Akhanda 2 | నందమూరి బాలకృష్ణ–బోయపాటి శీను కాంబినేషన్‌లో రూపొందిన భారీ చిత్రం ‘అఖండ-2’ ప్రీ-రిలీజ్ ఈవెంట్‌ను శుక్రవారం కూకట్‌పల్లి కైతలాపూర్ గ్రౌండ్‌లో నిర్వహించనున్న నేపథ్యంలో సాయంత్రం 4 గంటల నుంచి రాత్రి 11 గంటల వరకు పరిసర ప్రాంతాల్లో ట్రాఫిక్ మళ్లింపులు అమల్లో ఉంటాయని సైబరాబాద్ పోలీసులు ప్రకటించారు. భారీగా జనసమ్మర్దం ఉండే అవకాశం కనిపిస్తున్నందున వాహనదారులు ముందుగానే ప్రయాణాలు ప్లాన్ చేసుకోవాలని సూచించారు.
అధికారుల వివరాల ప్రకారం, మూసాపేట్ నుంచి భరత్‌నగర్, ఎర్రగడ్డ మీదుగా వచ్చే వాహనాలను కూకట్‌పల్లి Y జంక్షన్ వైపు మళ్లించనున్నారు. కూకట్‌పల్లి Y జంక్షన్ నుంచి ఐడీఎల్ లేక్ వైపు వెళ్లే వాహనాలను అశోకా వన్ మాల్ వద్ద జేఎన్టీయూ రోడ్డులోకి మళ్లిస్తారు. అలాగే మాదాపూర్, హైటెక్ సిటీ నుంచి కైతలాపూర్ వైపు వచ్చే ట్రాఫిక్‌ను యశోద హాస్పిటల్ జంక్షన్ వద్ద నెక్సస్ మాల్–జేఎన్టీయూ వైపు దారి మళ్లిస్తారు. ప్రయాణికుల అసౌకర్యం నివారించేందుకు ప్రత్యామ్నాయ మార్గాలను ఎంచుకోవాలని, ట్రాఫిక్ సిబ్బందికి సహకరించాలని పోలీసులు కోరారు. ఈ నేపథ్యంలో భారీ అంచనాలు నెలకొన్న ‘అఖండ-2’ సినిమా డిసెంబర్ 5న థియేటర్లకు రానుంది.
కర్ణాటకలో జరిగిన ట్రైలర్ లాంచ్ ఈవెంట్‌కు వచ్చిన భారీ స్పందన వచ్చిన నేపథ్యంలో ఇప్పుడు హైద‌రాబాద్ వేడుక‌కి అభిమానులు భారీ ఎత్తున త‌ర‌లి వ‌స్తార‌ని భావిస్తున్నారు. ఎలాంటి అవాంఛ‌నీయ ఘ‌ట‌న‌లు జ‌ర‌గ‌కుండా త‌గు జాగ్ర‌త్త‌లు తీసుకుంటున్నారు. ముఖ్య అతిథులపై సోషల్ మీడియాలో ఆసక్తికర చర్చ నడుస్తోంది. ఈవెంట్‌కు ఎవరెవరు వ‌స్తార‌నే విష‌యంపై స‌స్పెన్స్ నెల‌కొంది. రాజకీయ వర్గాల సమాచారం ప్రకారం తెలంగాణ ముఖ్యమంత్రి రేవంత్ రెడ్డి ముఖ్య అతిథిగా రావచ్చని అంటున్నారు.. మరోవైపు, ఐకాన్ స్టార్ అల్లు అర్జున్ కూడా హాజరయ్యే అవకాశం ఎక్కువ‌గా ఉంద‌ని టాక్ న‌డుస్తుంది..
అఖండ 2 సినిమాలో బాలకృష్ణతో కలిసి సంయుక్త, ఆది పినిశెట్టి, కబీర్ దోహన్ సింగ్ మరికొందరు కీలక పాత్రల్లో కనిపించనున్నారు. పలు భాషల్లో, 2D–3D ఫార్మాట్లలో చిత్రాన్ని విడుదల చేయ‌నుండ‌గా, ఈ సినిమాను 14 రీల్స్ ప్లస్ నిర్మిస్తుంది. చిత్రానికి తమన్ సంగీతం అందించారు. మూవీ తెలుగుతో పాటు హిందీ, తమిళం, కన్నడ, మలయాళం భాషల్లో కూడా విడుదల కానుంది.