Peddi | గ్లోబల్ స్టార్ రామ్ చరణ్ మరోసారి తన స్టార్డమ్ను బాక్సాఫీస్ వద్ద నిరూపించారు. భారీ అంచనాల మధ్య జూన్ 4న విడుదలైన ‘పెద్ది’ సినిమా తొలి రోజే రికార్డు స్థాయి వసూళ్లతో సంచలనం సృష్టించింది. ‘ఆర్ఆర్ఆర్’ తర్వాత రామ్ చరణ్ నుంచి వచ్చిన పూర్తి స్థాయి మాస్ స్పోర్ట్స్ డ్రామా కావడంతో ప్రేక్షకుల్లో భారీ ఆసక్తి నెలకొంది. దర్శకుడు బుచ్చిబాబు సన తెరకెక్కించిన ఈ చిత్రానికి విడుదలైన మొదటి షో నుంచే పాజిటివ్ టాక్ రావడంతో కలెక్షన్ల సునామీ మొదలైంది.
‘ఉప్పెన’తో సంచలన విజయాన్ని అందుకున్న బుచ్చిబాబు సన దర్శకత్వంలో తెరకెక్కిన ‘పెద్ది’ దేశవ్యాప్తంగా దాదాపు 3000 స్క్రీన్లలో విడుదలైంది. సినిమా విడుదలకు ముందే అడ్వాన్స్ బుకింగ్స్ రూపంలో భారీ స్పందన లభించింది. విడుదలకు ముందే సుమారు 8.2 లక్షల టికెట్లు అమ్ముడుపోగా, అడ్వాన్స్ బుకింగ్స్ ద్వారానే రూ.20 కోట్లకు పైగా గ్రాస్ వసూళ్లు వచ్చినట్లు ట్రేడ్ వర్గాలు పేర్కొన్నాయి.
భారీ వసూళ్లు..
తొలి రోజు దేశీయ మార్కెట్లో ‘పెద్ది’ సుమారు రూ.40.66 కోట్ల నెట్ కలెక్షన్లు సాధించినట్లు నివేదికలు చెబుతున్నాయి. ఇందులో తెలుగు వెర్షన్ వాటా అత్యధికంగా ఉంది. తెలుగు రాష్ట్రాల్లోనే సినిమా రూ.36.99 కోట్ల నెట్ వసూలు చేసినట్లు సమాచారం. రోజంతా థియేటర్లలో 68 శాతానికి పైగా ఆక్యుపెన్సీ నమోదు కావడం ప్రేక్షకుల ఆదరణకు నిదర్శనంగా నిలిచింది.
అంతేకాదు, విడుదలకు ముందు నిర్వహించిన ప్రత్యేక పెయిడ్ ప్రీవ్యూస్ ద్వారా కూడా ‘పెద్ది’ భారీ వసూళ్లు సాధించింది. ప్రీవ్యూస్ రూపంలో రూ.18.50 కోట్ల వరకు రాబట్టిన ఈ చిత్రం, తొలి రోజు మొత్తంగా రూ.59.16 కోట్ల నెట్ కలెక్షన్లను నమోదు చేసినట్లు ట్రేడ్ వర్గాలు అంచనా వేస్తున్నాయి. దీంతో ఇది రామ్ చరణ్ సోలో హీరోగా నటించిన చిత్రాల్లో అత్యధిక ఓపెనింగ్ సాధించిన సినిమాగా నిలిచింది.
బాలీవుడ్ చిత్రాలని అధిగమించిన పెద్ది..
‘పెద్ది’ ఓపెనింగ్ కలెక్షన్ల జోరు ముందు పలు బాలీవుడ్ భారీ చిత్రాల రికార్డులు కూడా వెనక్కి వెళ్లిపోయాయి. కొన్ని నివేదికల ప్రకారం, రణ్వీర్ సింగ్ నటించిన ‘ధురంధర్’, సన్నీ డియోల్ ‘గద్దర్ 2’, షారుఖ్ ఖాన్ ‘పఠాన్’ తొలి రోజు వసూళ్లను ‘పెద్ది’ అధిగమించినట్లు ట్రేడ్ విశ్లేషకులు పేర్కొంటున్నారు. అలాగే రామ్ చరణ్ గత చిత్రం ‘గేమ్ ఛేంజర్’ మొదటి రోజు సాధించిన వసూళ్లను కూడా ఈ సినిమా దాటేసింది.
‘గేమ్ ఛేంజర్’ విడుదల సమయంలో భారీ ఓపెనింగ్స్ వచ్చినప్పటికీ, నెగిటివ్ టాక్ కారణంగా తర్వాతి రోజుల్లో కలెక్షన్లు తగ్గిపోయాయి. అయితే ‘పెద్ది’కి ప్రేక్షకులు, విమర్శకుల నుంచి పాజిటివ్ స్పందన లభిస్తుండటంతో దీర్ఘకాలంలో మరింత మెరుగైన ప్రదర్శన కనబరచే అవకాశం ఉందని ట్రేడ్ వర్గాలు అంచనా వేస్తున్నాయి.
హిందీ మార్కెట్ పరిస్థితి?
అయితే పాన్ ఇండియా చిత్రంగా విడుదలైన ‘పెద్ది’కి హిందీ మార్కెట్లో ఆశించిన స్థాయి స్పందన లభించలేదని తెలుస్తోంది. ఉత్తరాది రాష్ట్రాల్లో సినిమా ఆక్యుపెన్సీ తక్కువగా నమోదవ్వగా, తొలి రోజు హిందీ వెర్షన్ ద్వారా సుమారు రూ.2.84 కోట్ల నెట్ మాత్రమే వసూలైనట్లు సమాచారం. రామ్ చరణ్కు ఉత్తరాదిలో గుర్తింపు ఉన్నప్పటికీ, అక్కడి ప్రేక్షకులను భారీగా థియేటర్లకు రప్పించడంలో సినిమా ఇంకా వేగం అందుకోవాల్సి ఉందని విశ్లేషకులు భావిస్తున్నారు.
ప్రపంచవ్యాప్తంగా మాత్రం ‘పెద్ది’ అద్భుతమైన ఆరంభాన్ని నమోదు చేసింది. ట్రేడ్ వర్గాల అంచనాల ప్రకారం, తొలి రోజు వరల్డ్వైడ్గా ఈ చిత్రం రూ.112 కోట్లకు పైగా గ్రాస్ కలెక్షన్లు సాధించినట్లు తెలుస్తోంది. దీంతో 100 కోట్లకు పైగా ఓపెనింగ్ సాధించిన తెలుగు చిత్రాల జాబితాలో ‘పెద్ది’ కూడా చేరింది. 2026లో విడుదలైన భారతీయ చిత్రాల్లో అత్యుత్తమ ఓపెనింగ్స్ నమోదు చేసిన సినిమాల్లో ఇది టాప్ స్థానాల్లో నిలిచినట్లు సినీ వర్గాలు పేర్కొంటున్నాయి.. ఇప్పుడు అందరి దృష్టి వీకెండ్ కలెక్షన్లపైనే ఉంది. తొలి రోజు జోరు కొనసాగితే ‘పెద్ది’ బాక్సాఫీస్ వద్ద మరిన్ని రికార్డులు సృష్టించడం ఖాయమనే అభిప్రాయం వ్యక్తమవుతోంది.