హైదరాబాద్‌కు కొత్త క్రికెట్‌ స్టేడియం అడియాసేనా? కొత్త సేడియాల్లో తెలంగాణకేదీ చోటు?

హైదరాబాద్, విధాత ప్రతినిధి:

దేశంలో కొత్తగా ఏడు క్రికెట్ స్టేడియాలు నిర్మాణం అవుతున్నాయి. అధునాతన సౌకర్యాలు, అధిక సీటింగ్ కెపాసిటీతో ముస్తామవుతున్నాయి. భవిష్యత్తులో డిమాండ్‌ను తట్టుకునేలా ప్రణాళికాబద్ధంగా వీటిని ప్రపంచ స్థాయి ప్రమాణాలతో సిద్ధం చేస్తున్నారు. దేశంలో ప్రస్తుతం 60 అంతర్జాతీయ క్రికెట్‌ స్టేడియాలు ఉండగా.. రానున్న రోజుల్లో మరిన్ని పెరగనున్నాయి. అంతర్జాతీయంగా జపాన్ వంటి నగరాలతో పోటీ పడతామని గొప్పలు చెప్పకొంటున్న తెలంగాణ ప్రభుత్వం ఇప్పటికీ ఉప్పల్ స్టేడియం భేషుగ్గా ఉందని సంబురపడుతున్నది. ఫ్యూచర్ సిటీ పేరుతో హడావుడి చేస్తున్న ప్రభుత్వం అంతర్జాతీయ క్రికెట్ స్టేడియం నిర్మాణంపై ఏమాత్రం ఆలోచనలు చేయడం లేదని క్రికెట్ అభిమానులు ఆరోపిస్తున్నారు. ఉప్పల్ స్టేడియం మూలంగా క్రీడా వీక్షకులు అష్టకష్టాలు పడుతున్నారు. మ్యాచ్ జరిగిన ప్రతిసారి పోలీసులు బందోబస్తు నిర్వహించడంలో ఇబ్బందులు పడుతున్నారు. పొరుగునే ఉన్న ఆంధ్రప్రదేశ్ రాష్ట్రంలో 1.32 లక్షల మంది క్రీడా ప్రేమికులు కూర్చుని క్రికెట్ వీక్షించేందుకు వీలుగా ఏఐ సౌకర్యాలతో స్టేడియం నిర్మాణానికి సన్నాహాలు చేసుకుంటున్నది. 2030 నాటికి పనులు పూర్తయి వినియోగంలోకి రానున్నదని అంచనా.

జైపూర్‌లో ఆధునిక స్టేడియం

రాజస్థాన్‌లోని జైపూర్‌లో ఆధునిక క్రికెట్ స్టేడియంను 75వేల మంది కూర్చునే విధంగా నిర్మాణం చేస్తున్నారు. అంతర్జాతీయ మ్యాచ్ లు ఆడే విధంగా దీన్ని సిద్ధం చేస్తున్నారు. ఇక్కడ అడ్వాన్స్‌డ్‌ ట్రైనింగ్ సెంటర్లు, ఇండోర్‌లో ప్రాక్టిస్ చేసుకునేందుకు ఏర్పాట్లు చేస్తున్నారు. ఐపీఎల్, ఇంటర్నేషనల్ క్రికెట్ పోటీలకు అనువుగా ఉండనున్నది. వేదాంత అనిల్ అగర్వాల్ ఫౌండేషన్ ఈ మెగా స్టేడియం నిర్మాణానికి నిధులు సమకూర్చుతున్నది.

చండీగఢ్‌లో 38వేల కెపాసిటీతో నిర్మాణం

చండీగఢ్ సమీపంలోని ముల్లన్ పూర్‌లో స్టేట్ ఆఫ్‌ ఆర్ట్ స్టేడియం నిర్మిస్తున్నారు. ఇందులో 38వేల మంది కూర్చుని క్రికెట్ ను వీక్షించేందుకు సౌకర్యాలు కల్పించనున్నారు. ఆధునిక డ్రెస్సింగ్ రూములు, మైదానం రాత్రిపూట కూడా పగలు మాదిరి కన్పించేలా ఫ్లడ్ లైట్లు ఉండనున్నాయి. పర్యావరణ అనుకూల విధానంలో స్టేడియం డెవలప్ చేయనున్నారు.

