Actress | తెలుగు సినిమాలు, టెలివిజన్ రంగాల్లో మూడు దశాబ్దాలకు పైగా నటిస్తూ, 300కి పైగా చిత్రాలు, 20కుపైగా సీరియల్స్‌లో అమ్మగా, వదినగా, అక్కగా, విలన్ పాత్రల్లో ప్రేక్షకులను మెప్పించిన సీనియర్ నటి మిర్చి మాధవి. తాజాగా ఆమె ఇండస్ట్రీలోని చీకటి నిజాలను బహిర్గతం చేశారు. తాజాగా ఇచ్చిన ఓ ఇంటర్వ్యూలో ఆమె చేసిన వ్యాఖ్యలు పెద్ద సంచలనం రేపుతున్నాయి. ‘మిర్చి’ సినిమాతో గుర్తింపు పొందిన మాధవి, ‘గుప్పెడంత మనసు’లో దేవయానిగా, ప్రస్తుతం ‘ఇల్లు ఇల్లాలు పిల్లలు’లో భాగ్యంగా నటిస్తూ చిన్న తెరపై ప్రత్యేక గుర్తింపు తెచ్చుకుంది. సినిమా ఆఫర్ల పేరుతో కొందరి పెట్టే వేధింపులను, మహిళా పాత్రల విషయంలో ఉన్న డబుల్ స్టాండర్డ్స్‌ను నిర్భయంగా బయటపెట్టారు.
“ఏజ్ ఎక్కువ… లావు… అంటూ ముఖంపైనే అంటారు”
సీనియర్ నటి మాధవి మాట్లాడుతూ.. “ఏజ్ ఎక్కువ అంటారు, లావు అంటారు… కానీ చిన్నప్పుడు, సన్నగా ఉన్నప్పుడు ఎందుకు అవకాశాలు ఇవ్వలేదో?” అని ప్రశ్నించారు. మహిళ పాత్రలను సహజంగా చూపించాలని , నిజ జీవితానికి దగ్గరగా కనిపించే నటీమణులను తిరస్కరించడం పూర్తిగా అన్యాయం అని వ్యాఖ్యానించారు. ఇంట్లో ఉండే ఆడాళ్లలా సహజంగా నటించాలి అంటారు, కానీ వాళ్లలాగా సహజంగా ఉండడానికి వీల్లేదు అంటారు. ఇది దురదృష్టం కాదు… దౌర్భాగ్యం” అని స్పష్టం చేశారు.
క్యాస్టింగ్ కౌచ్ పై సంచలన వ్యాఖ్యలు
క్యాస్టింగ్ కౌచ్ విషయంలో మాట్లాడిన ఆమె.. “క్లోజ్డ్ రూంలోకి ఇష్టం లేకుండా ఎవరూ వెళ్లరు. వెళ్లినవాళ్లు లాభం కలగకపోతే బయటకు వచ్చి గొడవ చేయడం కరెక్ట్ కాదు” అని అన్నారు.ఎవరి అవసరమైతే వాళ్లు తీసుకునే నిర్ణయాలను తరువాత విమర్శించడం తప్పు అని అభిప్రాయపడ్డారు. ఇక త‌న‌కు ఎదురైన షాకింగ్ అనుభవాన్నీ ఆమె ఈ సందర్భంగా వెల్లడించారు. సుమారు 12 ఏళ్ల క్రితం, ఓ దర్శకుడు తన ఇంటికి వచ్చి రోల్ కోసం స్క్రీన్ టెస్ట్ పేరుతో అనుచిత డిమాండ్లు చేశాడని తెలిపారు.
“కాటన్ సారీ కాదు… సింథటిక్ సారీ కట్టుకోండి… నడుము చూపించండి” అని అన‌డంతో.. లేరా పైకి… చెప్పు తీసుకుని కొడతాను అంటూ ఇంటి బయటకు తోసేయాల్సి వచ్చిందని చెప్పుకొచ్చింది.మరొక ఘటనలో,. ‘100% లవ్’ తర్వాత చేసిన సినిమాలో ప్ర‌కాశ్ రాజ్ పక్కన వైఫ్ రోల్ కోసం కాంప్రమైజ్ అయితే అవకాశం ఇస్తామని ఒకరు చెప్పారు, అప్పుడు నేను అలాంటి దాన్ని కాదు సార్. డబ్బు కోసమే అయితే వేరే పని చేసేదాన్ని” అంటూ ఆయన ఆఫర్‌ను తిరస్కరించానని చెప్పారు.
ఇండస్ట్రీలో ఇంకా ఉన్న లోపాలను బయటపెట్టిన మాధవి
తన అనుభవాలను బహిర్గతం చేస్తూ మాథవి, మహిళా నటీమణులపై జరిగే వివక్ష, క్యారెక్టర్ ఆర్టిస్టులపై చూపించే నిర్లక్ష్యం, మరియు వ్యక్తిగత స్వేచ్ఛకు భంగం కలిగించే ప్రయత్నాల గురించి ఒక్కొక్కటిగా బయటపెట్టారు. ఆమె వ్యాఖ్యలు ప్రస్తుతం టాలీవుడ్‌లో పెద్ద చర్చనీయాంశంగా మారాయి.