Free AI Course: ఉచిత ఏఐ కోర్సులు ప్రారంభం

దేశంలో డిజిటల్ నాలెడ్జ్ పెంచేందుకు కేంద్ర ప్రభుత్వం 'యువ ఏఐ ఫర్ ఆల్' పేరుతో ఉచిత ఏఐ (AI) ప్రాథమిక కోర్సులను ప్రారంభించింది. ఇందులో కోటి మందికి శిక్షణ ఇవ్వాలని లక్ష్యంగా పెట్టుకుంది.

ఆర్టిఫీషియల్ ఇంటెలీజెన్స్ (ఏఐ) ఇప్పుడు ప్రతి ఒక్కరి నోటా విన్పిస్తోంది. నాలుగైదు దశాబ్ధాల క్రితం టైప్ రైటింగ్ ప్రతి ఒక్కరూ తమ పిల్లలకు నేర్పించారు. ఆ తరువాత కంప్యూటర్లు రావడంతో సీన్ మారిపోయింది. కంప్యూటర్ కోర్సులు నేర్పించారు. తరం మరడంతో పాటు టెక్నాలజీ కూడా కొత్త రూపు సంతరించుకుంటున్నది. ఇప్పుడంతా ఏఐ జపం చేస్తున్నారు. పలు సాఫ్ట్ వేర్ కంపెనీలు ఉచితంగా ఏఐ సేవలు అందిస్తున్నాయి. దీంతో ఎంత మంచి ఉందో అంతకన్నా ఎక్కువగా నష్టాలు, కష్టాలు ఉన్నాయి. ఈ విషయాలను పరిగణనలోకి తీసుకున్న భారత ప్రభుత్వం ఉత్తమ నిర్ణయం తీసుకున్నది. ఆర్టిఫీషియల్ ఇంటెలీజెన్స్ పై ప్రాథమిక కోర్సులను ఉచితంగా అందచేసేందుకు యువ ఏఐ ఫర్ ఆల్ ను ప్రారంభించింది. దేశంలో డిజిటల్ నాలెడ్జ్ పెంపొందించేందుకు ఒక ముందడుగు అని కేంద్ర ఎలక్ట్రానిక్స్ అండ్ ఐటీ మంత్రిత్వ శాఖ వెల్లడించింది.
దేశంలో ప్రతి ఒక్కరికి సునాయసంగా, ఫ్రెండ్లీగా ఏఐ కోర్సులను ఆన్ లైన్ లో నేర్పించనున్నారు. ప్రస్తుతం ఆరు మాడ్యుళ్లలో కోర్సును కేవలం 4.5 గంటల్లో నేర్పించనున్నారు. ప్రతి రోజు మనం వినియోగించేందుకు వీలుగా కోర్సును రూపొందించారు. ఏఐ ఎలా పనిచేస్తుంది, నిత్య జీవితంలో ఎలా ఉపయోగపడుతుంది, స్మార్ట్ ఫోన్లు, డెస్క్ టాప్, ల్యాప్ టాప్ లలో ఎలా వాడాలని వివరిస్తారు. సురక్షితంగా, బాధ్యతాయుతంగా డిజిటల్ టూల్స్ ఎలా వాడాలనేది వివరిస్తారు. ఎలాంటి టెక్నికల్ అవగాహన లేని వారికి కూడా ఈజీగా అర్థమయ్యేలా కోర్సును ఫ్రెండ్లీగా తయారు చేశారు. ఫ్యూచర్ స్కిల్స్ అండ్ ఐజీఓటీ కర్మయోగి తో పాటు ఎడ్యుకేషన్ ఫోర్టళ్లలో ఈ కోర్సులు అందుబాటులో ఉన్నాయి. శిక్షణ పూర్తయిన తరువాత అందరికీ ప్రభుత్వం సర్టిఫికెట్ జారీ చేస్తుంది.

దేశంలో ఒక కోటి మందికి బేసిక్ ఏఐ టూల్స్ స్కిల్స్ నేర్పించాలని కేంద్ర ప్రభుత్వం లక్ష్యంగా పెట్టుకున్నది. పలు ప్రాంతాలు, ప్రజల మధ్య డిజిటల్ ఎడ్యుకేషన్ లో సమానత్వం తీసుకువచ్చేందుకు ఉచిత కోర్సులు ప్రారంభించారు. విద్యా సంస్థల్లో కూడా ఈ కోర్సులను చేర్చి, నేర్పించాలని కూడా సర్క్యూలర్ జారీ చేశారు. ఏఐ కోర్సులు నేర్చుకోవాలనే ఆసక్తి ఉన్నవారు ఫ్యూచర్ స్కిల్స్ ప్రైమ్ డాట్ ఇన్ వెబ్ ఫోర్టల్ లోకి వెళ్లి తమ వివరాలు తొలుత నమోదు చేసుకోవాలి. గూగుల్ లేదా లింక్డ్ ఇన్ ఖాతా తో సైన్ ఇన్ అయ్యి ముందుకు వెళ్లవచ్చు. తమ వ్యక్తిగత వివరాలు, మొబైల్ నెంబర్ నమోదు చేసి రిజిస్ట్రేషన్ పూర్తి చేసుకోవాల్సి ఉంటుంది.