CPM | లేబర్‌ కోడ్‌లను ఉపసంహరించుకోవాలి : జాన్ వెస్లీ

కేంద్ర ప్రభుత్వం అమలు చేస్తున్న లేబర్‌కోడ్లను ఉపసంహరించుకోవాలని సీపీఐ(ఎం) రాష్ట్ర కార్యదర్శి జాన్ వెస్లీ డిమాండ్ చేశారు. కార్మికులు దేశ వ్యాపితంగా సమ్మెలు చేస్తున్నా, కార్మిక సంఘాలతో ఎలాంటి చర్చలు లేకుండానే నాలుగు లేబర్ కోడ్ లను పార్లమెంట్‌లో ఏకపక్షంగా ప్రకటించి, అమలుకు పూనుకున్నదన్నారు. ఇలాంటి కార్మికుల హక్కులను కాలరాసే, ప్రమాదకరమైన కార్మిక చట్టాలను తక్షణమే ఉపసంహరించుకోవాలని కేంద్ర ప్రభుత్వాన్ని సీపీఐ(ఎం) తెలంగాణ రాష్ట్ర కమిటీ తరఫున డిమాండ్‌ చేస్తున్నామన్నారు.

ఎన్నో పోరాటాలు, ఉద్యమాలు, త్యాగాలతో కార్మికులు తమ రక్షణ కోసం సాధించుకున్న 29 పాత చట్టాలకు కేంద్ర ప్రభుత్వం తెచ్చిన లేబర్‌కోడ్స్‌ తిలోదకాలు ఇస్తున్నదని విమర్శించారు. కార్మికుల వేతనాలు, పని గంటలు, సామాజిక భద్రత వంటి హక్కులను కాలరాస్తున్నాయని ఆవేదన వ్యక్తం చేశారు. ఈ చట్టాల వల్ల కార్మికులు సమ్మె చేసే హక్కును కోల్పోతారన్నారు. కార్పొరేట్‌లకు అనుకూలంగాను, కార్మికుల హక్కులకు తీవ్ర నష్టం కల్గించే విధంగా తీసుకొచ్చిన నాలుగు లేబర్‌ కోడ్‌లకు వ్యతిరేకంగా ఐక్య పోరాటాలు చేయాలని కార్మికులకు సీపీఐ(ఎం) విజ్ఞప్తి చేస్తున్నదని వెల్లడించారు.