MLC Kavitha | కుట్రలో భాగంగా నన్ను కుటుంబం నుంచి దూరం చేశారు : కవిత

కాళేశ్వరం ద్వారా కామారెడ్డికి ఒక్క ఎకరానికి కూడా నీళ్లు రాలేదు అని జాగృతి అధ్యక్షురాలు కవిత అన్నారు. కాళేశ్వరం పనులను కొనసాగిస్తారా? ప్రత్యామ్నాయంగా కామారెడ్డికి నీళ్లు తెస్తారా ప్రభుత్వం చెప్పాలి? అని ఆమె ప్రశ్నించారు.

విధాత, హైదరాబాద్ : కాళేశ్వరం ద్వారా కామారెడ్డికి ఒక్క ఎకరానికి కూడా నీళ్లు రాలేదు అని జాగృతి అధ్యక్షురాలు కవిత అన్నారు. కాళేశ్వరం పనులను కొనసాగిస్తారా? ప్రత్యామ్నాయంగా కామారెడ్డికి నీళ్లు తెస్తారా ప్రభుత్వం చెప్పాలి? అని ఆమె ప్రశ్నించారు. కామారెడ్డి జిల్లాలో నిర్వహించిన జాగృతి జనం బాటలో ఆమె మాట్లాడారు. ‘ప్రజలను, కుటుంబాన్ని వేర్వేరు చూసే పరిస్థితి లేదు. నన్ను కుటుంబం నుంచి దూరం చేసే కుట్రలో సస్పెండ్ చేయించారు.

అందుకు బాధగా ఉంది. సస్పెండ్ చేయించిన వారు శునకానందం పొందవచ్చు. కానీ మరో కుటుంబం అనుకునే తెలంగాణ కోసం పనిచేస్తూనే ఉంటా. జైల్లో ఉన్నప్పుడు నా పిల్లల కన్నా కూడా మా అమ్మ ఆరోగ్యం గురించే ఎక్కువ బాధపడ్డా. కామారెడ్డిలోనే బీసీ డిక్లరేషన్ ప్రకటించింది. కానీ అదే కాంగ్రెస్ అసెంబ్లీ ఎన్నికల్లో ఉమ్మడి నిజామాబాద్ బీసీలకు ఒక్క సీటు కూడా ఇవ్వలేదు. అయినప్పటికీ ప్రజలు వాళ్ల మాటలు నమ్మి గెలిపించారు’ అని కవిత అన్నారు.

జాగృతి తరఫున ప్రభుత్వాన్ని ప్రశ్నిస్తూనే ఉంటామన్నారు. అసెంబ్లీలో పూలే విగ్రహం, సావిత్రి బాయ్ ఫూలే జన్మదినాన్ని మహిళ టీచర్ దినోత్సవం చేసేలా చేశామన్నారు. బీసీ రిజర్వేషన్ల విషయంలో బీజేపీ, కాంగ్రెస్ పార్టీలతో కొట్లాడుతూనే ఉంటామని స్పష్టం చేశారు. బీసీ రిజర్వేషన్ల సాధనలో జాగృతి ముందుంటుందన్నారు. ఎంబీసీలకు మినిస్ట్రీ ఇస్తామని ప్రకటించిన కాంగ్రెస్ దాని జోలికి కూడా పోలేదని తెలిపారు. 3 లక్షల లోపు వార్షికాదాయం ఉన్న వాళ్లకు ఫీజు రీయింబర్స్‌మెంట్ చెల్లించకపోవటంతో బీసీ, ఎంబీసీ, ఎస్సీ, ఎస్టీ బిడ్డలు బాధ పడుతున్నారని కవిత ఆవేదన వ్యక్తం చేశారు.

బీసీలకు ఏటా రూ. 20 వేల కోట్లతో బడ్జెట్ పెడతామని చెప్పిన కాంగ్రెస్ ప్రభుత్వం బడ్జెట్ లో పెట్టిన నిధులను ఖర్చు చేయలేదన్నారు. కనీసం రాజీవ్ యువ వికాసం లోనైనా పెద్ద ఎత్తున బీసీలకు నిధులు ఇవ్వాలని కవిత కోరారు. బీసీ, ఎంబీసీ లకు కార్పొరేషన్ ఊసే లేదన్నారు. అన్ని కులాలకు ఫెడరేషన్లు అని చెప్పి ఇప్పటి వరకు రూపాయి కూడా ఇవ్వలేదని విమర్శించారు. రేవంత్ రెడ్డి‌ని బీసీ ద్రోహిగా తాము ఇప్పటికే ప్రకటించామన్నారు. రేవంత్ ఇప్పటి వరకు కూడా ప్రధాని మోదీకి ఈ అంశంలో ఒక్క లేఖ రాయలేదని ఆరోపించారు.

ఇంత అర్జెంట్ గా పంచాయితీ ఎన్నికల అవసరమేముంది? అని ప్రశ్నించారు. తమిళనాడులో జయలలిత 9 ఏళ్లు ఎన్నికలను ఆపి రిజర్వేషన్లు సాధించారని గుర్తు చేశారు. కేంద్రం నుంచి నిధులు రావనుకుంటే దాని గురించి వారితో మాట్లాడాలని సూచించారు. కాంగ్రెస్ కు బీసీలకు న్యాయం చేయాలని లేనందునే ఇంత తొందరగా ఎన్నికలు పెడుతున్నారని ఆరోపించారు. స్థానిక ఎన్నికల్లో కాంగ్రెస్ బీసీలకు రిజర్వేషన్లు ఇచ్చిన చోటే బీఆర్ఎస్, బీజేపీ సీట్లు ఇస్తుందా? అని.. అంటే ఏదో ఇచ్చినట్లు ఇచ్చి వారిని ఒడిగొట్టాలన్న కుట్రపన్నుతున్నారని ఆరోపించారు.

ప్రొఫెసర్ జయశంకర్ ఒక రాష్ట్రం అస్తిత్వం, సంస్కృతికి వైభవం పోతే తిరిగి సాధించుకోవటానికి చాలా ఏళ్లు పడుతుందని చెప్పేవారని.. అందుకే తెలంగాణ సంస్కృతి, వైభవాన్ని కాపాడేందుకు తాము జాగృతి తరఫున పోరాటం చేశామని కవిత తెలిపారు. జీవో నంబర్ 317 కారణంగా ఉద్యోగులు ఇబ్బందులు పడుతున్నారని.. ఈ అంశంపై కేసీఆర్‌ను విమర్శించి రేవంత్ రెడ్డి అధికారంలోకి వచ్చారని విమర్శించారు. కానీ రెండేళ్లైనా ఆ సమస్య పరిష్కారం కాలేదని దీనిపై సీఎం దృష్టి పెట్టాలని కవిత కోరారు.