విధాత, వరంగల్ ప్రతినిధి:
వరంగల్ నగర అభివృద్ధికి కేంద్ర ప్రభుత్వం ప్రత్యేక శ్రద్ధ వహిస్తుందని కేంద్ర బొగ్గు, గనుల శాఖ మంత్రి జీ.కిషన్ రెడ్డి అన్నారు. శనివారం నగరం లో చేపట్టిన వివిధ పనులను పరిశీలించారు. వరంగల్ రైల్వే స్టేషన్, వేయిస్తంభాల ఆలయంలో కళ్యాణ మండపం పనుల పురోగతిని తెలుసుకున్నారు.తదుపరి కాకతీయ పట్టణాభివృద్ధి సంస్థ ,జీ డబ్ల్యూ ఎం సి ,ఆర్కియాలజీ,స్మార్ట్ సిటీ తదితర అభివృద్ధి పనుల పురోగతిని సమీక్షించారు. అయోధ్యపురం లోని రైల్వే మాన్యుఫాక్చరింగ్ యూనిట్ (ఆర్ ఎం యు)ను సందర్శించారు. అనంతరం మంత్రి మీడియాతో మాట్లాడారు. కేంద్రం అభివృద్ధి చేస్తున్న రైల్వే స్టేషన్లలో మొదటగా వరంగల్ రైల్వే స్టేషన్ పూర్తయింది.
కాకతీయ మెగా టెక్స్ టైల్ పార్కులో ఎవర్ టాప్ టెక్స్ అనే కొరియా కంపెనీ రూ.1100 కోట్ల మేర పెట్టుబడులు పెట్టనుంది. 11 వేల మందికి ఉపాధి కల్పిస్తామని ఒప్పందం చేసుకుందన్నారు.వరంగల్ మామునూరు ఎయిర్ పోర్టు భూసేకరణ త్వరగా పూర్తిచేసి ఎయిర్ పోర్టు అథారిటీకి అందజేస్తే త్వరగా నిర్మాణం ప్రారంభించాలని కేంద్ర ప్రభుత్వం భావిస్తోంది. కాజీపేటలోని రైల్ మానుఫ్యాక్చరింగ్ యూనిట్ పనులు వచ్చే ఏడాది పూర్తి అవుతాయని భావిస్తున్నాను.
పత్తి కొనుగోళ్లకు సంబంధించి రైతులకు ఇబ్బంది కలగకుండా చర్యలు తీసుకోవాలని సీసీఏ అధికారులను ఆదేశించానని చెప్పారు. ఈ కార్యక్రమం లో బల్దియా కమిషనర్ చాహత్ బాజ్ పాయ్, కార్పొరేటర్ లు గుజ్జుల వసంత, చాడ స్వాతి, రావుల కోమల కిషన్, డి ఆర్ ఓ విజయలక్షి, కుడా సి పి ఓ అజిత్ రెడ్డి, బల్దియా ఎస్ ఈ సత్యనారాయణ గంట రవి, సీతారాం నాయక్, అరూరి రమేష్ ,కొండేటి శ్రీధర్, ధర్మారావు, వన్నాల శ్రీరాములు, రావు పద్మ తదితరులు పాల్గొన్నారు.