్సింది.
బలహీనతలు
• ఊహించదగిన స్క్రీన్ప్లే – హీరో, విలన్ పాత్రలు తరచూ మారుతూ ఉండే సాధారణ శైలి.
• కబీర్‌కి ఇచ్చిన ‘కల్కి అవతారం’ కాన్సెప్ట్‌ను మధ్యలో ఆపేయడం.
• రెండో భాగంలో భావోద్వేగాలు బలహీనంగా ఉండడం.
• మాస్ ఆడియన్స్‌ను ఉత్సాహపరిచే “హై మొమెంట్స్” లోపం.
విశ్లేషణ & తీర్పు
వార్ 2లో హృతిక్–ఎన్టీఆర్ జోడీని స్క్రీన్‌పై చూడటమే ఒక పెద్ద విజువల్ ఫీస్ట్. అయితే సాధారణంగా ‘వార్’ ఫ్రాంచైజీలో ఎప్పటికీ హృతిక్ రోషన్దే ప్రధాన పాత్ర. అలా అని పోటీ పాత్రను తక్కువ చేయలేం. స్కోప్ ఉన్నంతలో ఎన్టీఆర్ శక్తివంతంగా నటించాడు. ఇంటర్నేషనల్ లొకేషన్లలో చిత్రీకరించిన చేజ్‌లు, స్టంట్ సీక్వెన్స్‌లు, స్టైలిష్ ప్రెజెంటేషన్ అద్భుతంగా ఉన్నాయి. కానీ కథలో కొత్తదనం లేకపోవడం, ఊహించదగిన మలుపులు రావడం వల్ల ఉత్కంఠ తగ్గిపోతుంది. దర్శకుడు ఆయాన్ ముఖర్జీ విజువల్స్, యాక్షన్ పైనే దృష్టి పెట్టడం కాకుండా, కథనం పైన కూడా మరింత వర్క్ చేసిఉంటే ఫలితం ఇంకా బలంగా ఉండేది.
మొత్తం మీద – “వార్ 2″లో యాక్షన్, స్టార్ పవర్, విజువల్స్ అద్భుతమైనా… కథనం బలహీనత వల్ల మొదటి భాగం స్థాయిని అందుకోలేకపోయింది. హృతిక్–ఎన్టీఆర్ ద్వయం కోసం, బిగ్ స్క్రీన్ మీద యాక్షన్ కోసం చూడదగిన చిత్రం. ఎన్టీఆర్ అభిమానులకు కొంతమేరకు నిరాశ తప్పదు.
విధాత రేటింగ్: ⭐⭐⭐☆☆ (3/5)