Bangladesh Elections: BNP Sweep| బంగ్లాదేశ్‌ ఎన్నికల్లో బీఎన్‌పీ సునామీ… తారీఖ్ రహ్మాన్ కొత్త ప్రధానమంత్రి?

బంగ్లాదేశ్ ఎన్నికల్లో బీఎన్‌పీ భారీ ఆధిక్యం సాధించింది. తారీఖ్ రహ్మాన్ రెండు స్థానాల్లో గెలిచి ప్రధానమంత్రి పీఠాన్ని అలంకరించబోతున్నారు. అవామీ లీగ్ లేకుండా జరిగిన ఈ ఎన్నికలు దేశ రాజకీయాల్లో కొత్త అధ్యాయానికి నాంది పలికాయి. కాగా, బంగ్లాదేశ్ 35ఏళ్ల తరువాత పురుష ప్రధానిని చూడబోతోంది.

BNP Sweeps Bangladesh Polls, Tarique Rahman Set To Become PM

• విజయదుందుభి మోగించిన ఖలేదా జియా వారసుడు
• షేక్ హసీనా అవామీ లీగ్ లేకుండా చారిత్రక ఎన్నికలు
• ఆశపడ్డ చాంధసవాద ‘జమాత్-ఎ-ఇస్లామీ’కి నిరాశే
• 20 ఏళ్ల తరువాత అధికారపీఠానికి బీఎన్పీ
• 35 ఏళ్ల తరువాత బంగ్లాకు పురుష ప్రధానమంత్రి

విధాత ప్రపంచ విభాగం | హైదరాబాద్:

Bangladesh Elections: BNP Sweep | బంగ్లాదేశ్ రాజకీయ చరిత్రలో పెద్ద మార్పుకు నాంది పలికిన తాజా ఎన్నికల్లో బంగ్లాదేశ్ నేషనలిస్ట్ పార్టీ (Bangladesh Nationalist Party – BNP) భారీ విజయం సాధించింది. పార్టీ అధినేత తారీఖ్ రహ్మాన్ (Tarique Rahman) ప్రధానమంత్రి పీఠానికి అధిష్టించడం కేవలం ఇక లాంఛనప్రాయమే. 2024 విద్యార్థి ఉద్యమాల తరువాత మాజీ ప్రధాని షేక్ హసీనా (Sheikh Hasina) ప్రభుత్వం పడిపోవడంతో ఏర్పడిన రాజకీయ పరిస్థితుల్లో జరిగిన తొలి ఎన్నికలు ఇవి. అవామీ లీగ్ (Awami League) అసలు పాల్గోలేకపోవడం, 35 ఏళ్ల తర్వాత ఒక పురుషుడు ప్రధాని కానుండడం ఈ ఎన్నికల ప్రత్యేకతగా నిలిచింది.

కాగా, బంగ్లాదేశ్ ఎన్నికల ఫలితాలు పూర్తిగా వెలువడకముందే భారత ప్రధాని నరేంద్ర మోదీ (Narendra Modi) తారీఖ్ రహ్మాన్కు అభినందనలు తెలిపారు. రెండు దేశాల మధ్య చారిత్రక బంధం మరింత బలపడాలని, ప్రజల అభివృద్ధి లక్ష్యాల్లో కలిసి పనిచేయాలని ఆకాంక్ష వ్యక్తం చేశారు. విజయం ఖరారయ్యాక, ఫోన్ ద్వారా కూడా మోదీ శుభాకాంక్షలు తెలిపారు.

బీఎన్‌పీ భారీ ఆధిక్యం… రెండు స్థానాల్లోనూ తారీఖ్ రహ్మాన్ ఘనవిజయం

Historic Bangladesh Election Without Awami League Ends In BNP Landslide

మధ్యాహ్నం వరకు వచ్చిన ప్రాథమిక లెక్కల ప్రకారం, ఎన్నికలు జరిగిన మొత్తం 300 స్థానాలకు గానూ, బీఎన్‌పీ (BNP) మరియు మిత్రపక్షాలు 208 స్థానాల్లో విజయం సాధించగా, జమాత్-ఎ-ఇస్లామీ (Jamaat-e-Islami) కూటమి 69 స్థానాల్లో గెలిచింది. జమాత్ అధినేత షఫీఖుర్ రహ్మాన్ (Shafiqur Rahman) ఢాకా-15 నుంచి విజయం సాధించడం గమనార్హం.

తారీఖ్ రహ్మాన్ ఢాకా-17 మరియు బొగురా-6 స్థానాల నుంచి పోటీ చేసి రెండింటిలోనూ గెలుపొందారు. అదేవిధంగా బొగురా-7 స్థానాన్ని కూడా బీఎన్‌పీ తిరిగి దక్కించుకుంది. ఈ స్థానాన్ని మాజీ ప్రధాని ఖలేదా జియా (Khaleda Zia) 1991 నుండి 2008 వరకు ప్రతి ఎన్నికలో గెలుచుకోవడం ప్రత్యేక చారిత్రక అంశం. దాదాపు 20 ఏళ్ల తర్వాత బీఎన్‌పీ(BNP)ని ప్రజలు కోరుకుంటున్నారని చెప్పడానికి ఇదొక బలమైన సంకేతంగా విశ్లేషకులు చెబుతున్నారు.

