వెర్సటైల్ యాక్టర్ ప్రియదర్శి, ద్రిషిక చందర్ హీరో హీరోయిన్లుగా నటించిన సినిమా ‘సుయోధన’. వైఎస్ మాధవ్ రెడ్డి దర్శకత్వంలో తెరకెక్కిన ఈ చిత్రంను ప్రజ్వలా లైన్ క్రియేషన్స్ బ్యానర్పై బోసుబాబు నిడుమోలు నిర్మించారు. సీనియర్లు సాయికుమార్, ప్రేమ కీలక పాత్రలు పోషించారు. శ్రీరామ నవమి సందర్భంగా సుయోధన ఈరోజు ప్రేక్షల ముందుకు వచ్చింది డైరెక్టర్ సుకుమార్కు ఏకలవ్య శిష్యుడిగా, ఆయన తీసిన ‘వన్: నేనొక్కడినే’ స్ఫూర్తితో ఈ కథ రాసుకున్నానని ప్రీ రిలీజ్ ఈవెంట్లో దర్శకుడు చెప్పారు. అలానే ప్రేక్షకుల ఊహకు అందనంత ఆసక్తికరంగా సాగే చిత్రమిది హీరో అన్నారు. మరి దర్శకుడు, హీరో అంచనాలు నిజమయ్యాయా? అనేది రివ్యూలో చూద్దాం.
కథ:
వరుణ్ (ప్రియదర్శి) ఒక ఫోలీ ఆర్టిస్ట్ — సినిమాల్లో వినిపించే శబ్దాలను సృష్టించే వ్యక్తి. చిన్నప్పటి నుంచే అతనికి “సుయోధన” అనే శబ్దం వినిపిస్తూ ఉంటుంది. ఆ శబ్దం వినిపించినప్పుడల్లా అతనికి దుర్యోధనుడి రూపం కనిపించడం అతడిని భయపెడుతుంది. అతని తండ్రి ప్రకాష్ (సాయికుమార్) రంగస్థల నటుడు, దుర్యోధనుడి పాత్రలో ప్రసిద్ధి. కొడుకి భయం కారణంగా ఆయన ఆ నాటకాలు మానేస్తాడు. కాలక్రమేణా వరుణ్ పెద్దయ్యాక తన సొంత ఫోలీ స్టూడియో నడుపుతూ జీవితం సాగిస్తాడు. ఇదే సమయంలో సమిత (ద్రిషిక చందర్) అనే యువతి అతని జీవితంలోకి వస్తుంది. ఆమె షూట్ చేసిన ఒక వీడియోలో కనిపించే పాత్ర వరుణ్కు మళ్లీ దుర్యోధనుడిలా కనిపిస్తుంది. ఈ విచిత్ర అనుభవాల వెనుక ఏదో ప్రమాద సంకేతం ఉందని గ్రహించిన వరుణ్… నిజాన్ని తెలుసుకునే ప్రయత్నంలో దిగుతాడు. ఇదే సమయంలో అతని తండ్రిపై హత్యాయత్నం జరుగుతుంది. ఆ ఘటనలో ప్రకాష్ మరణిస్తాడు. అసలు హంతకుడు ఎవరు? రాజకీయ నేపథ్యం ఏమిటి? వరుణ్కు వినిపించే “సుయోధన” శబ్దం వెనుక రహస్యం ఏమిటి? అనేది సినిమా చూసి తెలుసుకోవాల్సిందే.
విశ్లేషణ:
‘సుయోధన’ ప్రధానంగా సైకలాజికల్ థ్రిల్లర్ అయినప్పటికీ, దానిలో పొలిటికల్ డ్రామా, భావోద్వేగ అంశాలు మేళవించబడ్డాయి. ముఖ్యంగా ‘ఫోలీ ఆర్టిస్ట్’ అనే కాన్సెప్ట్ను కథలో కీలకంగా వినియోగించడం కొత్తదనాన్ని తెచ్చింది. శబ్దాల రూపకల్పన ఎలా జరుగుతుందో చూపించిన విధానం ఆసక్తికరంగా ఉంటుంది. దర్శకుడు వైఎస్ మాధవ్ రెడ్డి మొదటి సినిమాతోనే మంచి పట్టుదల చూపించాడు. కథను సస్పెన్స్తో నడిపిస్తూ ప్రేక్షకుడిని “తర్వాత ఏమవుతుందా?” అనే ఉత్కంఠలో ఉంచడంలో విజయవంతమయ్యాడు. కొన్ని ట్విస్టులు బాగా పనిచేస్తాయి. ముఖ్యంగా సౌండ్ డిజైన్ సినిమాకు హైలైట్గా నిలిచింది. అయితే, ఫస్ట్ హాఫ్లో కొన్ని సన్నివేశాలు నెమ్మదిగా అనిపిస్తాయి. ఇన్వెస్టిగేషన్ భాగాన్ని ఇంకాస్త బలంగా తీర్చిదిద్దితే మరింత ఇంపాక్ట్ వచ్చేది. కానీ సెకండ్ హాఫ్ మాత్రం కథను బాగా ముందుకు తీసుకెళ్తుంది.
నటీనటులు:
ప్రియదర్శి తన పాత్రలో నిగూఢమైన భావోద్వేగాలను చక్కగా వ్యక్తపరిచాడు. ఇది అతని కెరీర్లో గుర్తుండిపోయే పాత్రల్లో ఒకటిగా నిలుస్తుంది. సాయికుమార్ తన అనుభవంతో మరోసారి మెప్పించాడు — ముఖ్యంగా దుర్యోధనుడి ఛాయలతో కనిపించే సన్నివేశాల్లో ఆయన ప్రభావం స్పష్టంగా ఉంటుంది.ప్రేమ తల్లి పాత్రలో సహజంగా నటించింది. ద్రిషిక చందర్కు కూడా కథలో ప్రాధాన్యం ఉన్న పాత్ర దక్కింది. ఇతర పాత్రల్లో కనిపించిన నటీనటులు తమ పరిధిలో బాగా చేశారు. సాంకేతికంగా చూస్తే సంగీతం, సౌండ్ ఎఫెక్ట్స్ సినిమాకు ప్రధాన బలం. రొటీన్ కమర్షియల్ ఫార్మాట్కు భిన్నంగా, కాన్సెప్ట్ ఆధారిత సస్పెన్స్ థ్రిల్లర్ చూడాలనుకునే వారికి ‘సుయోధన’ మంచి ఎంపిక. చిన్న లోపాలు ఉన్నప్పటికీ, కొత్త ప్రయత్నం కావడంతో ఒకసారి చూసేయవచ్చు.
Rating: 3/5