విధాత, జనగామ :
ప్రభుత్వ ప్రైవేటు పాఠశాలలో చదివే విద్యార్థులు శాస్త్రీయ దృక్పథాన్ని అలవరచుకున్నప్పుడే ఉన్నత స్థానానికి చేరుకోగలుగుతారని జనగామ జిల్లా అదనపు కలెక్టర్ జిల్లా విద్యాశాఖ అధికారి పింకేశ్ కుమార్ అన్నారు. స్థానిక సాన్ మారియా ఉన్నత పాఠశాలలో నిర్వహించిన ఇన్‌స్పైర్, సైన్స్ ఫెయిర్ కార్యక్రమం డిఎల్పిసి, డిఎల్‌వి‌పి కార్యక్రమం శనివారం ముగిసింది. ఈ కార్యక్రమానికి ముఖ్య అతిధిగా ఆయన హాజరై మాట్లాడారు. విద్యార్థులు శాస్త్రీయ దృక్పథాన్ని అలవరచుకోవాలని వారి తరగతి గదులలో బోధిస్తున్న విజ్ఞాన శాస్త్రాన్ని వంటపట్టించుకోని బయటి ప్రపంచాన్ని ఆ దృక్పథంతో గమనించాలన్నారు.
నేర్చుకున్న శాస్త్రీయ అంశాలను నిజ జీవితానికి అన్వయించుకొని, వినూత్నంగా ఆలోచించి కొత్త ఆవిష్కరణలకు బీజం వెయ్యాలని సూచించారు. ఈసారి విజేతలుగా నిలువని విద్యార్థులందరూ వచ్చే సంవత్సరం ఇదే కార్యక్రమానికి మరింత మెరుగుగా ప్రాజెక్టు తీసుకొచ్చి వచ్చేసారి విజేతలుగా నిలవాలని సూచించారు. విజేతలందరికీ ఏసీ పింకేశ్ కుమార్ శుభాకాంక్షలు తెలియజేశారు. అలాగే ఈ కార్యక్రమ నిర్వహణకు కృషిచేసిన కార్యాలయ సిబ్బందిని, ఆతిథ్యం ఇచ్చినందుకు సాన్ మారియా ఉన్నత పాఠశాల సిబ్బందిని యాజమాన్యాన్ని ఆయన అభినందించారు. అనంతరం 40 మంది విజేతలకు ముఖ్య అతిధి సర్టిఫికెట్ మరియు షీల్డులు అందించారు. ఇందులో సైన్స్ ఫెయిర్ 7 సబ్ థీమ్స్ లో జూనియర్, సీనియర్ విభాగాల్లో మొదటి రెండో బహుమతి, ఇన్‌స్పైర్ లో 8 రాష్ట్ర స్థాయి ఎంపికలు, సెమినార్ విభాగం లో మొదటి, రెండవ టీఎల్ఎమ్ తయారీలో మొదటి, రెండవ బహుమతులు ఉన్నాయి.