యూపీలో కొత్తగా రెండు

ఉత్తరప్రదేశ్ రాష్ట్రంలో ప్రధాని నరేంద్ర మోదీ ప్రాతినిధ్యం వహిస్తున్న వారణాసిలో క్రికెట్ స్టేడియం వస్తోంది. జాతీయ, అంతర్జాతీయ మ్యాచ్ లు ఆడేందుకు వీలుగా తీర్చిదిద్దనున్నారు. 30వేల కెపాసిటీతో నిర్మిస్తున్నప్పటికీ భవిష్యత్తులో 40వేల వరకు పెంచుకునే అవకాశాలున్నాయి. లార్డ్ శివ ప్రేరణతో దీన్ని డెవలప్ చేయనున్నారు. మీడియా బాక్స్ డమరుకం నమూనాలో ఉండున్నది. ఘాట్ మాదిరి సీటింగ్ ఏర్పాట్లు, బిల్వ పత్రం మాదిరి మెటాలిక్ పై కప్పులు ఉంటాయి. ఫ్రెండ్లీ సీటింగ్ తో ప్రాక్టీస్ పిచ్‌లు, ఆధునిక వాస్తుతో నిర్మాణం జరగనున్నది. ఈ స్టేడియం అందుబాటులోకి వస్తే ఉత్తర ప్రదేశ్ లోని తూర్పు ప్రాంత ప్రజలు క్రికెట్ ను ప్రత్యక్షంగా వీక్షించే అవకాశం ఉంటుంది. ఇదే కాకుండా గోరఖ్ పూర్ లో 33 ఎకరాల విస్తీర్ణంలో ఇంటర్నేషనల్ క్రికెట్ స్టేడియం నిర్మాణం చేస్తున్నట్లు సీఎం యోగి ఆదిత్యనాథ్ ఈ ఏడాది జనవరిలో ప్రకటించారు. ప్రస్తుతం సైఫాయి, లక్నో, కన్పూర్ నగరాల్లో క్రికెట్ స్టేడియం లు అందుబాటులో ఉన్నాయి.

వడోదరలో మరోటి

గుజరాత్ రాష్ట్రం అహ్మదాబాద్‌లో ఇప్పటికే భారీ స్టేడియం ఉండగా, కొత్తగా వడోదరలో మరో స్టేడియం నిర్మాణానికి అక్కడి బీజేపీ ప్రభుత్వం శ్రీకారం చుట్టింది. యాభై వేల మంది కూర్చుని వీక్షించేందుకు వీలుగా తీర్చిదిద్దనున్నారు. జాతీయ, అంతర్జాతీయ పోటీలను ఆకర్షించే విధంగా నిర్మాణం జరగనున్నది. ఆధునిక ఫ్లడ్ లైటింగ్ తో పాటు వీఐపీ బాక్స్ లను ఏర్పాటు చేయనున్నారు. యువ క్రీడాకారులు, ఔత్సాహికుల కోసం ప్రాక్టీస్ అకాడెమీ రానున్నది. వచ్చే ఏడాది నిర్మాణం పూర్తి కానున్నది.

అస్సాంలో వచ్చే ఏడాది ప్రారంభం

అస్సాం రాష్ట్రం గౌహతి నగరంలోని అమిన్ గాంవ్ లో ఇంటర్నేషనల్ క్రికెట్ స్టేడియం పనులు పూర్తికావస్తున్నాయి. 2025 డిసెంబర్ నాటికి పనులు పూర్తి చేసి 2026 ఫిబ్రవరిలో ప్రారంభించనున్నట్లు సీఎం హిమంత బిశ్వ శర్మ ప్రకటించారు. ఇక్కడ ఇంటర్నేషనల్ తో పాటు టెస్టు క్రికెట్, వన్ డే ఇంటర్నేషనల్, టీ20 మ్యాచ్ లు ఆడేందుకు ఏర్పాట్లు చేస్తున్నారు. సంగీత కచేరీలతో పాటు ఇతర ఈవెంట్లు నిర్వహించేందుకు కూడా అనుమతిస్తామని సీఎం వెల్లడించారు.

