Health tips | మీలో అధిక కొలెస్ట్రాల్ సమస్య ఉన్నదా.. అయితే ఈ పండ్లు తప్పక తినండి..!

Thyagi

1 year ago

Health tips : ప్రకృతి ప్రసాదించే ఫలాలు ఆరోగ్యానికి ఎంతో మేలు చేస్తాయి. పండ్లలో పోషకాలు పుష్కలంగా ఉంటాయి. అన్ని పండ్లలో అన్ని పోషకాలు ఉండకపోవచ్చు. కానీ ఏ పండు ప్రత్యేకత ఆ పండుకు ఉంటుంది. అదేవిధంగా ఏ ఒక్క అనారోగ్య సమస్యకు అన్ని పోషకాలు అక్కర్లేదు. కొన్ని సమస్యలకు కొన్ని పోషకాలు మాత్రమే చక్కటి పరిష్కారం చూపుతాయి. కాబట్టి మనలోని అనారోగ్య సమస్యను నిర్మూలించే పోషకాలు ఏ పండులో ఉంటాయో తెలుసుకుని తీసుకోవడం అవసరం. ఆ ప్రకారం చూస్తే చెర్రీ పండ్లలో కొలెస్ట్రాల్‌ను తగ్గించే పోషకాలుంటాయి. అంతేగాక ఈ పండ్లతో ఇంకా ఎన్నో ఆరోగ్య ప్రయోజనాలున్నాయి. వాటి గురించి ఇప్పుడు తెలుసుకుందాం..

ప్రయోజనాలు

చెర్రీ పండ్లలో మన శరీరానికి అవసరమయ్యే ఎన్నో రకాల పోషకాలుంటాయి. చెర్రీలను తినటం వలన వివిధ రకాల అనారోగ్య సమస్యలను దూరం చేసుకోవచ్చని పలు అధ్యయనాలు చెబుతున్నాయి. చెర్రీ పండ్లు తినటంవల్ల శరీరంలో రోగ నిరోధక శక్తిని అమాంతం పెంచుకోవచ్చు.
చెర్రీ పండ్లలో ముఖ్యంగా విటమిన్ సి, యాంటీ ఆక్సిడెంట్లు పుష్కలంగా ఉంటాయి. కాబట్టి అనారోగ్యం కలిగినప్పుడు ఈ పండ్లు తింటే వ్యాధులతో పోరాడే శక్తి మీకు సత్వరమే లభిస్తుంది.
ఈ పండ్లతో జీర్ణశక్తి కూడా మెరుగుపడుతుంది. వ్యాయామం చేసిన తర్వాత వచ్చే కండరాల నొప్పులు, వాపులను కూడా తగ్గించడానికి చెర్రీలు ఎంతగానో దోహదం చేస్తాయి.
అదేవిధంగా నిద్రలేమి సమస్యలతో బాధపడే వారు రోజుకు కొన్ని చెర్రీలను తినడం వలన నిద్ర బాగా పడుతుంది. చెర్రీ పండ్ల కంటే వాటితో చేసిన జ్యూస్‌లను తాగడంవల్ల నిద్ర హాయిగా పడుతుంది.
చెర్రీలలో యాంటీ ఆక్సిడెంట్లు చాలా ఎక్కువ మొత్తంలో ఉంటాయి. ఇవి మీ శరీరంలోని అధిక వేడిని తొలగిస్తాయి. ముఖ్యంగా శరీరంలో ఉండే ‘అధిక కొలెస్ట్రాల్’ను చెర్రీ పండ్లలోని పోషకాలు వెన్నలా కరిగిస్తాయి. తద్వారా మిమ్మల్ని గుండె జబ్బుల ప్రమాదం నుంచి బయటపడేస్తుంది.
వీటన్నిటితోపాటు చెర్రీలలో ఆంథోసైనిన్స్ అనే ఒక రకమైన వర్ణకాలు ఉంటాయి. ఇవి మెదడు కణాలను ఆక్సీకరణ ఒత్తిడి నుండి రక్షిస్తాయి. ఫలితంగా మతిమరుపు, అల్జీమర్స్ సమస్యలు కూడా రాకుండా ఉంటాయి.
చెర్రీ పళ్ళు తినటం వలన వృద్ధాప్యం దరిచేరదు, యవ్వనంగా కనిపిస్తారు. అంతేకాకుండా చెర్రీలను తినటం వల్ల మనకు ఎన్నో రకాల ఆరోగ్య ప్రయోజనాలు చేకూరుతాయి.