Sai Pallavi | షూటింగ్ బ్రేక్‌లో సాయి పల్లవి పరుగు.. పట్టుకోలేకపోయిన యూనిట్,వీడియో వైరల్ !

Sai Pallavi | సోషల్ మీడియాలో ఎప్పుడు ఏ వీడియో ట్రెండ్ అవుతుందో చెప్పడం కష్టం. తాజాగా నేచురల్ స్టార్ సాయి పల్లవికు సంబంధించిన ఓ సరదా వీడియో నెట్టింట హల్‌చల్ చేస్తోంది. తెరపై తన నటన, డాన్స్‌తో ప్రేక్షకులను మెప్పించే ఆమె.. ఈసారి మాత్రం తన స్పీడ్‌తో అందరినీ ఆశ్చర్యపరిచింది. వైరల్ అవుతున్న ఈ వీడియో చూస్తుంటే, ఇది ఫిలిం ఫేర్ అవార్డ్ వేడుక కోసం వెళ్లిన సమయంలో  తీసిన క్లిప్‌లా కనిపిస్తోంది. ఫోటోలకు ఫోజులు ఇచ్చిన తర్వాత సాయి పల్లవి ఒక్కసారిగా అక్కడి నుంచి పరుగు తీసింది. చిన్నపిల్లలా గెంతేస్తూ పరుగెత్తుతున్న ఆమెను వెనుక నుంచి కొందరు ఫొటోగ్రాఫర్స్  పట్టుకోవడానికి ప్రయత్నిస్తారు. కానీ ఆమె స్పీడ్‌ను అందుకోలేకపోయారు.

ఫిట్‌నెస్, ఎనర్జీకి ఫ్యాన్స్ ఫిదా

ఈ క్లిప్ చూసిన నెటిజన్లు సరదా కామెంట్లతో సోషల్ మీడియాలో సందడి చేస్తున్నారు. “సాయి పల్లవిని పట్టడం ఎవరి వల్ల కాదు!”, “డాన్స్ మాత్రమే కాదు.. పరుగులోనూ స్పీడ్ ఇదేనా!” అంటూ అభిమానులు ఆమె ఎనర్జీని కొనియాడుతున్నారు.

ఈ వీడియోలో ఆమె చూపించిన ఉత్సాహం, ఫిట్‌నెస్ స్పష్టంగా కనిపిస్తోంది. సాధారణంగా సెలబ్రిటీలు బయట చాలా సీరియస్‌గా కనిపిస్తారు. కానీ సాయి పల్లవి మాత్రం తన సహజత్వంతో, సరదా స్వభావంతో ఎప్పుడూ ప్రత్యేకంగా నిలుస్తుంది. అందుకే అభిమానులు ఆమెను “ఫిదా స్టార్”గా ముద్దుగా పిలుస్తుంటారు. కాగా, అమరన్ చిత్రంతో సాయి పల్లవి ఉత్తమ నటి అవార్డ్ దక్కించుకుంది.

వరుస భారీ ప్రాజెక్టులతో బిజీ

ఇటీవల నాగ చైతన్యతో కలిసి నటించిన తండేల్ చిత్రం మంచి విజయం సాధించింది. ప్రస్తుతం ఆమె బాలీవుడ్‌లో భారీ ప్రాజెక్ట్ రామాయణంలో సీత పాత్రలో నటిస్తోంది. ఇక అమీర్ ఖాన్ తనయుడు జునైద్ ఖాన్‌తో కలిసి ‘ఏక్ దిన్’ అనే రొమాంటిక్ డ్రామాలో కూడా నటిస్తోంది. ఈ చిత్రాన్ని అమీర్ ఖాన్ ప్రొడ‌క్ష‌న్స్ నిర్మిస్తుండగా, సునీల్ పాండే దర్శకత్వం వహిస్తున్నారు. ఈ సినిమా 2026 మే 1న ప్రేక్షకుల ముందుకు రానుంది.

బిజీ షెడ్యూల్ మధ్యలో కూడా ఇంత ఉత్సాహంగా, సరదాగా ఉండే సాయి పల్లవి వ్యక్తిత్వాన్ని అభిమానులు మరింత మెచ్చుకుంటున్నారు. ఏ సినిమా సెట్స్‌లో ఈ వీడియో తీసారన్నది స్పష్టంగా తెలియకపోయినా, ఆమె పరుగు మాత్రం ప్రస్తుతం నెట్టింట ఫుల్ ఎంటర్‌టైన్‌మెంట్ అందిస్తోంది.