సాధారణంగా రాపిడో డ్రైవర్ బ్యాంకు ఖాతాలో రూ.5 లక్షలు లేదా రూ.10 లక్షల వరకు డిపాజిట్లు ఉంటాయి. కాని ఆయన ఖాతాలో ఏకంగా రూ.331 కోట్లు డిపాజిట్ అయ్యాయి, డ్రా చేశారు కూడా. ఎనిమిది నెలల వ్యవధిలో ఈ లావాదేవీలు జరగడంతో ఈడీ అధికారులు సైతం ఆశ్చర్యపోయారు. అయితే ఈ బ్యాంకు ఖాతాలకు అక్రమ బెట్టింగ్ యాప్ ను లింక్ చేసి, దీని ద్వారా వచ్చే డబ్బులను డిపాజిట్ చేయడం గమనార్హం.
ఈ మధ్యకాలంలో డబ్బులు సంపాధించి ఎలా ఖర్చు పెట్టాలో తెలియక కొందరు రాజస్థాన్ లో విలాసవంతమైన రాజ మహాళ్లలో వివాహాలు, విందులు నిర్వహిస్తున్నారు. మరికొందరు అయితే విదేశాల్లో పెళ్లిళ్లు నిర్వహించి తమ స్టేటస్ ఇది అని చెప్పుకునే ప్రయత్నం చేస్తున్నారు. అక్రమ మార్గంలో డబ్బులు సంపాదిస్తున్న బడా బాబులు రాజస్థాన్ తో పాటు విదేశాలలో హంగూ ఆర్బాటాలతో వివాహాది కార్యక్రమాలు నిర్వహిస్తున్నారు. ఈడీ అధికారులు వన్ ఎక్స్ బెట్ ఆన్ లైన్ బెట్టింగ్ యాప్ పై మనీ లాండరింగ్ కేసు నమోదు చేసి విచారిస్తున్నారు. ఈ యాప్ కు ఉదయ్ పూర్ లోని రాపిడో బైక్ డ్రైవర్ బ్యాంకు ఖాతా కు లింక్ అయ్యి ఉంది. 2024 ఆగస్టు 19వ తేదీ నుంచి 2025 ఏప్రిల్ 16వ తేదీ వరకు అతని బ్యాంకు ఖాతాలో రూ.331.36 కోట్లు వచ్చి పడ్డాయి. ఎనిమిది నెలల వ్యవధితో సాధారణ డ్రైవర్ ఖాతాలో ఇంత భారీగా నగదు రావడంతో ఈడీ అధికారులు డ్రైవర్ నివాసంలో తనిఖీలు నిర్వహించారు. బ్యాంకు కు వెళ్లి రికార్డులు పరిశీలించారు. రాపిడో డ్రైవర్ రెండు గదుల ఇంటిలో సాధారణ పౌరుడి మాదిరి నివాసముంటున్నాడు. ఇలా సమకూరిన వందల కోట్ల డబ్బులను ఉదయ్ పూర్ లో ఒక పెద్ద వివాహం కోసం దర్జాగా వినియోగించారు. గుజరాత్ రాష్ట్రానికి చెందిన ఒక యువ రాజకీయ నాయకుడి పెళ్లి కోసం ఖర్చు చేసినట్లు విచారణలో వెల్లడి అయింది. ఆయనకు త్వరలో ఈడీ నోటీసులు పంపించి విచారించనున్నది.
ఈడీ అధికారులు సదరు రాపిడో డ్రైవర్ ను విచారించగా తనకు బ్యాంకు ఖాతా గురించి తెలియదని, పెళ్లి కోసం ఎక్కడ ఖర్చు చేశారో కూడా తనకు కనీసం సమాచారం లేదని వెల్లడించడంతో అవాక్కయ్యారు. అతను చెప్పిన వివరాల ప్రకారం డ్రైవర్ ఆధార్, ఇతర డాక్యుమెంట్లు సేకరించి బ్యాంకు లో ఖాతా తెరిచారని, దానికి బెట్టింగ్ యాప్ నిర్వహాకుడి మొబైల్ లింక్ చేసినట్లు తేలింది. ఇలాంటి వారికి కొంత ముట్టచెప్పి దేశంలో సైబర్ ఫ్రాడ్ కోసం మ్యూల్ ఖతాలను నిర్వహిస్తున్న విషయం తెలిసిందే. ఇది కూడా అదే కోవలోకి వస్తుంది. ఇలాంటి ఖాతాల్లో చేరిన మొత్తాలను అనుమానం రాకుండా వెంటనే వేర్వేరు ఖాతాలకు మళ్లిస్తారు. వన్ ఎక్స్ బెట్ బెట్టింగ్ యాప్ విచారణలో భాగంగా క్రికెటర్లు శిఖార్ థావన్, సురేష్ రైనా లను విచారించారు. వీరిద్దరికి చెందిన కోట్ల రూపాయల విలువైన ఆస్తులను జప్తు చేసిన విషయం తెలిసిందే.