హైదరాబాద్: ఆగస్టు 10, ఆదివారం సాయంత్రం 5 గంటల నుండి రాత్రి 10 గంటల వరకు యూసుఫ్గూడా పోలీస్ లైన్స్లో జరగనున్న ‘వార్ 2’ సినిమా ప్రీ రిలీజ్ ఈవెంట్ నేపథ్యంలో హైదరాబాద్ ట్రాఫిక్ పోలీసులు ప్రత్యేక ఆంక్షలు అమలు చేస్తున్నారు. కోట్ల విజయభాస్కర్ రెడ్డి స్టేడియం పరిసర ప్రాంతాల్లో పెద్ద ఎత్తున అభిమానులు తరలివచ్చే అవకాశం ఉండటంతో, రాకపోకల ఇబ్బందులు నివారించేందుకు వాహనదారులు ప్రత్యామ్నాయ మార్గాలు ఉపయోగించాలని సూచించారు. ఈ సందర్భంగా పలు దారిమళ్లింపులు సూచించారు.
రహదారి మళ్లింపులు:
- జూబ్లీహిల్స్ చెక్పోస్ట్ నుంచి కోట్ల విజయభాస్కర్ రెడ్డి స్టేడియం వైపు వెళ్లే వాహనాలు కృష్ణానగర్ జంక్షన్ వద్ద నుండి శ్రీనగర్ కాలనీ–పంజాగుట్ట వైపు మళ్లిస్తారు.
- మైత్రివనం జంక్షన్ నుంచి జూబ్లీహిల్స్ చెక్పోస్ట్, మాధాపూర్ వైపు వెళ్లే వాహనాలు యూసుఫ్గూడా బస్తీ వద్ద నుండి RBI క్వార్టర్స్–కృష్ణానగర్ జంక్షన్–జూబ్లీహిల్స్ చెక్పోస్ట్ వైపు మళ్లించబడతాయి.
- మైత్రివనం జంక్షన్ నుంచి బోరబండ బస్ స్టాప్ వైపు వెళ్లే వాహనాలు సవేరా ఫంక్షన్ హాల్–కృష్ణకాంత్ పార్క్–GTS టెంపుల్–కళ్యాణ్నగర్–మోతినగర్ మార్గం ద్వారా మళ్లించబడతాయి.
- బోరబండ బస్ స్టాప్ నుంచి మైత్రివనం వైపు వెళ్లే వాహనాలు ప్రైమ్ గార్డెన్–మిడ్ల్యాండ్ బేకరీ–GTS కాలనీ–కళ్యాణ్నగర్ జంక్షన్–ఉమేశ్ చంద్ర విగ్రహం యూ-టర్న్–ICICI యూ-టర్న్ మార్గం ద్వారా మళ్లించబడతాయి.
పార్కింగ్ సౌకర్యాలు:
సాధారణ ప్రజల కోసం మెట్రో పార్కింగ్ (జానక్కమ్మతోట 1 & 2), యూసుఫ్గూడా, సవేరా ఫంక్షన్ హాల్, మహమూద్ ఫంక్షన్ హాల్లలో నాలుగు చక్రాల వాహనాల పార్కింగ్ సౌకర్యం కల్పించారు. ప్రయాణ సమయంలో అత్యవసర పరిస్థితుల్లో ట్రాఫిక్ హెల్ప్లైన్ 9010203626కు కాల్ చేయవచ్చని, తాజా ట్రాఫిక్ అప్డేట్స్ కోసం సోషల్ మీడియాలో @Hyderabad Traffic Police (Facebook) మరియు @HYDTP (Twitter) ఫాలో అవ్వాలని పోలీసులు సూచించారు.