Harish Rao | ‘చిల్లర మాటలు.. చీప్ పాలిటిక్స్’.. సీఎం రేవంత్ పై హరీశ్ ఫైర్

బీఆర్‌ఎస్ మాజీమంత్రి హరీశ్ రావు సీఎం రేవంత్ రెడ్డిపై తీవ్ర స్థాయిలో ఆగ్రహం వ్యక్తం చేశారు. కొమురంభీం ఆసిఫాబాద్ జిల్లా కౌటల మండల కేంద్రంలోని ప్రభుత్వ జిల్లా పరిషత్ హై స్కూల్లో మధ్యాహ్న భోజనంలో పురుగులు వస్తున్నాయని, విద్యార్థులు రోడ్డుపై భోజనం ప్లేట్లతో బైఠాయించి నిరసన వ్యక్తం చేశారు.

విధాత, హైదరాబాద్ :

బీఆర్‌ఎస్ మాజీమంత్రి హరీశ్ రావు సీఎం రేవంత్ రెడ్డిపై తీవ్ర స్థాయిలో ఆగ్రహం వ్యక్తం చేశారు. కొమురంభీం ఆసిఫాబాద్ జిల్లా కౌటల మండల కేంద్రంలోని ప్రభుత్వ జిల్లా పరిషత్ హై స్కూల్లో మధ్యాహ్న భోజనంలో పురుగులు వస్తున్నాయని, విద్యార్థులు రోడ్డుపై భోజనం ప్లేట్లతో బైఠాయించి నిరసన వ్యక్తం చేశారు. పాఠశాల సిబ్బందికి ఎన్ని సార్లు చెప్పినా పట్టించుకోవడం లేదని, అధికారులు వెంటనే చర్యలు తీసుకోవాలని విద్యార్థులు డిమాండ్ చేశారు. ఈ ఘటనపై మాజీ మంత్రి స్పందించారు. విద్యార్థులు పడుతున్న బాధలపై ప్రభుత్వంపై ట్విట్టర్ వేదికగా తీవ్ర స్థాయిలో మండిపడ్డారు.

అంతర్జాతీయ స్థాయి ప్రమాణాలతో యంగ్ ఇండియా ఇంటర్నేషనల్ స్కూళ్లు అని డబ్బా కొట్టుకునే సీఎం రేవంత్ రెడ్డి.. ముందు ప్రభుత్వ పాఠశాలల పిల్లలకు పురుగులు లేని అన్నం పెట్టు అని సూచించారు. ‘ఇక నుంచి నేనే సమీక్షలు చేస్తానన్న రేవంత్ రెడ్డి మాటలేమయ్యాయి?. విద్యార్థులకు కల్తీ ఆహారం పెడితే జైలుకే అన్న బెదిరింపులేమయ్యాయి? రెండేళ్లలో మీ వద్దనే ఉన్న విద్యాశాఖపై ఎన్ని సార్లు సమీక్షలు చేశారు? విద్యార్థులకు కల్తీ ఆహారం పెడుతున్న ఎంత మందిని జైలుకు పంపారు?’ అని సీఎం రేవంత్ ను హరీశ్ రావు ప్రశ్నించారు.

‘బడిలో చదువుకోవాల్సిన విద్యార్థులు.. పురుగులన్నం మాకొద్దు అని రోడ్లెక్కి నిలదీస్తుంటే ప్రభుత్వం ఏం చేస్తున్నట్లు? విద్యాశాఖ మంత్రిగా, ముఖ్యమంత్రిగా అసలు చేస్తున్నట్లు?. కాంగ్రెస్ చిల్లర మాటలు.. చీప్ పాలిటిక్స్ చేస్తున్నది. ప్రభుత్వం స్కీంలు పెట్టకుండా.. ఎందులో చూసినా స్కాంలు చేస్తుంది. అందిన కాడికి దండుకునే ప్లాన్లు.. వాటాలు, కమీషన్ల కోసం మీటింగులు.. ఇదే కదా 23నెలలుగా నువ్వు చేస్తున్నది?’ అని రేవంత్ రెడ్డిని ఉద్దేశించి హరీశ్ రావు తీవ్ర వ్యాఖ్యలు చేశారు. బడి పిల్లలకు సరిగ్గా అన్నం పెట్టలేని ముఖ్యమంత్రి ఈ రాష్ట్రానికి ఉండి ఏం లాభం? అని ధ్వజమెత్తారు. కుమ్రం భీం ఆసిఫాబాద్ జిల్లా పరిషత్ ఉన్నత పాఠశాలలో పిల్లలకు పురుగులన్నం పెట్టిన ఘటనపై రాష్ట్ర ప్రభుత్వం వెంటనే స్పందించి చర్యలు తీసుకోవాలని, ఇలాంటి ఘటనలు పునరావృతం కాకుండా చూడాలని హరీశ్ రావు డిమాండ్ చేశారు.