Dental Surgeon : డాక్టర్ కు మాయ లేడీ వల..14కోట్లు హాంఫట్ !

హైదరాబాద్‌కు చెందిన ఓ డెంటల్ డాక్టర్‌ను మోనికా మాధవన్ అనే మహిళ ఫేస్‌బుక్ ద్వారా పరిచయం చేసుకొని, నకిలీ క్రిప్టో ట్రేడింగ్ వెబ్‌సైట్‌లో పెట్టుబడి పెట్టాలని నమ్మించింది. మొదట లాభాలు చూపించి, ఆ తర్వాత డబ్బులు డ్రా చేయడానికి పన్ను చెల్లించాలని ఒత్తిడి చేసింది.

విధాత, హైదరాబాద్ : ఫేస్‌బుక్‌లో హాయ్ అని మెసేజ్ పెట్టిన మౌనిక అనే మాయ లేడీ ఉచ్చులో పడిన హైదరాబాద్‌ చెందిన ఓ డాక్టర్‌ రూ.14కోట్లు పోగొట్టుకున్న ఘటన వైరల్ గా మారింది. రాష్ట్ర చరిత్రలో ఒకే సైబర్‌ మోసంలో ఇంత పెద్దమొత్తం పోగొట్టుకున్న ఉదంతం ఇదే మొదటిదని పోలీసులు చెబుతున్నారు. హబ్సీగూడకు చెందిన డెంటల్ డాక్టర్ కు గత ఆగస్టు 27న ఫేస్‌బుక్‌ మెసెంజర్‌ ద్వారా మోనికా మాధవన్‌ అనే పేరుతో ఓ మహిళ నుంచి హాయ్ అని మెసేజ్ వచ్చింది. తాను పెళ్లి పేరుతో మోసపోయానని.. తన విడాకుల కేసు పెండింగ్‌లో ఉందని తన బాధను వెల్లడించింది. అలా పరిచయం పెంచుకున్న మోనికా, డాక్టర్ తో తన పర్సనల్ ఫోటోలు షేర్ చేసుకునేంతగా చనువు పెంచుకుంది.

అనంతరం టెలిగ్రామ్‌ ఐడీ ద్వారా మాట్లాడుకుందామని వైద్యుడికి సూచించింది. ఆ తర్వాత ట్రేడ్ మార్కెట్‌లో డబ్బులు పెడితే డబుల్ అవుతాయని డాక్టర్‌ని నమ్మించింది. షేర్‌ ట్రేడింగ్‌లో తనకు ఐదేళ్లకు పైగా అనుభవముందని చెప్పింది. సీఎంసీ మార్కెట్లలో రోజూ రూ.4-5 లక్షల మేర సంపాదిస్తున్నానని నమ్మబలికింది. ట్రేడింగ్‌ చేసేందుకు పేరు రిజిస్టర్‌ చేసుకోవాలని వెబ్‌సైట్‌ లింక్‌ పంపించింది. క్రిప్టో కరెన్సీ పేరుతో ట్రేడింగ్‌ అకౌంట్‌ ఓపన్‌ చేయించింది. అనంతరం రూ.30 లక్షలు పెట్టుబడి పెట్టాలంటూ సెప్టెంబరు 30న డాక్టర్ ను ఒప్పించింది. మొదటి ట్రేడ్‌లోనే రూ.8.6 లక్షల లాభమొచ్చినట్లు డాక్టర్ వర్చువల్‌ ఖాతాలో కనిపించింది. దీంతో రూ.10 కోట్ల మేర పెట్టుబడి పెట్టాలని ఒత్తిడి చేసింది. ఈ క్రమంలో వైద్యుడు తన ఖాతా నుంచి రూ.85 వేలు ఉపసంహరించుకునే అవకాశం కల్పించి ఎర వేసింది. ఆమె మాటలు నమ్మిన డాక్టర్ రూ.14 కోట్లు పెట్టగా.. కొన్ని రోజుల తర్వాత అకౌంట్‌లో రూ.34 కోట్లు పడినట్లు చూపించింది.

డబ్బులు డ్రా చేద్దామని ప్రయత్నించగా.. డ్రా కాలేదు. దీనిపై మోనికాను ప్రశ్నించగా..డబ్బులు ఉపసంహరించేందుకు పన్ను కింద రూ.7.5 కోట్లు చెల్లించాలని చెప్పింది. దానికి డాక్టర్ నిరాకరించడంతో తన వాటాగా 50% పన్నును యూఎస్‌డీటీ రూపంలో చెల్లిస్తానని, మిగిలిన రూ.3.75 కోట్లను చెల్లించాలని మోనికా తెలిపింది. ఆ తర్వత సీఎంసీ ప్రతినిధులు పంపించిన డాక్యుమెంట్లు అసంబద్ధంగా ఉండటంతో డాక్టర్ కు అనుమానం వచ్చి మోనికాను నిలదీయగా..స్పందించకుండా పోయింది. దీంతో తాను మోసపోయానని గ్రహించిన డాక్టర్..జరిగిన మోసంపై పోలీసులకు ఫిర్యాదు చేశాడు. కేసు నమోదు చేసి పోలీసులు దర్యాప్తు చేపట్టారు.