80వేల కెపాసిటీతో సూర్య సిటీ లో నిర్మాణం

కర్నాటక రాష్ట్రం బెంగళూరు లో ఎం చిన్నస్వామి స్టేడియం పాతది అయిపోయింది. దీనికి సామర్థ్యం 32వేలు మాత్రమే. దీంతో ట్రాఫిక్ రద్దీతో పాటు సీట్ల సమస్య ఏర్పడింది. క్రికెట్ ప్రేమికులకు తగ్గట్టుగా మరో స్టేడియం నిర్మాణానికి సిద్ధమవుతున్నారు. నగర శివారులో వచ్చే ఈ స్టేడియంతో చిన్నస్వామి స్టేడియం పై ఒత్తిడి తగ్గనున్నది. ప్రస్తుత స్టేడియంలో ఐపీఎల్ మ్యాచ్ లు ఆడేందుకు పరిమితం చేయనున్నారు. ఐపీఎల్ మ్యాచ్ ల సందర్భంగా జరిగిన తొక్కిసలాటో 11 మంది ప్రాణాలు కోల్పోగా, వందలాది మంది గాయపడిన విషయం తెలిసిందే. బొమ్మసండ్ర లోని సూర్య సిటీలో రూ.1,650 కోట్ల అంచనా వ్యయంతో నిర్మించేందుకు సీఎం సిద్ధరామయ్య ఆమోదం తెలిపారు. 80 వేల మంది కూర్చునే విధంగా అడ్వాన్సుడు టెక్నాలజీ, పర్యావరణ హిత డిజైన్లు, అత్యధిక సీటింగ్ కెపాసిటీతో కన్నడవాసులకు తలమానికంగా డెవలప్ చేయనున్నారు.

2028 కల్లా గోవా క్రికెట్ స్టేడియం పూర్తి

దేశ పర్యాటకుల స్వర్గధామం గోవాలో ఫుట్ బాల్ స్టేడియం లు ఉన్నాయి. పెర్నం తాలూకాలో కొత్తగా క్రికెట్ స్టేడియం నిర్మాణానికి ఏర్పాట్లు జరుగుతున్నాయి. స్టేడియం సిద్ధం అయితే ఐపీఎల్ మ్యాచ్ లు నిర్వహించేందుకు ఎలాంటి ఆటంకాలు ఉండవు. 2028 కల్లా పనులు పూర్తి చేస్తామని సీఎం ప్రమోద్ కుమార్ సావంత్ గత ఆగస్టులో వెల్లడించారు.

ఠాణెలో మరో భారీ స్టేడియం

ముంబై మహా నగరంలో ఇప్పటికే వాంఖడే స్టేడియం అందుబాటులో మరోటి ఠాణె నగరంలో నిర్మాణం చేయనున్నారు. ముంబై కి యాభై కిలోమీటర్ల దూరంలో వస్తున్నది. ఒక లక్ష మంది కూర్చుని వీక్షించే విధంగా తీర్చిదిద్దనున్నారు. 2030 నాటికి పనులు పూర్తయి వినియోగంలోకి తేనున్నారు.

దేశంలోనే నెంబర్ వన్ అమరావతి స్టేడియం

ఇవన్నీ ఒక ఎత్తైతే ఆంధ్రప్రదేశ్ లో భారీ కెపాసిటీతో క్రికెట్ స్టేడియం నిర్మాణానికి కూటమి ప్రభుత్వం పూనుకున్నది. అమరావతి లో ప్రపంచంలో అత్యధిక సామర్థ్యం కల స్టేడియం ఇక్కడ రానున్నది. 1.32 లక్షల మంది కూర్చుని క్రికెట్ ను వీక్షించే విధంగా త్వరలో నిర్మాణ పనులు చేపట్టనున్నారు. 2030 నాటికి స్టేడియం పనులు పూర్తి చేయాలని ప్రభుత్వం లక్ష్యంగా నిర్ణయించుకున్నది.

ఇవి కూడా చదవండి..

Hyderabad | ఆన్‌లైన్ బెట్టింగ్‌‌కు బానిసై రివాల్వర్ కుదువ పెట్టిన ఎస్ఐ
Vaibhav Suryavanshi : అండర్ -19 ఆసియా కప్‌ కు వైభవ్ సూర్యవంశీ
Viral Video : ఏం మింగిందో…భారీ పొట్టతో కొండ చిలువ అవస్థలు!
Mir Alam Iconic Bridge : హైదరాబాద్ కు మరో ఐకానిక్..మీర్ ఆలం ట్యాంక్ కేబుల్ బ్రిడ్జి పనులు షురూ!