Rimjim: రాహుల్ సిప్లిగంజ్ లీడ్ రోల్‌లో ‘రిమ్‌జిమ్’

1990ల కాలంలో ఆంధ్రప్రదేశ్‌లో జరిగిన నిజ సంఘటనల స్ఫూర్తితో హేమ సుందర్ దర్శకత్వంలో రూపొందుతున్న గ్యాంగ్‌స్టర్ డ్రామా ‘రిమ్‌జిమ్’. ఆస్కార్ విన్నర్ రాహుల్ సిప్లిగంజ్ కీలక పాత్రలో నటించారు.

1990ల నాటి ఆంధ్రప్రదేశ్ నేపథ్యంలో జరిగిన నిజ జీవిత సంఘటనల స్ఫూర్తితో రూపొందుతున్న సినిమా ‘రిమ్‌జిమ్’. హేమ సుందర్ కథ, స్క్రీన్‌ప్లే, దర్శకత్వంలో తెరకెక్కుతున్న ఈ చిత్రాన్ని AV సినిమాస్, సి విజువల్స్ బ్యానర్లపై జి. సచేతన్ రెడ్డి, డా. మానస, శ్రీనివాసరావు నిర్మిస్తున్నారు. ‘అస్లీదమ్’ అనే ట్యాగ్‌లైన్‌తో ఈ మూవీ రూపొందుతోంది.

స్నేహం, ప్రేమ, భావోద్వేగాల సమ్మేళనంగా తెరకెక్కిన ‘రిమ్‌జిమ్’ ప్రస్తుతం పోస్ట్‌ ప్రొడక్షన్ దశలో ఉంది. ఈ సందర్భంగా దర్శకుడు హేమ సుందర్ మాట్లాడుతూ, సినిమా అవుట్‌పుట్ అద్భుతంగా వచ్చిందని, ప్రేక్షకులందరికీ కనెక్ట్ అయ్యేలా కథను తీర్చిదిద్దామని తెలిపారు. త్వరలోనే సినిమా విడుదల తేదీని ప్రకటించనున్నట్లు వెల్లడించారు.

ఈ చిత్రంలో ఆస్కార్ అవార్డు విన్నర్ రాహుల్ సిప్లిగంజ్ కీలక పాత్రలో నటించడంతో పాటు, ఆయన పాడిన రెండు పాటలు సినిమాకు హైలైట్‌గా నిలవనున్నాయి. ప్రధాన పాత్రలో అజయ్ వేద్, హీరోయిన్‌గా వ్రజన నటిస్తున్నారు. ఇతర ముఖ్య పాత్రల్లో బిత్తిరి సత్తి, రాజ్ తిరందాస్ కనిపించనున్నారు.

సాంకేతిక విభాగంలో సంగీతం కొక్కిలగడ్డ ఇఫ్రాయిం, సినిమాటోగ్రఫీ వాసు పెండం, ఎడిటింగ్ పెనుమత్స రోహిత్ బాధ్యతలు నిర్వహించారు. రియలిస్టిక్ టోన్‌తో పాటు బలమైన భావోద్వేగాలతో రూపొందుతున్న ఈ గ్యాంగ్‌స్టర్ డ్రామా ‘రిమ్‌జిమ్’ త్వరలో ప్రేక్షకుల ముందుకు రానుంది.