Traffic Restrictions | సికింద్రాబాద్ ఉజ్జ‌యిని మహంకాళి బోనాల జాత‌ర నేప‌థ్యంలో హైద‌రాబాద్‌లో ప‌లు ప్రాంతాల్లోట్రాఫిక్ ఆంక్ష‌లు విధించారు పోలీసులు. ఆది, సోమ‌వారాల్లో ఈ ట్రాఫిక్ ఆంక్ష‌లు అమ‌ల్లో ఉండ‌నున్నాయి. బోనాల పండుగ‌కు మహంకాళి జాత‌ర‌కు భ‌క్తులు భారీగా త‌ర‌లివ‌చ్చే అవ‌కాశం ఉంది. దీంతో సికింద్రాబాద్ ప‌రిస‌ర ప్రాంతాలు ర‌ద్దీగా ఉండే అవ‌కాశం ఉంది. దీంతో ఆ ఏరియాకు వచ్చే వాహ‌నాల‌ను దారి మ‌ళ్లించ‌నున్నారు. సికింద్రాబాద్ రైల్వే స్టేషన్కు వెళ్లే వారు త‌మ షెడ్యూల్ కంటే ఒక గంట ముందే చేరుకోవాల‌ని సూచించారు. ప్లాట్ ఫామ్ నంబర్ 1కు వచ్చే వారు.. చిలకలగూడ వైపు నుంచి వ‌చ్చి ప్లాట్ ఫామ్ నంబర్ 10 నుంచి స్టేష‌న్‌లోకి వెళ్లేలా ప్లాన్ చేసుకోవాల‌ని పోలీసులు సూచించారు. మహంకాళి ఆల‌యానికి అన్ని వైపులా రెండు కిలోమీట‌ర్ల ప‌రిధిలో ట్రాఫిక్ ఉండే అవ‌కాశం ఉంద‌న్నారు. ఈ విష‌యాన్ని ప్ర‌యాణికులు, వాహ‌న‌దారులు గ‌మ‌నించాల‌ని పోలీసులు కోరారు.
ఈ మార్గాలు క్లోజ్..
- మహంకాళి ఆలయం, టోబాకో బజార్‌, హిల్‌ స్ట్రీట్‌ రూట్‌లో ట్రాఫిక్ రాకపోకలు పూర్తిగా నిలిపివేసి, రోడ్లను మూసివేస్తారు.
- సుభాష్‌ రోడ్డు, బాటా చౌరస్తా, రాంగోపాల్‌పేట్‌ పీఎస్‌, సికింద్రాబాద్ మార్గాలను మూసివేస్తారు.
అడవయ్య రోడ్డు మార్గాలను మూసివేస్తారు.
- జనరల్‌ బజార్‌ నుంచి ఆలయ మార్గం రోడ్డు మూసివేస్తారు.
- సికింద్రాబాద్ రైల్వే స్టేషన్‌, సెయింట్‌ మేరీ రూట్‌ మార్గాలను మూసేస్తారు.
దారి మళ్లింపు ఇలా..
- కర్బాల మైదాన్‌ నుంచి వచ్చే సాధారణ ట్రాఫిక్, ఆర్టీసీ బస్సులను రాణిగంజ్‌ ఎక్స్‌ రోడ్డులో మినిస్టర్‌ రోడ్డు వైపున‌కు దారి మ‌ళ్లిస్తారు.
- రైల్వే స్టేషన్‌ నుంచి ట్యాంక్‌బండ్‌ వైపు వెళ్లే ఆర్టీసీ బస్సులు చిలకలగూడ క్రాస్‌రోడ్స్‌, గాంధీ హాస్పిటల్‌, ముషీరాబాద్‌ క్రాస్‌ రోడ్‌, కవాడిగూడ, మారియ‌ట్ హోటల్‌ ట్యాంక్‌బండ్‌ రూట్‌లో వెళ్లాలి.
- తాడ్‌బన్‌ వైపు వెళ్లే బస్సులు క్లాక్‌టవర్‌, ప్యాట్నీ ఎక్స్‌ రోడ్డు, వైఎంసీఏ, ఎస్‌బీహెచ్‌ ఎక్స్‌ రోడ్స్‌ మీదుగా వెళ్లాలి.
- పంజాగుట్ట నుంచి సికింద్రాబాద్ రైల్వే స్టేషన్కు పంజాగుట్ట, ఖైరతాబాద్‌ జంక్షన్‌, ఐమ్యాక్స్‌ రోటరీ, తెలుగుతల్లి ఫ్లైఓవర్‌, లోయర్‌ ట్యాంక్‌బండ్‌, ఆర్టీసీ ఎక్స్‌ రోడ్డు, ముషీరాబాద్‌ ఎక్స్‌ రోడ్డు, గాంధీ హాస్పిటల్‌, చిలకలగూడ క్రాస్‌ రోడ్డు, ప్లాట్ ఫామ్ నంబర్ 10కు రాకపోకలు సాగించాలి.
- సికింద్రాబాద్ రైల్వే స్టేషన్‌ నుంచి ప్యాట్నీ, ప్యారడైజ్‌, బేగంపేట్‌, పంజాగుట్ట రూట్లల్లో వెళ్లరాదు. ఆ రూట్లలో భారీగా రద్దీ ఉంటుంది.
- సికింద్రాబాద్ రైల్వే స్టేషన్‌ నుంచి హకీంపేట, బోయిన్‌పల్లి, బాలానగర్‌, అమీర్‌పేట వెళ్లే వాహనాలు క్లాక్‌ టవర్‌ నుంచి వయా ప్యాట్నీ, ఎస్‌బీహెచ్‌ వైపు నుంచి వెళ్లాలి.
