Varanasi | టాలీవుడ్లో రూపొందుతున్న అత్యంత ప్రతిష్టాత్మక ప్రాజెక్టులలో ‘వారణాసి’ ఒకటిగా నిలుస్తోంది. సూపర్ స్టార్ మహేష్ బాబు, దర్శకధీరుడు ఎస్.ఎస్. రాజమౌళి కలయికలో రూపొందుతున్న ఈ చిత్రం, ఇంకా థియేటర్లకు రాకముందే దేశవిదేశాల్లో భారీ చర్చకు దారి తీస్తోంది. టైటిల్ గ్లింప్స్ విడుదలైనప్పటి నుంచే సోషల్ మీడియాలో ఈ సినిమా పేరు ట్రెండ్ అవుతుండటం, దీనిపై ఉన్న అంచనాల స్థాయిని స్పష్టంగా చూపిస్తోంది. ఈ సినిమాపై తాజాగా మరోసారి చర్చ మొదలైంది. కారణం… ప్రముఖ నిర్మాత నాగ వంశీ చేసిన వ్యాఖ్యలు. ఓ ఇంటర్వ్యూలో ఆయన మాట్లాడుతూ, రాజమౌళి సినిమాల విషయంలో కేవలం దర్శకత్వ ప్రతిభ మాత్రమే కాదు, మార్కెటింగ్ ఆలోచనలు కూడా ప్రత్యేకంగా నిలుస్తాయని ప్రశంసించారు.
టైటిల్ గ్లింప్స్తోనే భారీ ఎంగేజ్మెంట్
నాగ వంశీ మాటల్లో చెప్పాలంటే, ‘వారణాసి’ టైటిల్ గ్లింప్స్ విడుదల చేసిన విధానం తనను ఎంతో ఆశ్చర్యానికి గురి చేసిందట. టీజర్ లేదా ట్రైలర్ కాకుండా, కేవలం సినిమా థీమ్ను పరిచయం చేసే గ్లింప్స్ కోసం అంత పెద్ద స్థాయిలో ఈవెంట్ నిర్వహించడం నిజంగా అరుదైన విషయం అని ఆయన అభిప్రాయపడ్డారు. “ఏ సినిమా తీస్తున్నామో ప్రేక్షకులకు చెప్పడానికే ఇంత గ్రాండ్గా ఆలోచించడం రాజమౌళి ప్రత్యేకత. అందుకే ఆయన సినిమాలు విడుదలకు ముందే ఒక బ్రాండ్గా మారుతాయి” అంటూ నాగ వంశీ వ్యాఖ్యానించారు.
విజువల్స్పై ప్రత్యేక ప్రశంసలు
‘వారణాసి’ గ్లింప్స్లోని విజువల్స్ గురించి మాట్లాడుతూ, అవి అత్యంత హై క్వాలిటీతో రూపొందాయని నాగ వంశీ తెలిపారు. ముఖ్యంగా అంజనేయ స్వామికి సంబంధించిన సన్నివేశాలు అద్భుతంగా ఉన్నాయని, అవి ఐమాక్స్ స్క్రీన్పై చూస్తే అనుభూతి మరింత గొప్పగా ఉంటుందని చెప్పారు. ఈ సందర్భంగా హైదరాబాద్లో మరిన్ని ఐమాక్స్ థియేటర్లు అవసరమని కూడా ఆయన సూచించారు. ఇలాంటి భారీ సినిమాలకు తగిన స్క్రీన్లు ఉండటం భవిష్యత్తులో తప్పనిసరి అవుతుందని అభిప్రాయపడ్డారు.
కథ, పాత్రలపై ఆసక్తికర ప్రచారం
ఇక ఈ సినిమాలో మహేష్ బాబు పలు విభిన్న పాత్రల్లో కనిపించనున్నారన్న ప్రచారం అభిమానుల్లో ఆసక్తిని పెంచుతోంది. ముఖ్యంగా ‘రుద్ర’ అనే పవర్ఫుల్ పాత్రలో ఆయన కనిపిస్తారన్న టాక్ సోషల్ మీడియాలో వైరల్ అవుతోంది. కథానాయికగా ప్రియాంక చోప్రా కీలక పాత్రలో నటిస్తున్నారన్న వార్తలు కూడా సినిమాపై గ్లోబల్ లెవెల్లో బజ్ను పెంచుతున్నాయి. విలన్ పాత్రలో పృథ్వీరాజ్ సుకుమారన్ కనిపిస్తారన్న ప్రచారం మరో అదనపు ఆకర్షణగా మారింది.
ప్రస్తుతం ‘వారణాసి’ షూటింగ్ వివిధ షెడ్యూల్స్లో కొనసాగుతోంది. మహేష్ బాబు తన ప్రధాన భాగాన్ని 2026 నాటికి పూర్తి చేయనున్నారని, ఆ తర్వాత విస్తృత స్థాయిలో పోస్ట్ ప్రొడక్షన్ పనులు చేపట్టి 2027 సమ్మర్లో విడుదల చేయాలని మేకర్స్ ప్లాన్ చేస్తున్నారట.మొత్తానికి, ‘వారణాసి’ విషయంలో రాజమౌళి దర్శకత్వ ప్రతిభతో పాటు ఆయన మార్కెటింగ్ ఆలోచనలు కూడా ఇండస్ట్రీలో మరోసారి చర్చనీయాంశంగా మారాయి. సినిమా విడుదలకు ఇంకా సమయం ఉన్నప్పటికీ, ఇప్పటినుంచే క్రియేట్ అవుతున్న హైప్ ఈ ప్రాజెక్ట్ గ్లోబల్ బాక్సాఫీస్ను ఎంతగా షేక్ చేస్తుందోనన్న ఆసక్తిని మరింత పెంచుతోంది.