Ys Sharmila | అమరావతి : సూపర్ సిక్స్..సూపర్ ఫ్లాప్ అయితే సీఎం చంద్రబాబు మాత్రం సూపర్ హిట్ అని ఎలా అంటారని ఏపీ కాంగ్రెస్ చీఫ్ వైఎస్. షర్మిల ప్రశ్నించారు. సూపర్ సిక్స్ హామీల్లో భాగమైన 20 లక్షల ఉద్యోగాల్లో ఒక్కరికైనా ఇచ్చారా? నెలకు రూ.3వేల భృతి ఏ ఒక్క నిరుద్యోగికైనా అందిందా ? 18 ఏళ్లు నిండిన ఒక్క మహిళకైనా నెలకు రూ.15 వందలు అకౌంట్ లో పడ్డాయా ? అని షర్మిల ప్రశ్నించారు. అన్నదాత సుఖీభవ కింద సొంతగా రూ.20 వేలు ఇస్తామని మాట మార్చేసి..కేంద్రం ఇచ్చే రూ.6 వేలతో లింక్ పెట్టారని..30 లక్షల మంది రైతులకు పథకం దక్కకుండా పంగనామాలు పెట్టారని షర్మిల ఆరోపించారు. తల్లికి వందనం కింద 20 లక్షల మంది బిడ్డలకు పథకంలో కోత పెట్టారని..రూ.15 వేలు ఇస్తామని చెప్పిన. రూ.13 వేలకు సరిపెట్టారని విమర్శించారు.
మూడు సిలిండర్లు ఎంత మందికి అందుతున్నాయో అర్థంకాని పరిస్థితి నెలకొందని..14 నెలల తర్వాత ఫ్రీ బస్సు అమలు చేసి, సూపర్ సిక్స్ హామీలను ఉద్ధరించామని చెప్పుకోవడం నిజంగా సిగ్గుచేటు అని షర్మిల ఎద్దేవా చేశారు. సూపర్ సిక్స్ సూపర్ హిట్ అనడం హాస్యాస్పదం అని..
సీఎం చంద్రబాబు రాష్ట్ర ప్రజలకు చేసింది ఘరానా మోసం అని మండిపడ్డారు. రాష్ట్రంలో సంక్షేమం సన్నగిల్లిందని..అభివృద్ధి అటకెక్కింది..సుపరిపాలన కొండెక్కిందని షర్మిల విమర్శలు గుప్పించారు. కూటమి ప్రభుత్వం ఏడాది పాలనలో హామీలు ఘనం.. అమలు మాత్రం అరచేతిలో వైకుంఠం అని విమర్శించారు.