Chicago Accident | అమెరికాలో ఘోర రోడ్డు ప్రమాదం – మంచిర్యాల తల్లి, కూతురు మృతి

అమెరికాలో చికాగో సమీపంలో జరిగిన రోడ్డు ప్రమాదంలో మంచిర్యాల జిల్లా రెడ్డి కాలనీలో నివసించే రమాదేవి, ఆమె కూతురు తేజస్వి దుర్మరణం పాలయ్యారు. ఈ సంఘటన మంచిర్యాలలో తీవ్ర విషాదాన్ని కలిగించింది.

మంచిర్యాల/హైదరాబాద్‌:
అమెరికాలో జరిగిన ఓ రోడ్డు ప్రమాదంలో మంచిర్యాల జిల్లాకు చెందిన తల్లి, కూతురు మృతిచెందిన విషాదకర సంఘటన శనివారం చోటుచేసుకుంది. షికాగో సమీపంలో జరిగిన ఈ ప్రమాదంలో మంచిర్యాల – రెడ్డి కాలనీలో నివసించే రమాదేవి (52) మరియు ఆమె చిన్న కుమార్తె తేజస్వి (32) దుర్మరణం పాలయ్యారు.

కుటుంబసభ్యుల సమాచారం ప్రకారం, రమాదేవి మరియు తేజస్వి కారులో పెద్ద కుమార్తె ఇంట్లో జరుగుతున్న గృహప్రవేశ వేడుకకు వెళ్తుండగా ఎదురుగా వచ్చిన లారీ వారి వాహనాన్ని ఢీకొట్టింది. ఈ ప్రమాదంలో ఇద్దరూ అక్కడికక్కడే మృతిచెందినట్లు సమాచారం.

తేజస్వి మరియు ఆమె అక్క ఇద్దరూ కొంతకాలంగా అమెరికాలో స్థిరపడ్డారు. రమాదేవి ఇటీవలే కుమార్తెలను కలుసుకోవడానికి అమెరికా వెళ్లారు. అయితే ఊహించని రీతిలో జరిగిన ఈ ఘోర దుర్ఘటన కుటుంబాన్ని, స్థానికులను  తీవ్ర విషాదంలో ముంచెత్తింది.

మంచిర్యాల రెడ్డి కాలనీలో నివసించే రమాదేవి భర్త విఘ్నేశ్​ స్థానిక ఆర్యవైశ్య సంఘానికి సభ్యుడు. మంచిర్యాలలో బాగా పేరున్న వ్యక్తి కావడంతో పట్టణమంతా తీవ్ర చర్చనీయాంశంగా మారింది. పరిచయస్తులు, బంధువులు, స్థానికులు విఘ్నేశ్ ఇంటికి చేరుకుని సంతాపం వ్యక్తం చేస్తున్నారు.

(అమెరికా అధికార వర్గాల నుండి ఇప్పటివరకు అధికారిక సమాచారం అందలేదు. భారత మీడియా వర్గాల ద్వారా వెలువడిన వివరాల ప్రకారం ఈ ప్రమాదం షికాగో పరిసర ప్రాంతాల్లో జరిగింది. పూర్తి వివరాలు అందుబాటులో లేవు)