Champion | టాలీవుడ్ యంగ్ హీరో రోషన్ మేకా (Roshan Meka) లీడ్ రోల్లో నటించిన పీరియాడిక్ యాక్షన్ డ్రామా ‘ఛాంపియన్’ ఎట్టకేలకి ఓటీటీ ప్రేక్షకుల ముందుకు వచ్చేసింది. థియేటర్లలో విడుదలైన తర్వాత మిక్స్డ్ స్పందన పొందిన ఈ సినిమా, తాజాగా ప్రముఖ ఓటీటీ ప్లాట్ఫామ్ నెట్ఫ్లిక్స్లో స్ట్రీమింగ్ అవుతోంది.నిజాం పాలన కాలంలో కొనసాగిన రజాకార్ వ్యవస్థను నేపథ్యంగా తీసుకుని తెరకెక్కిన ఈ చిత్రానికి ప్రదీప్ అద్వైతం దర్శకత్వం వహించారు. చారిత్రక నేపథ్యం, యాక్షన్ ఎలిమెంట్స్ కలగలిపి రూపొందించిన ఈ సినిమాలో రోషన్ మేకా పాత్రకు మంచి ప్రాధాన్యత ఉంది. హీరోయిన్గా మలయాళ నటి అనశ్వర రాజన్ నటించి తన పాత్రకు న్యాయం చేశారు.
ప్రస్తుతం ‘ఛాంపియన్’ సినిమా నెట్ఫ్లిక్స్లో తెలుగు, తమిళం, కన్నడ, మలయాళ భాషలతో పాటు ఇంగ్లిష్ సబ్టైటిల్స్తో అందుబాటులో ఉంది. థియేటర్ రిలీజ్ అయిన సుమారు ఐదు వారాలకే ఈ సినిమా ఓటీటీకి రావడం విశేషం. అయితే హిందీ వెర్షన్ స్ట్రీమింగ్పై ఇప్పటివరకు స్పష్టమైన సమాచారం లేదు.ఈ చిత్రాన్ని స్వప్న సినిమా, ఆనంది ఆర్ట్ క్రియేషన్స్, కాన్సెప్ట్ ఫిలిమ్స్ బ్యానర్లపై ప్రియాంకా దత్, జీకే మోహన్, జెమిని కిరణ్ కలిసి నిర్మించగా, జీ స్టూడియోస్ ఈ సినిమాను ప్రెజెంట్ చేసింది. కీలక పాత్రల్లో నందమూరి కళ్యాణ చక్రవర్తి, మురళీ శర్మ, సంతోష్ ప్రతాప్ నటించారు. సినిమాకు మిక్కీ జే మేయర్ సంగీతం అందించగా, ఆయన బ్యాక్గ్రౌండ్ స్కోర్కు మంచి ప్రశంసలు లభించాయి.
బాక్సాఫీస్ పరంగా చూస్తే, 2025 డిసెంబర్లో విడుదలైన ‘చాంపియన్’ ప్రపంచవ్యాప్తంగా సుమారు ₹17 కోట్ల గ్రాస్ కలెక్షన్లు సాధించింది. ఇండియాలో నెట్ కలెక్షన్స్ సుమారు ₹12.40 కోట్లుగా నమోదయ్యాయి. విడుదలైన తొలి నాలుగు రోజుల్లోనే ప్రపంచవ్యాప్తంగా ₹11.5 కోట్లకు పైగా వసూలు చేయడం గమనార్హం. తెలుగు రాష్ట్రాల్లో ఓపెనింగ్ బాగానే ఉన్నప్పటికీ, తొలి వీకెండ్ తర్వాత కలెక్షన్లు క్రమంగా తగ్గాయి.రోషన్ మేకా నటనకు ప్రేక్షకులు, విమర్శకుల నుంచి మంచి స్పందన వచ్చినప్పటికీ, కథనం పేసింగ్ మరియు ట్రీట్మెంట్పై మిశ్రమ అభిప్రాయాలు రావడంతో సినిమా బ్రేక్ ఈవెన్ టార్గెట్ను చేరుకోలేకపోయింది. ఫలితంగా నిర్మాతలకు నష్టాలు ఎదురయ్యాయని ట్రేడ్ వర్గాలు అంచనా వేస్తున్నాయి.
ఇప్పుడు థియేటర్ పరంగా ఆశించిన ఫలితం రాకపోయినా, ఓటీటీ వేదికగా ‘చాంపియన్’కు మరో అవకాశం దక్కింది. పీరియాడిక్ యాక్షన్ డ్రామాలు ఇష్టపడే ప్రేక్షకులు, థియేటర్లలో ఈ సినిమాను మిస్ అయినవారు ఇప్పుడు నెట్ఫ్లిక్స్లో వీక్షించి తమ అభిప్రాయం వ్యక్తం చేసే అవకాశం ఉంది.