7చోట్ల మహిళల విజయం – మూడింటిలో చట్టపరమైన అడ్డంకులు

ఈ ఎన్నికల్లో ఇప్పటివరకు ఏడుగురు మహిళా అభ్యర్థులు విజయం సాధించారు. వీరిలో ఐదుగురు బీఎన్‌పీ (BNP) నుంచి పోటీ చేశారు. అఫ్రోజా ఖానమ్ రిటా (Afroza Khanam Rita), తహ్సినా రష్దిర్ లూనా (Tahsina Rushdir Luna), ఫర్ఝానా షర్మిన్ (Farzana Sharmin), షమా ఒబైద్ ఇస్లాం (Shama Obaid Islam), నయాబ్ యూసఫ్ అహ్మద్ (Nayab Yusuf Ahmed) గెలుపొందారు. జహాలకాఠి-2లో ఇస్రాత్ సుల్తానా ఎలెన్ భుట్టో (Israt Sultana Elen Bhutto), బ్రహ్మణ్‌బారియా-2లో స్వతంత్ర అభ్యర్థి రుమీన్ ఫర్హానా (Rumeen Farhana) విజయం సాధించారు.

కాగా, మూడుసీట్ల ఫలితాలను ఎన్నికల సంఘం చట్టపరమైన సమస్యల కారణంగా వాయిదా వేసింది. చిట్టగాంగ్-2 నుంచి సర్వర్ ఆలమ్‌గీర్ (Sarwar Alamgir), చిట్టగాంగ్-4 నుంచి అస్లాం చౌధురి (Aslam Chowdhury) గెలిచినప్పటికీ కోర్టు కేసులు పరిష్కారం అయ్యే వరకు అధికారిక ప్రకటన నిలిపివేశారు.

మొదటిసారి అవామీ లీగ్ లేని ఎన్నికలు ఇవే

ఈసారి బ్యాలెట్ పత్రాల్లో అవామీ లీగ్ (Awami League) కు చెందిన “పడవ” గుర్తు కనిపించలేదు. మహమ్మద్ యూనస్ (Muhammad Yunus) నేతృత్వంలోని తాత్కాలిక ప్రభుత్వం పార్టీ కార్యకలాపాలను నిషేధించడంతో పాటు దాని రిజిస్ట్రేషన్‌ను కూడా రద్దు చేసింది. ప్రస్తుతం ఢిల్లీలో ఉన్న షేక్ హసీనా (Sheikh Hasina) ఈ ఎన్నికలను రాజ్యాంగ వ్యతిరేకమైనవిగా, చట్టవ్యతిరేకమైనవిగా పేర్కొంటూ తీవ్ర విమర్శలు చేశారు.

బంగ్లాదేశ్ రాజకీయాలకు కొత్త దిశ

Shafiqur Rahman addresses media following BNP landslide in Bangladesh polls

బంగ్లాదేశ్ పార్లమెంట్‌లో మొత్తం 350 సీట్లు ఉన్నాయి. అందులో 300 సాధారణ నియోజకవర్గ సీట్లు ప్రజలు నేరుగా ఎన్నుకుంటారు. మిగిలిన 50 మహిళలకు రిజర్వు చేసి, పార్టీలకు వచ్చిన సీట్ల నిష్పత్తి ప్రకారం కేటాయిస్తారు. తాజా లెక్కల ప్రకారం బంగ్లాదేశ్ నేషనలిస్ట్ పార్టీ (BNP) కూటమి 208 సీట్లు, జమాత్-ఎ-ఇస్లామీ (Jamaat-e-Islami) కూటమి 69 సీట్లు గెలుచుకోగా, మిగిలిన సీట్లు ఇతరులకు వెళ్లాయి; కొన్ని నియోజకవర్గాల ఫలితాలు ఇంకా పెండింగ్‌లో ఉన్నాయి.

ఈ ఎన్నికలు కేవలం ప్రభుత్వ మార్పుకే కాదు, బంగ్లాదేశ్ రాజకీయ వ్యవస్థలో సమీకరణాల మార్పుకు సంకేతం. తారీఖ్ రహ్మాన్ ప్రధానిగా బాధ్యతలు చేపడితే 35 ఏళ్ల తర్వాత ఒక పురుష నాయకుడు ఆ పదవిలోకి రావడం చారిత్రక ఘట్టంగా నిలుస్తుంది. జమాత్-ఎ-ఇస్లామీ (Jamaat-e-Islami) గణనీయంగా సీట్లు గెలిచినా అధికారానికి దూరంగా నిలిచింది.

మొత్తంగా — అవామీ లీగ్ (Awami League) లేకుండా జరిగిన ఈ ఎన్నికలు బంగ్లాదేశ్ ప్రజాస్వామ్య చరిత్రలో కొత్త యుగానికి నాంది పలుకుతున్నాయి.