Naga Puja Miracle| పుట్టకు పూజలు..నాగయ్య ప్రత్యక్షం

విధాత, : కార్తీక మాసంలో భక్తులు నాగదేవతలకు పూజలు చేయడం కొనసాగుతుంది. భక్తులు ఓ వేప చెట్టు కింద ఉన్న పుట్ట వద్ద పూజలు చేస్తున్న క్రమంలో అకస్మాత్తుగా భారీ నాగుపాము ప్రత్యక్షమవ్వడం వైరల్ గా మారింది. ఏలూరు జిల్లా జంగారెడ్డిగూడెం పట్టణం సమీపంలో ఈ అరుదైన ఘటన చోటుచేసుకుంది. కార్తీక మాసం సందర్భంగా భక్తులు స్థానిక పెరంపేట రోడ్డులో బాట గంగానమ్మ ఆలయ సమీపంలో వేప చెట్టు కింద ఉన్న పుట్టలో పాలు పోసి పూజలు చేస్తున్నారు. ఇదే సమయంలో పుట్ట నుంచి ఓ భారీ నాగుపాము ప్రత్యక్షమై పడగ విప్పి భక్తుల ముందు సాక్ష్యాత్కరించింది. ఆశ్చర్యపోయిన భక్తులు ఇదంతా దైవ మహిమగా భావించి భయపడకుండా ఆ నాగుపామును దర్శించుకుని పూజలు చేయడం ఆరంభించారు.

చిత్రంగా ఆ నాగుపాము కూడా భక్తుల హడావుడికి చిరాకు పడకుండా పడగవిప్పి నిశ్చలంగా నిలుచుని వారి పూజలందుకునంది. భక్తులు భక్తి తన్మయత్వంతో ఆ నాగుపాము పడగపై పసుపు కుంకుమలు చల్లినా..నీళ్లు, పాలు చల్లినా ఏమి అనకుండా తనకిది అలవాటేనన్నట్లుగా వారి పూజలను అందుకోవడం అందరిని మరింత ఆశ్చర్యపరించింది. నాగయ్య ప్రత్యక్షం సమాచారం తెలుసుకున్న భక్తులు పెద్ద సంఖ్యలో తరలివచ్చి పూజలు చేస్తుండంతో ఆ ప్రాంతమంతా భక్తజన కోలాహలంతో సందడిగా మారిపోయింది. కార్తీక మాసంలో ఇలా నాగు పాము దర్శనంతో భక్తులు సంతోషం వ్యక్తం చేస్తున్నారు.